Direct Tax Collection: દેશમાં ડાયરેક્ટ ટેક્સ કલેક્શનના આંકડા જાહેર કરાયા છે. આ વખતે સરકારી તિજોરીમાં સારો એવો વધારો થયો છે. 1 એપ્રિલ, 2023 થી 16 સપ્ટેમ્બર, 2023 સુધીમાં દેશનું ડાયરેક્ટ ટેક્સ કલેક્શન 23.5 ટકા વધીને 8.65 લાખ કરોડ રૂપિયા થયું છે. જ્યારે ડાયરેક્ટ ટેક્સ કલેક્શનમાં વાર્ષિક ધોરણે 23.5 ટકાનો અદભૂત વધારો જોવા મળ્યો છે, ત્યારે એડવાન્સ ટેક્સ કલેક્શન પણ 20.7 ટકાના વધારા બાદ 3,55,481 કરોડ રૂપિયા થયું છે.
ડાયરેક્ટ ટેક્સ કલેક્શનમાં STT પણ સામેલ
ડાયરેક્ટ ટેક્સ કલેક્શનમાં 4.16 લાખ કરોડ રૂપિયાનો કોર્પોરેશન ટેક્સ અને 4.47 લાખ કરોડનો વ્યક્તિગત આવકવેરો પણ સામેલ છે, જેમાં સિક્યોરિટીઝ ટ્રાન્ઝેક્શન ટેક્સ (STT) પણ સામેલ છે.
1 એપ્રિલ, 2023 થી સપ્ટેમ્બર 16 સુધીમાં પ્રોવિઝનલ ડાયરેક્ટ ટેક્સ કલેક્શન 8,65,117 કરોડ રૂપિયા હતું, જે ગયા વર્ષની સરખામણીમાં 23.5 ટકાનો શાનદાર ગ્રોથ રહ્યો છે. ગયા વર્ષે સમાન સમયગાળામાં ડાયરેક્ટ ટેક્સ કલેક્શન 7,00,416 કરોડ રૂપિયા હતું. નાણાકીય વર્ષ 2023-24 માટે સરકારે 16 સપ્ટેમ્બર 2023 સુધી 1,21,944 કરોડ રૂપિયાનું રિફંડ જાહેર કર્યું છે. ચાલુ નાણાકીય વર્ષના પ્રથમ છ મહિનામાં કોર્પોરેશન ટેક્સ 4,16,217 કરોડ રૂપિયા હતો, જ્યારે વ્યક્તિગત આવકવેરો 4,47,291 કરોડ રૂપિયા હતો જેમાં સિક્યોરિટીઝ ટ્રાન્ઝેક્શન ટેક્સ પણ સામેલ છે.
આ ડેટા બહાર પાડતા સેન્ટ્રલ બોર્ડ ઓફ ડાયરેક્ટ ટેક્સે જણાવ્યું હતું કે ડાયરેક્ટ ટેક્સ (રિફંડ એડજસ્ટ કરતા પહેલા)નું કુલ કલેક્શન 9,87,061 કરોડ રૂપિયા હતું, જે ગયા વર્ષની સરખામણીએ 8,34,469 કરોડ રૂપિયા હતું. આ રીતે 18.29 ટકાનો વધારો જોવા મળ્યો છે.
એડવાન્સ ટેક્સ કલેક્શનમાં પણ 20 ટકાથી વધુનો વધારો થયો
ચાલુ નાણાકીય વર્ષના 16 સપ્ટેમ્બર સુધી પ્રોવિઝનલ એડવાન્સ ટેક્સ કલેક્શન 3,55,481 કરોડ રૂપિયા થયું છે જે ગયા વર્ષના સમાન સમયગાળામાં 2,94,433 કરોડ રૂપિયા હતું. આ રીતે 20.7 ટકાનો વધારો જોવા મળ્યો છે.
સરકારના પ્રયાસોના પરિણામે ટેક્સ કલેક્શનમાં વધારો થયો
ડાયરેક્ટ ટેક્સ કલેક્શન અને એડવાન્સ ટેક્સ કલેક્શનમાં સતત વધારો એ પુરાવો છે કે કરચોરી રોકવાના સરકારના પ્રયાસો ફળ આપી રહ્યા છે અને ટેક્સ કલેક્શન પ્રોસેસમાં એડવાન્સ ટેકનોલોજીનો ઉપયોગ તેમાં મદદરૂપ સાબિત થઇ રહ્યો છે.