ગૃહરાજ્યપ્રધાન હર્ષ સંઘવીના પુત્રનો વિડીયો સોશિયલ મીડિયામાં ખુબ વાયરલ થયો છે. આ વિડીયો મંત્રી હર્ષ સંઘવીએ પોતે પોતાના સોશિયલ મીડિયા હેન્ડલ પરથી પોસ્ટ કર્યો છે. આ વિડીયોમાં હર્ષ સંઘવીનો પુત્ર એક ગુજરાતી રેપ સોંગ ગાતો નજરે પડે છે. વિડીયો સાથે હર્ષ સંઘવીએ લખ્યું છે, “ Can't be more proud..My Son Aarush’s rap is true in every way. ગુજરાતી છું .. ગુજરાતી રહીશ”
હર્ષ સંઘવીના પુત્રના આ વિડીયો પર પણ રાજકારણ શરૂ થઇ ગયું છે. આમ આદમી પાર્ટીના પ્રદેશ અધ્યક્ષ ગોપાલ ઈટાલીયાએ આ અંગે લખ્યું છે -
"હેલો બેટા!!
તું અમેરિકા જઈશ, થેપલા ખાઈ, દુનિયાની સારી સારી હોટલમાં જઈશ એ બધું તો ઠીક છે પણ ગુજરાતની સરકારી શાળામાં ભણીશ કે નહિ??
સરકારી નોકરીની લાઈનમાં લાગીશ કે નહીં?
આવકના કે જાતિના દાખલા કઢાવવા સરકારી કચેરીના ધક્કા ખાઈશ કે નહિ??
કે પછી બાપા મંત્રી છે એટલે આમ જ મોજ કરીશ??"
હર્ષ સંઘવીના પુત્રના વિડીયો પર આવી રીતે લખી રાજકારણ કરનાર ગોપાલ ઈટાલીયાને પણ યુઝર્સ જવાબ આપી રહ્યાં છે. એક યુઝરે લખ્યું -
“કોઈ ના પરિવાર પર આવી ટિપ્પણી ના કરાય ગોપાલભાઈ... આજે તમે કરશો તો કાલે કોઈ બીજું તમારા પર કરશે અને આવનારા સમયમાં એક આખો ચીલો ચિતરાઈ જશે એટલે મહેરબાની કરીને રાજનીતિનું લેવલ સાવ નીચે ના લાવશો..”
બીજા એક યુઝરે લખ્યું -
“તમને શું આવી ભાષા લખવી શોભે છે ગોપાલભાઈ?, આજ વસ્તુ નેતા થઈ ને ખુબજ સારી રીતે લખી શકતા હતા અને આ બાળક ની પોતાની મસ્તી છે ને એમાં રાજકારણ લાવી ને આટલી નીચી કક્ષાની કૉમેન્ટ તમે કરો એની અપેક્ષા નહોતી ધારી, સોરી પણ લખવું જરૂરી હતું”
શું કહ્યું હર્ષ સંઘવીએ ?
આ સમગ્ર મામલે પ્રતિક્રિયા આપતા ગૃહરાજ્યમંત્રી હર્ષ સંઘવીએ કહ્યું, “ મને મારા પુત્ર પર ગર્વ છે. બીજા કોઈએ એ કરેલી આલોચના અંગે હું ટિપ્પણી ન કરી શકું” હર્ષ સંઘવીએ મુકેલા તેના પુત્રના વિડીયોને 7000 થી વધુ લોકોએ પસંદ કર્યો છે અને 900 થી વધુ લોકોએ શેર કર્યો છે.