મોરબીના મહેન્દ્રનગર ખાતે આવેલ બેંક ઓફ બરોડા બેંકમાં મોઢે રૂમાલ બાંધેલ અને પિસ્તોલથી સજજ છ જેટલા શખ્સો અંદર ઘુસ્યા હતા અને આ ગુનેગારોએ બેંકમાં હાજર ગ્રાહકોના ચાર જેટલા મોબાઈલ ઝુંટવી લીધા હતા. ત્યાર બાદ સિક્યુરિટી ગાર્ડને માર મારી તેની ગન પણ પડાવી લીધી બાદમાં બેંકના કેશિયર અને આ જ બેંકમાં બેસતી દેનાબેંકના કેશિયરને માર મારી તેમની પાસેથી 6.09 લાખની રોકડની લુંટ ચલાવી હતી અને બાદમાં બહાર રહેલ સ્વીફ્ટ કારમાં હળવદ તરફ ભાગી ગયા હતાં.
આ ઘટનાની જાણ થતાં જ મોરબી પોલીસનો કાફલો ઘટનાસ્થળે દોડી આવ્યો હતો. ત્યાર બાદ સમગ્ર જિલ્લામાં એલર્ટ કરીને નાકાબંધી કરીને દેવામાં આવી હતી. આ ઉપરાંત હળવદ અને માળિયાના ગામડાંઓને પણ એલર્ટ કરી દેવામાં આવ્યાં હતાં. જોકે બાતમી મળતાં આ લુંટારા હળવદના ચુપણી ગામ નજીક ખેતરમાં ગ્રામજનો વચ્ચે ફસાઈ ગયા હતાં. પોલીસને જાણ કરતાં જ પોલીસ ચુપણી ગામે પહોંચી હતી અને સમગ્ર વિસ્તારને કોર્ડન કરીને મકાઈના ખેતરમાં સંતાઈ ગયેલા આરોપીઓને ઝડપી પાડ્યાં હતાં.
પોલીસે ગ્રામજનોની મદદ સાથે 6માંથી 4 જેટલા આરોપીને બે પિસ્તોલ અને એક બંદુક સાથે ઝડપી લીધા હતા જ્યારે બે ફરાર છૂટ્યા હતા. જોકે મહત્વની વાત એ છે કે બેંકમાંથી લુંટવામાં આવેલ 6.10 લાખની રકમ ભરેલ બેગ પણ મળી આવી હતી.