Mother Dairy Cuts Edible Oil Prices: આગામી સપ્તાહથી, સરસવના તેલ અને અન્ય ખાદ્ય તેલના ભાવમાં વધુ ઘટાડો થવા જઈ રહ્યો છે. ધારા બ્રાન્ડના નામથી ખાદ્યતેલ વેચતી મધર ડેરીએ તેના તમામ ખાદ્ય તેલના ભાવમાં પ્રતિ લીટર રૂ. 10નો ઘટાડો કરવાની જાહેરાત કરી છે. નવા ભાવ સાથે ખાદ્યતેલનો સ્ટોક આવતા સપ્તાહથી બજારમાં ઉપલબ્ધ થશે.
મધર ડેરી દ્વારા ખાદ્યતેલના ભાવ ઘટાડવાના (Edible Oil Prices) નિર્ણયથી છેલ્લા ઘણા મહિનાઓથી મોંઘા ભાવથી પરેશાન સામાન્ય લોકોને મોટી રાહત મળશે. મે 2023ના પ્રથમ સપ્તાહમાં પણ મધર ડેરીએ સરસવના તેલ અને અન્ય ખાદ્યતેલોના ભાવમાં ઘટાડો કરવાની જાહેરાત કરી હતી. પરંતુ ગયા અઠવાડિયે આંતરરાષ્ટ્રીય બજારમાં ભાવમાં ઘટાડા બાદ કેન્દ્ર સરકારે ખાદ્ય તેલ ઉદ્યોગ સંઘને તેના સભ્યોને ભાવમાં વધુ ઘટાડો કરવા જણાવ્યું હતું. સરકારે લીટરે 8 રૂપિયાથીથી 12 રૂપિયા ઘટાડવા કહ્યું હતું. જે બાદ મધર ડેરીએ આ નિર્ણય લીધો છે.
ગુરુવારે જારી કરાયેલા એક સત્તાવાર નિવેદનમાં, મધર ડેરીના પ્રવક્તાએ જણાવ્યું હતું કે, “ધારા ખાદ્ય તેલના તમામ પ્રકારોની મહત્તમ છૂટક કિંમત (MRP)માં 10 રૂપિયા પ્રતિ લિટર સુધીનો ઘટાડો કરવામાં આવી રહ્યો છે. આંતરરાષ્ટ્રીય સ્તરે ખાદ્યતેલોના ભાવમાં ઘટાડો અને સ્થાનિક સ્તરે સરસવ જેવા તેલીબિયાં પાકોની ઉપલબ્ધતામાં થયેલા સુધારાને ધ્યાનમાં રાખીને આ પગલું લેવામાં આવ્યું છે.
તેમણે કહ્યું કે આંતરરાષ્ટ્રીય બજારમાં કિંમતોમાં ઘટાડા સાથે સ્થાનિક બજારમાં સરસવની સારી ઉપલબ્ધતાને કારણે આ નિર્ણય લેવામાં આવ્યો છે. ધારાના રિફાઇન્ડ સોયાબીન તેલનો ભાવ પ્રતિ લીટર 140 રૂપિયા કરવામાં આવ્યો છે, જ્યારે રિફાઇન્ડ રાઇસ બ્રાન ઓઇલનો SRP ઘટાડીને 160 રૂપિયા કરવામાં આવ્યો છે. ધારાનું રિફાઇન્ડ વેજિટેબલ રૂ.200માં મળશે. ધારા કાચી ઘની સરસવનું તેલ રૂ.160 પ્રતિ લીટરમાં મળશે. મે મહિનામાં પણ મધર ડેરીએ ખાદ્ય તેલની એમઆરપીમાં 15 થી 20 રૂપિયા પ્રતિ લીટરનો ઘટાડો કરવાની જાહેરાત કરી હતી.
જો કે સરકારની દરમિયાનગીરી બાદ કંપનીઓ ખાદ્યતેલના ભાવમાં ઘટાડો કરી રહી છે. સરકારનું માનવું છે કે આંતરરાષ્ટ્રીય બજારમાં ભાવ ઘટવા છતાં પેક્ડ ખાદ્ય તેલના ભાવમાં તેટલો ઘટાડો થયો નથી.