South Gujarat Rain Forecast: ગુજરાતમાં અત્યારે ચોમાસું જામ્યું છે ત્યારે હવામાન વિભાગે આગામી 2 દિવસ દક્ષિણ ગુજરાતમાં ભારેથી અતિભારે વરસાદની આગાહી કરી છે. વેલમાર્ક લો પ્રેશર અને ત્રણ ટ્રફ એકસાથે સક્રિય થતાં મેઘરાજા રૌદ્ર સ્વરૂપ બતાવી શકે છે. તો બીજી તરફ, જાણીતા હવામાન નિષ્ણાત અંબાલાલ પટેલે આગાહી કરી છે કે આવતીકાલથી વરસાદનું જોર ઘટશે, પરંતુ જુલાઈના મધ્યમાં ફરી નવી સિસ્ટમ બનશે અને ઓગસ્ટ-સપ્ટેમ્બરમાં અલનીનોની અસર જોવા મળી શકે છે.
દક્ષિણ ગુજરાતમાં મેઘરાજાની ધમાકેદાર એન્ટ્રી: ક્યાં કેવું એલર્ટ?
હવામાન વિભાગની લેટેસ્ટ માહિતી મુજબ, આજે દક્ષિણ ગુજરાતના નવસારી, વલસાડ અને ડાંગની સાથે સંઘ પ્રદેશ દમણ અને દાદરાનગર હવેલીમાં અતિભારે વરસાદની શક્યતા હોવાથી 'ઓરેન્જ એલર્ટ' જાહેર કરવામાં આવ્યું છે. જ્યારે સુરત, તાપી, ભાવનગર, બનાસકાંઠા અને સાબરકાંઠા જિલ્લામાં આજે વરસાદ માટે 'યલો એલર્ટ' અપાયું છે. આવતીકાલની વાત કરીએ તો તાપી, નવસારી, ડાંગ, વલસાડ અને સંઘ પ્રદેશોમાં યલો એલર્ટ રહેશે.
ક્યાં કેટલો વરસાદ અને શું છે ચેતવણી?
રાજ્યના વરસાદના આંકડા પર નજર કરીએ તો, અત્યાર સુધીમાં ચોમાસાની સિઝનનો સરેરાશ કરતાં 6 ટકા ઓછો વરસાદ નોંધાયો છે. કચ્છ અને સૌરાષ્ટ્રમાં 18 ટકાની ઘટ છે, જ્યારે દક્ષિણ ગુજરાતમાં મેઘરાજા મહેરબાન રહ્યા છે અને ત્યાં સરેરાશ કરતાં 4 ટકા વધુ વરસાદ ખાબક્યો છે.
ભારે વરસાદની આગાહીને પગલે દરિયાકાંઠાના વિસ્તારોના લોકોને સાવચેત રહેવા વહીવટી તંત્ર દ્વારા જણાવાયું છે. દરિયામાં ભારે પવન ફૂંકાવાની પૂરેપૂરી શક્યતા હોવાથી માછીમારોને આગામી 5 દિવસ સુધી દરિયો ન ખેડવાની કડક સૂચના આપવામાં આવી છે.
આ પણ વાંચોઃ ગુજરાતમાં ભારે વરસાદ: CM ભૂપેન્દ્ર પટેલ એક્શનમાં, આવતીકાલે સુરત અને વલસાડની લેશે મુલાકાત
હવામાન નિષ્ણાત અંબાલાલ પટેલનું શું છે અનુમાન?
બીજી તરફ, હવામાન નિષ્ણાત અંબાલાલ પટેલે પણ વરસાદને લઈને પોતાનું મહત્વનું અનુમાન વ્યક્ત કર્યું છે. તેમના જણાવ્યા અનુસાર, આજે મધ્ય અને ઉત્તર ગુજરાતના કેટલાક છૂટાછવાયા વિસ્તારોમાં વરસાદ વરસી રહ્યો છે. જોકે, રાહતની વાત એ છે કે આવતીકાલથી વરસાદનું જોર ઘટશે અને આકાશમાં ઉઘાડ નીકળવાની પૂરી શક્યતા છે.
પરંતુ આ વિરામ લાંબો સમય નહીં ટકે. અંબાલાલ પટેલનું કહેવું છે કે 13 અને 14 જુલાઈની આસપાસ બંગાળના ઉપસાગરમાં એક નવી વરસાદી સિસ્ટમ બનવા જઈ રહી છે. આ નવી સિસ્ટમની અસરથી 17 થી 20 જુલાઈ વચ્ચે રાજ્યના વિવિધ જિલ્લાઓમાં ફરીથી સારો વરસાદ જોવા મળી શકે છે. આ ઉપરાંત, ઓગસ્ટ મહિનાના પ્રથમ સપ્તાહમાં પણ વરસાદી માહોલ રહેવાની સંભાવના છે.
જોકે, ખેડૂતો અને સામાન્ય નાગરિકો માટે ચિંતાનો વિષય એ છે કે ઓગસ્ટ અને સપ્ટેમ્બર મહિનામાં વરસાદ પર 'અલનીનો'ની (El Nino) અસર જોવા મળી શકે છે, જેનાથી વરસાદ પર બ્રેક વાગી શકે છે. અંબાલાલ પટેલે એવી પણ આશંકા વ્યક્ત કરી છે કે 13 સપ્ટેમ્બર પછી રાજ્યમાં આકરી ગરમી પડવાની શરૂઆત થઈ શકે છે.
આ પણ વાંચોઃ ગુજરાતમાં આગામી 3 કલાક અતિભારે: 10 જિલ્લામાં રેડ એલર્ટ, અમદાવાદમાં પણ ધોધમારની આગાહી