8th Pay Commission salary hike: કેન્દ્ર સરકાર દ્વારા 8મા પગાર પંચની રચનાની જાહેરાત બાદ રાજ્ય સરકારના કર્મચારીઓમાં પણ પગાર વધારાની ચર્ચા શરૂ થઈ ગઈ છે. ત્યારે સવાલ એ છે કે 8મું પગાર પંચ લાગુ થયા બાદ કયા રાજ્યના કર્મચારીઓનો પગાર સૌથી પહેલા વધશે? આવો, આ વિશે વિગતવાર માહિતી મેળવીએ.
રાજ્યો પર 8મા પગાર પંચની અસર
8મા પગાર પંચની ભલામણો સૌપ્રથમ કેન્દ્રીય કર્મચારીઓ પર લાગુ થશે. ત્યારબાદ રાજ્યોએ પણ તેનો અમલ કરવો પડશે. અગાઉના 7મા પગાર પંચના સમયે મોટાભાગના રાજ્યોએ કેન્દ્રની ભલામણોને અપનાવી હતી, પરંતુ દરેક રાજ્યની કાર્યવાહી અને સમયમર્યાદા અલગ-અલગ હોય છે. એટલે કે, કેન્દ્ર સરકાર જે ક્ષણે 8મું પગાર પંચ લાગુ કરે તે જ ક્ષણે રાજ્યોમાં પણ લાગુ થાય તે જરૂરી નથી.
ભલામણોનો અમલ કેવી રીતે થાય છે?
જ્યારે કેન્દ્ર સરકાર નવી ભલામણો લાગુ કરે છે, ત્યારે તે રાજ્યોને તેને કેવી રીતે લાગુ કરવી તે અંગે માર્ગદર્શિકા પણ આપે છે. ત્યારબાદ દરેક રાજ્ય પોતાના બજેટ અને કર્મચારીઓની સંખ્યાના આધારે પ્લાન બનાવે છે. રાજ્યો પોતાની જરૂરિયાતો અને નાણાકીય પરિસ્થિતિને ધ્યાનમાં રાખીને અલગ-અલગ વેતન મેટ્રિક્સ બનાવે છે. જો કે, હાલના પગારને નવા પગાર ધોરણમાં બદલવા માટે ફિટમેન્ટ ફેક્ટરનો ઉપયોગ કરવામાં આવે છે, જે કેન્દ્ર સરકાર પણ કરે છે.
ઉદાહરણ તરીકે, હાલમાં ફિટમેન્ટ ફેક્ટર 2.57 છે, પરંતુ જો તેને વધારીને 2.86 કરવામાં આવે, તો તમારી હાલની બેઝિક સેલરીને 2.86 વડે ગુણવામાં આવશે, અને જે નવો આંકડો આવશે તે તમારો વધેલો બેઝિક પગાર હશે. કર્મચારીઓનું મોંઘવારી ભથ્થું (DA) મોંઘવારી પ્રમાણે વધારવામાં આવે છે. 7મા પગાર પંચમાં રાજ્ય અને કેન્દ્ર સરકારના કર્મચારીઓના સરેરાશ પગારમાં 20-25 ટકાનો વધારો થયો હતો.
કયા રાજ્યોમાં પગાર સૌથી પહેલા વધે છે?
કેન્દ્રીય કર્મચારીઓને 8મું પગાર પંચ લાગુ થતાં જ કેન્દ્ર સરકાર રાજ્યો માટે માર્ગદર્શિકા જારી કરશે. ત્યારબાદ રાજ્યો પર નિર્ભર કરે છે કે તેઓ કેવી રીતે અમલ કરે છે. પરંતુ અગાઉના પગાર પંચોના અમલીકરણ પર નજર કરીએ તો મોટા અને સમૃદ્ધ રાજ્યોમાં આ ભલામણોનો ઝડપથી અમલ થાય છે.
7મા પગાર પંચ સમયે, ઉત્તર પ્રદેશ, મહારાષ્ટ્ર, ગુજરાત અને તમિલનાડુ જેવા રાજ્યોએ ઝડપથી અમલ કર્યો હતો. 8મા પગાર પંચમાં પણ ઉત્તર પ્રદેશ અને મહારાષ્ટ્ર જેવા રાજ્યોના કર્મચારીઓને વધુ લાભ મળી શકે છે, કારણ કે આ રાજ્યોની આર્થિક સ્થિતિ મજબૂત છે અને ત્યાં કેન્દ્ર અને રાજ્યમાં એક જ પક્ષની સરકાર છે. જે રાજ્ય કેન્દ્ર સરકારના ફિટમેન્ટ ફેક્ટર પરના મૂળ પગારમાં વધુ વધારો કરશે, તે રાજ્યના કર્મચારીઓના પગારમાં સૌથી વધુ વધારો થશે.
આ પણ વાંચો....
માસિક પગાર 40,50,60,70 હજાર જેટલો પણ હોય, અહીં જાણો 8મા પગાર પંચ પછી તેમાં કેટલો વધારો થશે