પેટ્રોલ અને ડીઝલની વધતી કિંમતોએ સામાન્ય માણસની મુશ્કેલીમાં વધારો કર્યો છે. દેશના મોટાભાગના શહેરોમાં પેટ્રોલ 100 રૂપિયા પ્રતિ લીટરની સપાટીને પાર કરી ગયું છે. તે જ સમયે, ડીઝલની કિંમત પણ ઘણા શહેરોમાં 100 રૂપિયાથી વધુ થઈ ગઈ છે. પેટ્રોલ અને ડીઝલના ભાવમાં વધારાનો આ ટ્રેન્ડ ચાલુ રહેવાની આશા છે.
વાસ્તવમાં, માર્કેટ સ્ટડી અને ક્રેડિટ રેટિંગ કંપની ગોલ્ડમૅન સાશનો અંદાજ છે કે આવતા વર્ષ સુધીમાં બ્રેન્ટ ક્રૂડ ઑઇલના ભાવ પ્રતિ બેરલ $110 સુધી પહોંચી જશે. જે હાલના $85 પ્રતિ બેરલના સ્તર કરતાં 30 ટકા વધુ છે. અનુમાન મુજબ, ક્રૂડ ઓઈલની કિંમત પણ બેરલ દીઠ $147ના સર્વકાલીન ઉચ્ચ સ્તરને સ્પર્શી શકે છે.
ક્રૂડ ઓઈલની આ સપાટી વર્ષ 2008માં હતી. આ એ સમય હતો જ્યારે વિશ્વ આર્થિક મંદીની ઝપેટમાં હતું. રિપોર્ટમાં કહેવામાં આવ્યું છે કે જો આવું થાય તો પેટ્રોલની કિંમત 150 રૂપિયા સુધી પહોંચી શકે છે. સાથે જ ડીઝલની વાત કરીએ તો તેની કિંમત 140 રૂપિયા પ્રતિ લીટર સુધી પહોંચી શકે છે. જોકે, ગોલ્ડમેન સાશનો આ અંદાજ આવતા વર્ષ માટે છે.
પેટ્રોલ અને ડીઝલ પર સરકાર તરફથી રાહતની આશા ઓછી છે. તેને GSTના દાયરામાં લાવવાના વિચારનો પહેલેથી જ વિરોધ થઈ રહ્યો છે. આ સાથે જ કેન્દ્ર સરકાર ટેક્સમાં ઘટાડો કરીને તેની આવક ઘટાડવાના મૂડમાં દેખાતી નથી. આવી સ્થિતિમાં તેનો બોજ સામાન્ય જનતા પર પડી શકે છે.
આપણે જાણીએ કે દેશમાં પેટ્રોલ અને ડીઝલની કિંમતો સતત વધી રહી છે. ગુરુવારે પેટ્રોલ અને ડીઝલના ભાવમાં પ્રતિ લિટર 35-35 પૈસાનો વધારો કરવામાં આવ્યો હતો. રાજધાની દિલ્હીમાં પેટ્રોલ 108.29 રૂપિયા પ્રતિ લીટર અને ડીઝલ 97.02 રૂપિયા પ્રતિ લીટરના ઓલ ટાઈમ રેકોર્ડ સ્તરે વેચાઈ રહ્યું છે. આ મહિનામાં અત્યાર સુધીમાં 28માંથી 21 દિવસમાં તેલના ભાવમાં વધારો થયો છે. પેટ્રોલ 6.65 રૂપિયા પ્રતિ લીટર અને ડીઝલ 7.25 રૂપિયા પ્રતિ લીટર મોંઘુ થયું છે. તમને જણાવી દઈએ કે જુલાઈમાં પહેલીવાર પેટ્રોલની કિંમત 100 રૂપિયાના સ્તરને પાર કરી ગઈ હતી.