આજે કામ નહી કરે HDFC બેન્કની આ સર્વિસ, ક્યાં સુધી યુઝ નહી કરી શકો UPI અને ક્રેડિટ કાર્ડ

જેના કારણે ક્રેડિટ કાર્ડ, નેટ બેન્કિંગ, UPI, RTGS, IMPS જેવી સેવાઓનો ઉપયોગ નિર્ધારિત સમયે શક્ય બનશે નહીં

દેશની સૌથી મોટી ખાનગી બેન્ક એચડીએફસી બેન્કે તેના ગ્રાહકો માટે એલર્ટ જાહેર કરીને કહ્યું છે કે ડિસેમ્બર 2024માં બે દિવસ સુધી બેન્કિંગ સેવાઓ પ્રભાવિત થશે. બેન્કે તેની સેવાઓને સુધારવા માટે મેન્ટેનન્સ શિડ્યૂલ નક્કી કર્યું છે, જેના કારણે ક્રેડિટ કાર્ડ, નેટ બેન્કિંગ, UPI, RTGS, IMPS જેવી સેવાઓનો ઉપયોગ નિર્ધારિત સમયે શક્ય બનશે નહીં.

આ સેવા બે દિવસ સુધી કામ કરશે નહીં

HDFC બેન્કની સત્તાવાર વેબસાઇટ અનુસાર, 14 ડિસેમ્બર, 2024ના રોજ સવારે 1:00 વાગ્યાથી 1:30 વાગ્યા સુધી ક્રેડિટ કાર્ડના ટ્રાન્જેક્શન ખોરવાઈ જશે. આ પછી નેટ બેન્કિંગ, મોબાઈલ બેન્કિંગ, ફંડ ટ્રાન્સફર (UPI, IMPS, NEFT અને RTGS) અને મર્ચન્ટ પેમેન્ટ જેવી સેવાઓ સવારે 2:30 થી સવારે 5:30 સુધી ઉપલબ્ધ રહેશે નહીં. આ સિવાય સવારે 5:00 થી સવારે 7:00 વાગ્યા સુધીના ડીમેટ ટ્રાન્જેક્શનને પણ અસર થશે. આ સમયગાળા દરમિયાન, ગ્રાહકો ડીમેટ ખાતા સંબંધિત કોઈપણ ટ્રાન્જેક્શન કરી શકશે નહીં.

14મી ડિસેમ્બરે રાત્રે 10:00 વાગ્યાથી 15મી ડિસેમ્બરના રોજ બપોરે 12:00 વાગ્યા સુધી નેટ બેન્કિંગમાં “ઑફર” ટૅબ ઉપલબ્ધ રહેશે નહીં. 15 ડિસેમ્બરના રોજ સવારે 1:00 થી સવારે 5:00 વાગ્યા સુધી નવી નેટ બેંકિંગ પર મ્યુચ્યુઅલ ફંડ સંબંધિત ટ્રાન્જેક્શન શક્ય નહીં હોય.

ગ્રાહકો માટે એલર્ટ

બેન્કે ગ્રાહકોને વિનંતી કરી છે કે તેઓ આ બે દિવસ દરમિયાન તેમની બેન્કિંગ કામગીરીનું અગાઉથી આયોજન કરે. જે ગ્રાહકોને ફંડ ટ્રાન્સફર, ઇન્વેસ્ટમેન્ટ અથવા ડીમેટ ટ્રાન્જેક્શ જેવી સેવાઓની જરૂર હોય તેમણે નિયત સમયપત્રકને ધ્યાનમાં રાખીને અગાઉથી તેમની જરૂરિયાતો સારી રીતે પૂરી કરવી જોઈએ.

નવેમ્બરમાં પણ  મેન્ટેનન્સ કરવામાં આવી હતી

HDFC બેન્કે અગાઉ નવેમ્બર 2024માં જાળવણી માટેનું શિડ્યૂલ પણ બહાર પાડ્યું હતું. તે સમયે યુનિફાઈડ પેમેન્ટ ઈન્ટરફેસ (UPI) સેવાઓને અસર થઈ હતી. બેન્કે 5 નવેમ્બરના રોજ સવારે 12:00 થી 2:00 અને 23 નવેમ્બરના રોજ સવારે 12:00 થી 3:00 સુધી UPI સેવાઓ અસ્થાયી રૂપે બંધ કરી દીધી હતી. આ સમયગાળા દરમિયાન, ગ્રાહકો Google Pay, Phone Pay અથવા અન્ય UPI પ્લેટફોર્મનો ઉપયોગ કરી શકતા ન હતા.

HDFC બેન્કે કહ્યું છે કે આ શિડ્યૂલનો હેતુ સેવાઓમાં સુધારો કરવાનો અને ગ્રાહકોને ઉત્તમ અનુભવ પ્રદાન કરવાનો છે. જો કે આનાથી ગ્રાહકોને અસુવિધા થઈ શકે છે, પરંતુ આ તેમના લાંબા ગાળાના ફાયદા માટે કરવામાં આવી રહ્યું છે.