ભારતીય રિઝર્વ બેન્ક (RBI) એ બુધવારે એક બેન્ક પર અનેક પ્રતિબંધો લાદ્યા હતા, જેના કારણે તેની સામે કડક કાર્યવાહી કરવામાં આવી હતી. આ કાર્યવાહીની સીધી અસર બેન્કના ગ્રાહકો પર પડશે, જેનાથી તેઓ તેમના ખાતામાંથી પૈસા ઉપાડી શકશે નહીં. RBI એ ગ્રાહકો માટે ઉપાડ મર્યાદા 35,000 નક્કી કરી છે, એટલે કે ગ્રાહકો હવે તેમના બેન્ક ખાતામાંથી 35,000 રૂપિયાથી વધુ ઉપાડી શકશે નહીં. જો કે, આ પ્રતિબંધો ફક્ત આ બેન્ક માટે જ છે અને અન્ય બેન્કોને અસર કરશે નહીં. ગુવાહાટી કોઓપરેટિવ અર્બન બેન્કની બગડતી નાણાકીય પરિસ્થિતિને કારણે RBI એ આજે આ કાર્યવાહી કરી છે.
RBI ના પ્રતિબંધો આગામી છ મહિના સુધી અમલમાં રહેશે
મંગળવારે બેન્ક બંધ થયા પછી RBIના તમામ પ્રતિબંધો અમલમાં આવ્યા અને આગામી છ મહિના સુધી અમલમાં રહેશે. નિર્દેશો અનુસાર, સહકારી બેન્ક રિઝર્વ બેન્કની પૂર્વ મંજૂરી વિના કોઈપણ નવી લોન આપી શકશે નહીં અથવા હાલની લોન રિન્યૂ કરી શકશે નહીં. વધુમાં, બેન્ક કોઈપણ નવું રોકાણ કરી શકશે નહીં, કોઈપણ જવાબદારીઓ ઉઠાવી શકશે નહીં અથવા કોઈપણ ચુકવણી કરી શકશે નહીં. ભારતીય રિઝર્વ બેન્કે જણાવ્યું હતું કે, "બેન્કની વર્તમાન તરલતાની સ્થિતિને ધ્યાનમાં રાખીને બેન્કને નિર્દેશ આપવામાં આવ્યો છે કે તે થાપણદારોને તેમના બચત બેન્ક અથવા ચાલુ ખાતા અથવા અન્ય કોઈપણ ખાતામાંથી 35,000થી વધુ રકમ ઉપાડવાની મંજૂરી ન આપે, પરંતુ લોનને થાપણો સામે ગોઠવવાની મંજૂરી છે."
ગ્રાહકો DICGC તરફથી 5 લાખ સુધીના થાપણ વીમા દાવા મેળવવા માટે હકદાર રહેશે.
રિઝર્વ બેન્કે જણાવ્યું હતું કે તેણે તાજેતરમાં ગુવાહાટી કોઓપરેટિવ અર્બન બેન્કના બોર્ડ અને વરિષ્ઠ મેનેજમેન્ટ સાથે તેની કામગીરી સુધારવા માટે ચર્ચા કરી છે. જોકે, સુપરવાઇઝરી ચિંતાઓને દૂર કરવા અને તેના થાપણદારોના હિતોનું રક્ષણ કરવા માટે બેંક દ્વારા નક્કર પ્રયાસોના અભાવને કારણે આ નિર્દેશો જાહેર કરવાની જરૂર પડી. પાત્ર થાપણદારો ડિપોઝિટ ઇન્શ્યોરન્સ એન્ડ ક્રેડિટ ગેરંટી કોર્પોરેશન (DICGC) તરફથી 5 લાખ સુધીના થાપણ વીમા દાવા મેળવવા માટે હકદાર રહેશે.