Ambalal Patel rain forecast: હવામાન નિષ્ણાત અંબાલાલ પટેલે ગુજરાતમાં ચોમાસા અને વરસાદને લઈને એક નવું અનુમાન વ્યક્ત કર્યું છે. તેમના જણાવ્યા મુજબ, હાલમાં એક પછી એક સક્રિય થઈ રહેલા વેસ્ટર્ન ડિસ્ટર્બન્સની ચોમાસા પર વિપરીત અસર પડી શકે છે. જોકે, આ સિસ્ટમના કારણે ગરમીમાં સામાન્ય ઘટાડો થશે પણ બફારો વધશે. અંબાલાલ પટેલની આગાહી પ્રમાણે, ગુજરાતમાં 15 જૂનની આસપાસ ચોમાસાના આગમન પહેલાનો વરસાદ શરૂ થઈ શકે છે અને ખાસ કરીને 18 થી 28 જૂન વચ્ચે રાજ્યમાં સારો એવો વરસાદ પડવાની પૂરેપૂરી સંભાવના છે.
વેસ્ટર્ન ડિસ્ટર્બન્સથી ચોમાસું પ્રભાવિત થશે
અંબાલાલ પટેલના જણાવ્યા અનુસાર, હાલમાં ઉત્તર ભારત અને ઉત્તર-પૂર્વ ભારતમાં એક બાદ એક વેસ્ટર્ન ડિસ્ટર્બન્સ આવી રહ્યા છે. આ વાતાવરણીય પલટાની અસર ગુજરાત પર પણ જોવા મળશે. આ વેસ્ટર્ન ડિસ્ટર્બન્સ સૌથી મોટી વિપરીત અસર ચોમાસાની સિસ્ટમ પર કરશે, જેનાથી વરસાદની પેટર્ન બદલાઈ શકે છે. આ સિસ્ટમની અસર હેઠળ ગુજરાતમાં મહત્તમ તાપમાનનો પારો તો ગગડશે, પરંતુ ભેજના કારણે અસહ્ય બફારો અને ઉકળાટ વધશે, જેથી લોકોને ગરમીથી ખાસ રાહત નહીં મળે.
15 જૂન આસપાસ ગુજરાતમાં વરસાદના એંધાણ
ચોમાસાની પ્રગતિ વિશે વાત કરતા અંબાલાલ પટેલે જણાવ્યું છે કે, દેશમાં ચોમાસું ધીમે ધીમે આગળ વધી રહ્યું છે. આગામી 10 થી 12 જૂન વચ્ચે ચોમાસું મહારાષ્ટ્રમાં પ્રવેશી શકે છે તેવું મજબૂત અનુમાન છે. આ સિસ્ટમ આગળ વધતા 15 જૂનની આસપાસ ગુજરાતમાં પણ પ્રી-મોન્સૂન એક્ટિવિટી (ચોમાસા પહેલાનો વરસાદ) જોવા મળી શકે છે. આ દરમિયાન ખાસ કરીને દક્ષિણ ગુજરાતના વિસ્તારોમાં વરસાદ વરસી શકે છે.
આ પણ વાંચોઃ છેલ્લા 24 કલાકમાં અહીં તૂટી પડ્યો વરસાદ! ગુજરાતમાં ચોમાસું ક્યારે બેસશે? હવામાન વિભાગે જાહેર કરી તારીખ
18 થી 28 જૂન વચ્ચે મેઘમહેર થશે
ગુજરાતના ખેડૂતો અને સામાન્ય નાગરિકો માટે સારા સમાચાર એ છે કે ભલે વેસ્ટર્ન ડિસ્ટર્બન્સની અસર જોવા મળે, પરંતુ જૂન મહિનાના અંત સુધીમાં વાતાવરણ વરસાદ માટે એકદમ સાનુકૂળ બની જશે. અંબાલાલ પટેલના અનુમાન મુજબ 18 થી 28 જૂનનો સમયગાળો ગુજરાત માટે ઘણો સારો રહેશે અને આ દિવસો દરમિયાન રાજ્યમાં સારો વરસાદ વરસવાની શક્યતાઓ છે.
આ પણ વાંચોઃ આવતીકાલનું હવામાનઃ આગામી 21 કલાકમાં 15 રાજ્યોમાં તૂટી પડશે વરસાદ; 90 ની ઝડપે ફૂંકાશે વાવાઝોડું