Gold Silver Price Today: બે દિવસના ઘટાડા બાદ ગુરૂવારે સવારે ફરીથી સોનાની કિંમતમાં જોરદાર ઉછાળો આવ્યો છે. વૈશ્વિક બજારમાં ભાવ વધવાની અસર ભારતીય બજાર પર પણ જોવા મળી હતી અને આજે સોના-ચાંદીના વાયદાના ભાવમાં વધારો થયો હતો.
મલ્ટીકોમોડિટી એક્સચેન્જ (MCX) પર, સવારે 24-કેરેટ શુદ્ધતાના વાયદાના ભાવ રૂ. 170 વધીને રૂ. 50,670 પ્રતિ 10 ગ્રામ થયા હતા. અગાઉ સોનામાં 50,661 રૂપિયાના સ્તરે ખુલીને વેપાર શરૂ થયો હતો. સોનાની માંગમાં વધારો થવાને કારણે ટૂંક સમયમાં જ તેની કિંમતોમાં ઉછાળો જોવા મળ્યો. સોનું હાલમાં તેના અગાઉના બંધ ભાવ કરતાં 0.34 ટકાના વધારા સાથે ટ્રેડ થઈ રહ્યું છે. અગાઉ વૈશ્વિક બજારમાં મોટા ઘટાડાથી સોનાના ભાવમાં સતત બે દિવસ સુધી ઘટાડો નોંધાયો હતો.
ચાંદીની પણ ચમક વધી
સોનાની જેમ આજે સવારે ચાંદીના વાયદાના ભાવમાં પણ વધારો જોવા મળ્યો હતો. એમસીએક્સ પર ચાંદીનો વાયદો રૂ. 327 વધી રૂ. 57,053 પ્રતિ કિલોગ્રામ થયો હતો. અગાઉ ચાંદીમાં ખુલીને રૂ. 57,177ના સ્તરે કારોબાર શરૂ થયો હતો, જે માંગમાં ઘટાડાને કારણે નીચે આવ્યો હતો પરંતુ હજુ પણ ભાવ 57 હજારની ઉપર જ છે. ચાંદી હાલમાં તેના પાછલા બંધ ભાવથી 0.58 ટકાના ઉછાળા પર ટ્રેડ થઈ રહી છે.
વૈશ્વિક બજારમાં પણ ભાવ વધ્યા છે
આજે વૈશ્વિક બજારમાં પણ સોના-ચાંદીના ભાવમાં વધારો જોવા મળી રહ્યો છે. યુએસ માર્કેટમાં સોનાની હાજર કિંમત $1,744.83 પ્રતિ ઔંસ પર પહોંચી ગઈ છે, જે અગાઉના બંધ ભાવ કરતાં 0.35 ટકા વધુ છે. એ જ રીતે, ચાંદીની હાજર કિંમત પણ $19.28 પ્રતિ ઔંસ પર પહોંચી ગઈ છે, જે અગાઉના બંધ ભાવ કરતાં 0.67 ટકા વધુ છે. અગાઉ વૈશ્વિક બજારમાં સોના-ચાંદીના ભાવ સતત બે દિવસ સુધી ઘટયા હતા.
આગળ સોના-ચાંદીના ભાવ કેવા રહેશે
સોના-ચાંદીના ભાવમાં હજુ પણ તીવ્ર વધઘટ જોવા મળી રહી છે. વૈશ્વિક બજારમાં તાજેતરમાં આવેલા ઘટાડાને કારણે ભારતીય બજારમાં પણ સોનું સસ્તું થયું છે. અગાઉ સરકારે આયાત ડ્યુટીમાં વધારો કર્યા બાદ સોનાના ભાવમાં વધારો થયો હતો. નિષ્ણાતો કહે છે કે સોનાની કિંમતમાં વધુ વધારો થશે, કારણ કે ડોલર સતત મજબૂત થઈ રહ્યો છે. વૈશ્વિક બજારમાં સોનાના પુરવઠા પર વધુ અસર થવાની પણ શક્યતા છે, જેના કારણે તેની કિંમતો ઉછળી શકે છે.