Share Market: યુએસ રાષ્ટ્રપતિ ડોનાલ્ડ ટ્રમ્પ દ્વારા લાદવામાં આવેલા ટેરિફની અસર એટલી હતી કે શુક્રવારે ભારતીય શેર બજાર ક્રેશ થઈ ગયું. ટ્રમ્પની રેસિપ્રોકલ ટેરિફ નીતિને કારણે, વિશ્વભરના ઇક્વિટી બજારોમાં વેચવાલી વધુ તીવ્ર બની, જેની સ્થાનિક બજારના રોકાણકારો પર પણ અસર પડી.
ટ્રેડ વોરના ભયથી રોકાણકારો ચિંતિત
ટ્રમ્પ દ્વારા વિશ્વભરના 180 થી વધુ દેશો પર ટેરિફ લાદવામાં આવ્યા બાદ, ચીને શુક્રવારે બદલો લેતા અમેરિકન માલની તમામ આયાત પર 34% ટેરિફ લાદ્યો. આનાથી ટ્રેડ વોરનો ભય વધુ વધ્યો અને રોકાણકારો બેચેન બન્યા. પરિણામે સેન્સેક્સ ૯31 પોઈન્ટ અથવા 1.૨ ટકા ઘટીને 75,365 પોઈન્ટ પર બંધ થયો, જ્યારે નિફ્ટી 346 પોઈન્ટ અથવા 1.5 ટકા ઘટીને ૨૨,૯૦4 પોઈન્ટ પર બંધ થયો.
10 લાખ કરોડ રૂપિયાનું નુકસાન
શેરબજારમાં ભારે વેચવાલીથી રોકાણકારોને 4 એપ્રિલે 10 લાખ કરોડ રૂપિયાનું નુકસાન થયું હતું. 2 એપ્રિલે ટ્રમ્પ દ્વારા રેસિપ્રોકલ ટેરિફની જાહેરાત પછી, BSE પર લિસ્ટેડ કંપનીઓનું કુલ બજાર મૂલ્યાંકન પણ 9,98,379.46 કરોડ રૂપિયા ઘટીને 4,03,34,886.46 કરોડ રૂપિયા (4.73 ટ્રિલિયન ડોલર) થયું. શુક્રવારે, BSE સેન્સેક્સના 30 માંથી 24 શેર ઘટાડા સાથે બંધ થયા. બધા ક્ષેત્રીય સૂચકાંકો લાલ નિશાનમાં બંધ થયા.
આ કંપનીઓના શેરને સૌથી વધુ નુકસાન થયું
સૌથી વધુ નુકસાન તે કંપનીઓના શેરને થયું જે હવે અમેરિકામાં નિકાસ દરમિયાન ભારે ટેરિફ દબાણનો સામનો કરશે. શુક્રવારના સત્રમાં ઓટો અને મેટલ શેરોની સાથે, ફાર્મા કંપનીઓના શેરોમાં પણ ભારે વેચવાલી જોવા મળી.
ટ્રમ્પે ફાર્મા ઉદ્યોગને જવાબી ટેરિફની શ્રેણીમાંથી બહાર રાખ્યો હોવા છતાં, તેમણે કહ્યું છે કે અમે ફાર્મા પર એવા ટેરિફ લાદવા જઈ રહ્યા છીએ, જે પહેલાં ક્યારેય જોવા મળ્યા નથી. પરિણામે, લ્યુપિન 5. 9ટકા, સિપ્લા 5.3 ટકા, ડૉ. રેડ્ડીઝ લેબોરેટરીઝના શેર 3.6 ટકા, જ્યારે સન ફાર્માના શેર 3.4 ટકા ઘટ્યા.
મેટલ શેરોમાં પણ તીવ્ર ઘટાડો થયો
ફાર્મા ઉપરાંત, મેટલ શેરોમાં પણ ભારે વેચવાલી જોવા મળી. નાલ્કોના શેર 8.7 ટકા ઘટ્યા હતા, જ્યારે હિન્દાલ્કોના શેર 8.1 ટકા ઘટ્યા હતા. અન્ય મેટલ શેરોમાં, ટાટા સ્ટીલ 8.6 ટકા, SAIL 5 ટકા, JSW સ્ટીલ 3.4 ટકા ઘટ્યા હતા, જ્યારે વેદાંતાના શેર 8.6 ટકા ઘટ્યા હતા.
બીએસઈના ડેટા અનુસાર, વિદેશી પોર્ટફોલિયો રોકાણકારો (FPIs) એ રૂ. 3,484 કરોડના શેર વેચ્યા હતા, જ્યારે સ્થાનિક સંસ્થાકીય રોકાણકારો (DIIs) એ રૂ. 1,720 કરોડના ચોખ્ખા ઉપાડ કર્યા હતા.