દાહોદ જિલ્લામાં છેલ્લા કેટલાક દિવસો બાદ મોડીરાત્રે વીજળીના કડાકા-ભડાકા સાથે ધોધમાર વરસાદ વરસ્યો હતો. જિલ્લામાં સવારથી વાદળછાયું વાતાવરણ સર્જાયા બાદ રાત્રે પવનના સુસવાટા સાથે વરસેલા વરસાદના કારણે દાહોદના રોડ રસ્તાઓ પર વરસાદી પાણી ફરી વળ્યા હતા. મોડી રાતે દાહોદમાં માત્ર બે કલાકમાં ત્રણ ઈંચ વરસાદ ખાબક્યો હતો.
ભાર વરસાદને કારણે ગટરો ઉભરાઈ જતાં પાણી રસ્તાઓ પર ફરી વળ્યાં હોવાના દ્રશ્યો જોવા મળ્યા હતા. દાહોદના બસ સ્ટેન્ડ વિસ્તાર, વિવેકાનંદ ચોક, આંબેટકર ચોક, બહારપુરા માંડવ રોડ, ગોવિંદ નગર સહીત અનેક વિસ્તારના રસ્તાઓ પર વરસાદી પાણી ભરાયા હતા.
ત્યારે દાહોદ જિલ્લા વિકાસ અધિકારીના નિવાસ સ્થાનની બહાર ગુટણ સમા પાણી ભરાયા હતા. આ સાથે અનેક દુકાનો અને સોસાયટીમાં પાણી ભરાઈ ગયા હતાં. રસ્તાઓ પર પાણી ભરાતા વાહનચાલકો તેમજ સ્થાનિકોને મુશ્કેલીનો સામનો કરવો પડ્યો હતો.
દાહોદ શહેર સહીત રાબડાલ, ગલાલિયાવાડ, છાપરી, રળીયાતી, સહીત અન્ય આસપાસના વિસ્તારોમાં વરસાદ નોંધાયો હતો. જ્યારે વરસાદના કારણે વીજકરંટ લગાવતાથી વાછરડા સહીત ગાયનું મોત નીપજ્યું હતું. ગરમી અને ઉકળાટથી લોકોને રાહત મળી હતી. ત્યારે ધોધમાર વરસાદ વરસતા ખેડૂતોમાં ખુશી અને આનંદનો માહોલ જોવા મળ્યો હતો.