ભારતીય હવામાન વિભાગ (IMD)ની વેબસાઈટ પ્રમાણે, અમદાવાદમાં સોમવારે મહત્તમ તાપમાન 28.4 ડિગ્રી સેલ્સિઅસ જ્યારે લઘુત્તમ તાપમાન 13.6 ડિગ્રી સેલ્સિઅસ નોંધાયું હતું. જે અનુક્રમે સરેરાશ કરતાં 0.7 અને 0.8 ડિગ્રી વધારે હતું. આજે પણ દિવસ દરમિયાન 15 ડિગ્રી તાપમાન રહેશે તેવું અનુમાન છે.
IMDના જણાવ્યું પ્રમાણે, અચાનક પવનની દિશા બદલાતા તાપમાનમાં વધારો થયો છે. આજે અને આવતીકાલે એટલે મંગળવાર અને બુધવાર લઘુત્તમ તાપમાનમાં કોઈ ફેરફાર થાય તેવી સંભાવના નથી. આ શિયાળામાં રાજ્યમાં તાપમાનમાં ચક્રીય વલણ જોવા મળ્યું છે.
દરિયાકિનારે આવેલા વિસ્તારોમાં પણ લઘુત્તમ તાપમાન 10 ડિગ્રી કરતાં વધારે નોંધાયું છે. ઉત્તર અને મધ્ય ગુજરાતમાં 10.8 ડિગ્રી સાથે ડીસા સૌથી વધારે ઠંડુ હતું. જ્યારે અમદાવાદમાં 13.6, વલ્લભવિદ્યા નગરમાં 13.6 અને ગાંધીનગરમાં 14 ડિગ્રી સેલ્સિઅસ તાપમાન નોંધાયું હતું.