ઈતિહાસમાં પહેલી વખત દ્વારકાધીશ મંદિર પર 56 ગજની બે ધજા ફરકતી જોવા મળી હતી. આવું દ્વારકાધીશ મંદિરમાં પહેલા ક્યારેય બન્યું નથી. આ બે ધજાઓને જોઈને પહેલા તો લોકોને એવું લાગ્યું કે, ‘વાયુ’ વાવાઝોડાથી દ્વારકાને બચાવવા આ બે ધજા લગાવાઈ હશે, પણ એવું ન હતું.
વાત એમ છે કે, ‘વાયુ’ વાવાઝોડાને પગલે દ્વારકામાં વરસાદ વરસી રહ્યો છે અને દ્વારકાનો દરિયો તો ગાંડોતૂર બન્યો છે, ત્યારે ધ્વજદંડ પર અગાઉથી લગાવાયેલી ધજાને ઉતારવા મંદિરના શિખર પર ચડવાનું રિસ્ક કોઈ લેવા તૈયાર ન હતું અને બીજા એક શ્રદ્ધાળુની ધજા પણ ચડાવવાની હતી, એટલે મંદિરના વહીવટી તંત્રએ નક્કી કર્યું કે, પહેલી ધજા ઉતાર્યા વિના જ બીજી ધજા પણ લગાવી દેવામાં આવે. એ જ કારણથી દ્વારકાધીશ મંદિર પર બે ધજા લગાવવામાં આવી હતી, તે સિવાય બીજું કોઈ કારણ ન હતું.