Junagadh Rain: ગુજરાતમાં છેલ્લા બે-ત્રણ દિવસથી વરસાદ મન મૂકીને વરસી રહ્યો છે. તાજા અપડેટ પ્રમાણે, ગઇકાલથી અત્યાર સુધી જુનાગઢમાં સૌથી વધુ વરસાદ ખાબક્યો છે, અને જિલ્લામાં ચારેયકોર પાણી પાણી જેવી સ્થિતિ સર્જાઇ છે. છેલ્લા 24 કલાકમાં 14 ઇંચથી પણ વધુ વરસાદ પડવાથી જિલ્લાના મોટા ભાગના ગામડાઓ બેટમાં ફેરવાયા છે.
જુનાગઢમાં ભારે વરસાદથી શહેર અને ગામડાઓની સ્થિતિ દયાજનક બની છે, હાલમાં મોટાભાગના ગામડાઓમાં પાણી ભરાયા છે. જિલ્લામાં લગભગ ચારેયકોર પાણી-પાણીની સ્થિતિ છે. જિલ્લામાં છેલ્લા 24 કલાકમાં 14 ઇંચથી પણ વધુ સરેરાશ વરસાદ પડ્યો છે. તાજા અપડેટ પ્રમાણે, છેલ્લા 24 કલાકમાં જુનાગઢના વંથલીમાં સાડા 14 ઈંચ વરસાદ ખાબક્યો છે, આ ઉપરાંત જિલ્લાના અન્ય સ્થળોએ જેમાં વિસાવદરમાં સાડા 13 ઈંચ વરસાદ, જૂનાગઢમાં 12 ઈંચ વરસાદ, જૂનાગઢ શહેરમાં 12 ઈંચ વરસાદ, કેશોદમાં 14 ઈંચ, ભેસાણમાં 7 ઈંચ વરસાદ, માળિયા હાટીનામાં સાડા 6 ઈંચ વરસાદ અને જૂનાગઢના માંગરોળમાં સાડા 4 ઈંચ વરસાદ ખાબક્યો છે.
આ 10 જિલ્લામાં ધડબડાટી બોલાવશે વરસાદ, હવામાન વિભાગે રેડ એલર્ટ આપ્યું
હવામાન વિભાગે ગુજરાતના વિવિધ જિલ્લાઓમાં વરસાદની આગાહી સાથે એલર્ટ જાહેર કર્યા છે.
રેડ એલર્ટ: કચ્છ, દ્વારકા, જામનગર, પોરબંદર, જૂનાગઢ, સુરત, નવસારી, દમણ, દાદરા નગર હવેલી અને વલસાડમાં છૂટાછવાયા સ્થળોએ અત્યંત ભારે વરસાદની શક્યતા.
ઓરેન્જ એલર્ટ: રાજકોટ, મોરબી, અમરેલી, ગીર સોમનાથ, ભાવનગર, ભરૂચ, વડોદરા, પંચમહાલ, દાહોદ, છોટા ઉદેપુર, નર્મદા, તાપી, ડાંગ, બનાસકાંઠા અને પાટણમાં છૂટાછવાયા સ્થળોએ ભારેથી અતિ ભારે વરસાદની આગાહી.
યલો એલર્ટ: સુરેન્દ્રનગર, બોટાદ, અમદાવાદ, ગાંધીનગર, મહેસાણા, ખેડા, આણંદ, મહીસાગર, અરવલ્લી, સાબરકાંઠા અને દીવમાં છૂટાછવાયા સ્થળોએ ભારે વરસાદની સંભાવના.
નાગરિકોને સાવચેત રહેવાની અને સ્થાનિક સત્તાવાળાઓની સૂચનાઓનું પાલન કરવાની સલાહ આપવામાં આવે છે.
રાજ્યના 11 જિલ્લામાં આજે ગાજવીજ સાથે વરસાદની હવામાન વિભાગે આગાહી વ્યક્ત કરી છે. સૌરાષ્ટ્રના પાંચ અને દક્ષિણ ગુજરાતના છ જિલ્લામાં આજે ભારે વરસાદનું હવામાન વિભાગે અનુમાન વ્યક્ત કર્યું છે. સૌરાષ્ટ્રના દેવભૂમિ દ્વારકા, જામનગર, રાજકોટ, પોરબંદર, જૂનાગઢમાં ભારે વરસાદ વરસી શકે છે. તો આ તરફ વલસાડની સાથે સાથે સંઘ પ્રદેશ દમણ અને દાદરાનગર હવેલીમાં આજે વરસાદનું ઓરેન્જ એલર્ટ જાહેર કરવામાં આવ્યું છે. ઓરેન્જ એલર્ટ એ જિલ્લા માટે જાહેર કરવામાં આવતુ હોય છે જે જિલ્લામાં અઢીથી સવા ચાર ઈંચ વરસાદ વરસવાની શક્યતા હોય છે.