Gujarat Weather: આકરા તાપમાં શેકાવવા તૈયાર રહો, આજે આ 9 જિલ્લામાં ગરમીનું 'રેડ એલર્ટ'

Gujarat Weather: રાજ્યમાં ગરમીનો પારો સતત વધી રહ્યો છે. ઉનાળાની શરૂઆતમાં જ ગરમીએ કહેર વર્તાવવાનું શરૂ કરી દીધુ છે

Gujarat Weather: માર્ચ મહિનામાં જ ગુજરાતમાં મે મહિના જેવી ગરમીની શરૂઆત થઇ ચૂકી છે. રાજ્યના અનેક જિલ્લાઓમાં ગરમીનો પ્રકોપ સતત વધી રહ્યો છે. લોકો ગરમીથી ત્રાહિમામ પોકારી ઉઠ્યા છે, ત્યારે આ બધાની વચ્ચે વધુ એક મોટું અપડેટ સામે આવ્યુ છે. આજે 9 જિલ્લામાં ગરમીનું રેડ એલર્ટ આપવામાં આવ્યુ છે. હવામાન વિભાગે લોકોને સતર્ક રહેવા અને કામ સિવાય ઘરની બહાર ના નીકળવા સૂચન કર્યુ છે. રાજ્યમાં ગરમીનો પારો 42 થી 43 ડિગ્રી સુધી જઇ શકે છે. 

રાજ્યમાં ગરમીનો પારો સતત વધી રહ્યો છે. ઉનાળાની શરૂઆતમાં જ ગરમીએ કહેર વર્તાવવાનું શરૂ કરી દીધુ છે. હવામાન વિભાગ અનુસાર, ગુજરાતીઓને હવે આકારા તાપનો સામનો કરવા તૈયાર રહેવું પડશે. આજે આકરા તાપનું ટૉર્ચર સહન તૈયાર રહેજો, કેમકે રાજ્યના 9 જિલ્લામાં આજે ગરમીનું રેડ એલર્ટ આપવામાં આવ્યુ છે. હવામાન વિભાગ અનુસાર, આજે અમદાવાદમાં 42 તો સૌરાષ્ટ્રમાં 43 ડિગ્રીએ સુધી ગરમીનો પારો ઉંચો જઇ શકે છે. અને હજુ આગામી બે દિવસ આકરી ગરમીથી રાહતની કોઈ શક્યતા દેખાતી નથી. અમદાવાદ, સુરત, રાજકોટ, કચ્છ, મોરબીમાં રેડ એલર્ટ આપવામાં આવ્યુ છે, આ ઉપરાંત સુરેન્દ્રનગર, ગાંધીનગર, જૂનાગઢ, પોરબંદરમાં પણ ગરમીનું રેડ એલર્ટ છે, ઓવરઓલ રાજ્યમાં ગરમી કહેર વર્તાવશે.

હવામાન વિભાગ દ્વારા જાહેર કરવામાં આવેલી આગાહી અનુસાર, આવતીકાલે એટલે કે ૧૧ માર્ચ, ૨૦૨૫ના રોજ કચ્છ, મોરબી, ગાંધીનગર, સુરેન્દ્રનગર, અમદાવાદ, રાજકોટ, પોરબંદર, જૂનાગઢ અને સુરત જિલ્લામાં હીટવેવની ગંભીર અસર જોવા મળશે અને રેડ એલર્ટ જાહેર કરવામાં આવ્યું છે. આ વિસ્તારોમાં તાપમાન ખૂબ જ ઊંચું રહેવાની સંભાવના છે. આ ઉપરાંત, ૧૨ માર્ચના રોજ બનાસકાંઠા, રાજકોટ, કચ્છ અને સુરેન્દ્રનગર જિલ્લામાં હીટવેવ માટે ઓરેન્જ એલર્ટ આપવામાં આવ્યું છે. સૌરાષ્ટ્ર, કચ્છ, દક્ષિણ ગુજરાત અને દરિયાકાંઠાના વિસ્તારોમાં ઉષ્ણ લહેરની ચેતવણી પણ આપવામાં આવી છે, જ્યાં ગરમ અને ભેજવાળું હવામાન રહેવાની આગાહી છે. હવામાન વિભાગના જણાવ્યા અનુસાર, આગામી ૨-૩ દિવસ સુધી તાપમાનનો પારો ૪૦ થી ૪૨ ડિગ્રી સેલ્સિયસ સુધી પહોંચી શકે છે. છેલ્લા ૨૪ કલાકમાં સૌરાષ્ટ્રના રાજકોટ જિલ્લામાં તીવ્ર ગરમી અનુભવાઈ હતી, જ્યારે સુરેન્દ્રનગર અને કચ્છ જિલ્લાના કેટલાક વિસ્તારોમાં ગરમીનું મોજું ફરી વળ્યું હતું.

આ ઉપરાંત આગાહીકાર પરેશ ગોસ્વામી આગાહી કરતાં જણાવે છે કે, પવનની સ્પીડ નોર્મલ કરતાં ત્રણ પોઈન્ટ વધારે ચાલી રહી છે. એક અઠવાડિયા માટે પવનની ગતિ આટલી જ રહેવાની શક્યતા છે. રાજ્યના મોટાભાગના વિસ્તારોમાં ઉત્તર પશ્ચિમના પવનો ફૂંકાઈ શકે છે. એટલે કે પવનની દિશા અને ગતિ નોર્મલ નજીક રહે તેવી શક્યતાઓ છે. ખેડૂતોએ 15મી માર્ચ સુધી ઉનાળુ પાકનું વાવેતર કરી દેવું જોઈએ. તેનાથી મોડું વાવેતર કરવું જોઈએ નહીં. મહત્તમ તાપમાન થોડું ઊંચુ ગયું હતુ. પરંતુ ફેબ્રુઆરીમાં ઉનાળાની શરૂઆત થઈ ગઈ હોય તેવું અનુભવાયું નથી. માર્ચ મહિનાના પહેલા સપ્તાહમાં પણ ઉનાળાની કોઈ મોટી ઝલક જોવા નહીં મળે. લઘુત્તમ અને મહત્તમ તાપમાન વધ્યું છે. આ સપ્તાહમાં ભયંકર ગરમી પડે તેવા કોઈ એંધાણ નથી.

હીટવેવથી થતી અસરો - 
હીટવેવના કારણે શરીરમાં ગરમી સંબંધિત બીમારીઓ થવાનું જોખમ વધી જાય છે. ખાસ કરીને જે લોકો લાંબા સમય સુધી તડકામાં રહે છે અથવા શારીરિક શ્રમનું કામ કરે છે તેઓ વધુ જોખમમાં હોય છે. હીટવેવની અસરથી થાક લાગવો, ચક્કર આવવા, માથાનો દુખાવો, ઉલટી થવી અને બેહોશી જેવી સમસ્યાઓ થઈ શકે છે. બાળકો, વૃદ્ધો અને ક્રોનિક રોગો ધરાવતા લોકો માટે હીટવેવ વધુ જોખમી સાબિત થઈ શકે છે.

હીટવેવથી બચવા માટે શું કરશો ?
બને ત્યાં સુધી ગરમીમાં બહાર જવાનું ટાળો.
પુષ્કળ પ્રમાણમાં પાણી પીવો, તરસ ન લાગે તો પણ પાણી પીતા રહો.
શરીરને હાઇડ્રેટેડ રાખવા માટે ORS, લસ્સી, તોરાણી, લીંબુ પાણી અને છાશ જેવા ઘરે બનાવેલા પીણાં પીવો.
હળવા રંગના અને ઢીલા કપડાં પહેરો.
સીધા સૂર્યપ્રકાશથી બચવા માટે છત્રી અથવા ટોપીનો ઉપયોગ કરો.
રાજ્યમાં છેલ્લા 24 કલાકમાં ક્યાં કેટલું તાપમાન

રાજ્યમાં છેલ્લા ૨૪ કલાકમાં સૌથી વધુ મહત્તમ તાપમાન રાજકોટમાં ૪૧.૧ ડિગ્રી સેલ્સિયસ નોંધાયું હતું, જ્યારે સૌથી ઓછું લઘુતમ તાપમાન નલિયામાં ૧૬.૮ ડિગ્રી સેલ્સિયસ નોંધાયું હતું. અન્ય શહેરોમાં નોંધાયેલું મહત્તમ તાપમાન આ પ્રમાણે છે: અમદાવાદમાં ૩૮ ડિગ્રી, ગાંધીનગરમાં ૩૯.૨ ડિગ્રી, સુરેન્દ્રનગરમાં ૪૦.૫ ડિગ્રી, વડોદરામાં ૩૮.૪ ડિગ્રી, અને સુરતમાં ૩૮.૭ ડિગ્રી સેલ્સિયસ. જ્યારે લઘુતમ તાપમાન ગાંધીનગરમાં ૧૮.૫ ડિગ્રી, અમદાવાદમાં ૨૦.૮ ડિગ્રી, સુરેન્દ્રનગરમાં ૨૨ ડિગ્રી, રાજકોટમાં ૨૦.૫ ડિગ્રી, વડોદરામાં ૨૧.૮ ડિગ્રી, અમરેલીમાં ૨૦ ડિગ્રી અને ભાવનગરમાં ૨૧ ડિગ્રી સેલ્સિયસ નોંધાયું હતું.

આ પણ વાંચો