અરવલ્લી : હવામાન વિભાગની આગાહી વચ્ચે આજે સવારથી જ અરવલ્લી જિલ્લામાં ભારે વરસાદ વરસ્યો છે. અરવલ્લી જિલ્લામાં અનરાધાર વરસાદ વરસ્યો છે. મોડાસા સહિત ધનસુરા, બાયડ, માલપુર, ભીલોડા અને મેઘરજમાં જળબંબાકારની સ્થિતિ સર્જાઈ છે. બપોરના 4 વાગ્યા સુધીમાં ધનસુરામાં સાડા ચાર ઈંચ વરસાદ ખાબક્યો છે. મોડાસામાં 4 ઈંચ વરસાદ વરસ્યો છે. બાયડમાં સાડા ત્રણ ઈંચ વરસાદ વરસ્યો છે. માલપુરમાં પોણા બે ઈંચ વરસાદ વરસ્યો છે. મેઘરજમાં દોઢ ઈંચ વરસાદ વરસ્યો છે. ભારે વરસાદના કારણે જિલ્લામાં જળબંબાકારની સ્થિતિ સર્જાઈ છે. ગ્રામ્ય વિસ્તારો પણ પાણીમાં ગરકાવ થયા હતા.
મૂશળધાર વરસાદને લઈ મોડાસા ચાર રસ્તા હંગામી બસ સ્ટેશન સહિતના વિસ્તારમાં પાણી ભરાયા છે. મોડાસાના માર્કેટ યાર્ડમાં પણ વરસાદી પાણી ફરી વળ્યા છે. યાર્ડની દુકાનોમાં વરસાદી પાણી ઘૂસી જતાં વેપારીઓ મુશ્કેલીમાં મુકાયા હતા. મોડાસાના મેઘરજ રોડ પર પાણી ભરાતા વાહનચાલકો અને રાહદારીઓને ભારે હાલાકીનો સામનો કરવો પડ્યો છે. જાણે નદીમાંથી વાહનો પસાર થતાં હોય તેવા દ્રશ્યો સર્જાયા હતા.
મૂશળધાર વરસાદને લઈ મોડાસાની રામ પાર્ક, બદ્રીનાથ અને કેદારનાથ સોસાયટીમાં પાણી ભરાતા રહીશોને હાલાકી પડી હતી. ધનસુરા શહેર અને તાલુકાના ગામો પણ જળબંબાકાર થયા છે. ધનસુરાના બસ સ્ટેશનમાં પાણી ભરાયા છે. મુખ્ય બજારમાં નદીની જેમ પાણી વહેતા થયા હતા.
ઉત્તર ગુજરાત અને સૌરાષ્ટ્ર-કચ્છને લઈ હવામાન વિભાગની મોટી આગાહી
રાજ્યમાં મેધરાજા મન મૂકીને વરસી રહ્યા છે. હવામાન વિભાગના જણાવ્યા અનુસાર આજે ઉત્તર ગુજરાત જળબંબાકાર થશે. સાથે જ સૌરાષ્ટ્ર-કચ્છમાં પણ મન મૂકીને મેઘરાજા વરસશે. હવામાન વિભાગના મતે આજે મહેસાણા, મહીસાગર, અરવલ્લી, સાબરકાંઠા, બનાસકાંઠા, પાટણ, અમદાવાદ, ગાંધીનગર, સુરેન્દ્રનગર, પોરબંદર, જૂનાગઢ, મોરબી, ગીર સોમનાથ, કચ્છ, સુરત, વલસાડ અને નવસારી જિલ્લામાં મૂશળધાર વરસાદ વરસશે.
12 જુલાઈના અમરેલી, ભાવનગર, સુરત, નવસારી, વલસાડ, અને ભરૂચ જિલ્લામાં ભારે વરસાદની આગાહી કરવામાં આવી છે. 13 જુલાઈના ગીર સોમનાથ, અમરેલી, ભાવનગર, સુરત, ડાંગ, નવસારી, છોટાઉદેપુર અને દાહોદમાં ધોધમાર વરસાદની આગાહી હવામાન વિભાગ દ્વારા કરવામાં આવી છે. હવામાન વિભાગના જણાવ્યા અનુસાર 14 જુલાઈના રોજ અમરેલી, ભાવનગર, સુરત, નવસારી, ડાંગ, વલસાડ અને નર્મદા જિલ્લામાં ભારે વરસાદ પડી શકે છે.
Join Our Official Telegram Channel: