Indian Stock Market Records: ભારતીય શેરબજારમાં સતત તેજી જોવા મળી રહી છે. શેરબજારે ફરી એક વખત ઈતિહાસ રચ્યો છે. પ્રથમ વખત સેન્સેક્સ 58 હજારને પાર કરી ગયો છે. શુક્રવારે શરૂઆતના સત્રમાં સેન્સેક્સ 217 અંક ઉછળીને 58,069 પર પહોંચ્યો હતો. બીજી બાજુ, નિફ્ટી 66.20 પોઇન્ટ વધીને રેકોર્ડ 17,300 પર પહોંચ્યો. એક દિવસ અગાઉ પણ બીએસઈ સેન્સેક્સ ગુરુવારે 514 પોઈન્ટના ઉછાળા સાથે નવી ઐતિહાસીક સપાટી ર પર બંધ થયો હતો. NSE નિફ્ટી પણ 157.90 પોઈન્ટ ઉછળીને 17,234.15ની સર્વોચ્ચ સપાટી પર બંધ રહ્યો હતો.
આજે, દિવસ દરમિયાન કયા શેરો સૌથી વધુ વધશે અને ઘટશે, તેનો અહેવાલ સાંજ સુધીમાં ઉપલબ્ધ થશે. જોકે, ગઈકાલે સેન્સેક્સના શેરોમાં 3.34 ટકાના ઉછાળા સાથે ટીસીએસનો શેર સૌથી વધુ વધ્યો હતો. આ ઉપરાંત, એચયુએલ, અલ્ટ્રાટેક સિમેન્ટ, ડો. રેડ્ડીઝ, નેસ્લે ઇન્ડિયા, કોટક બેન્ક અને ટાઇટન મુખ્ય વધનારા શેર હતા.
બીજી તરફ, મહિન્દ્રા એન્ડ મહિન્દ્રાના શેરમાં સૌથી વધુ 2.29 ટકાનો ઘટાડો થયો છે. કંપનીએ કહ્યું કે વૈશ્વિક સ્તરે સેમિકન્ડક્ટરની અછતને કારણે તે ઉત્પાદનમાં 25 ટકાનો ઘટાડો કરશે. આ કારણે કંપનીનો શેર નીચે આવ્યો. અન્ય ઘટનારાઓમાં બજાજ ઓટો, બજાજ ફિનસર્વ, બજાજ ફાઇનાન્સ, એશિયન પેઇન્ટ્સ અને એલ એન્ડ ટીનો સમાવેશ થાય છે. તેમાં 0.79 ટકા સુધીનો ઘટાડો જોવા મળ્યો છે.
નરેન્દ્ર સોલંકી, ઇક્વિટી રિસર્ચ હેડ, આનંદ રાઠીએ જણાવ્યું હતું કે, "યુએસ રોજગારના ડેટા પહેલા એશિયન બજારોમાં મિશ્ર વલણ વચ્ચે સ્થાનિક બજારોમાં શરૂઆત ઉછાળા સાથે થઈ હતી. બપોરના ટ્રેડમાં ટ્રેડરોની લેવાલી નીકળતા ઉછાળો વધુ ઝડપી જોવા મળ્યો હતો.”
જિયોજિત ફાઇનાન્સિયલ સર્વિસિસના રિસર્ચ હેડ વિનોદ નાયરે જણાવ્યું હતું કે યુએસમાં વધુ સારા આર્થિક ડેટા, એફઆઇઆઇ (વિદેશી સંસ્થાકીય રોકાણકાર) ની ખરીદી અને રોજગારના ડેટાને કારણે વૈશ્વિક સ્તરે મિશ્ર વલણ વચ્ચે સ્થાનિક ઇક્વિટી માર્કેટમાં તેજી જોવા મળી હતી.