Gujarat Rain: રાજ્યમાં હાલ કોઈ વરસાદની સિસ્ટમ સક્રિય નથી, જાણો હવામાન વિભાગે વરસાદને લઈ શું કહ્યું ?

હવામાન વિભાગના જણાવ્યા અનુસાર રાજ્યમાં સામાન્ય વરસાદ વરસશે.  રાજ્યમાં સારા વરસાદ માટે રાહ જોવી પડશે.

ગાંધીનગર: રાજ્યના હવામાન વિભાગ દ્વારા વરસાદને લઈ આગાહી કરવામાં આવી છે. હવામાન વિભાગના જણાવ્યા અનુસાર રાજ્યમાં સામાન્ય વરસાદ વરસશે.  રાજ્યમાં સારા વરસાદ માટે રાહ જોવી પડશે.  હાલ કોઈ સિસ્ટમ સક્રિય નથી.  સામાન્ય વરસાદી ઝાપટા રહેવાની શક્યતા છે. 

હવામાન વિભાગના ડિરેક્ટર  મનોરમા મોહંતીના જણાવ્યા અનુસાર રાજ્યમાં આગામી પાંચ દિવસ સુધી ભારે વરસાદ થવાની કોઈ શક્યતા નથી. અમદાવાદ શહેરમાં વાદળછાયુ વાતાવરણ રહેશે. વરસાદની હાલ કોઈ શક્યતા નથી. રાજ્યમાં હાલ કોઈ વરસાદી સિસ્ટમ સક્રિય નથી. સાઉથ ગુજરાત રિઝન અને કોસ્ટલ સૌરાષ્ટ્રમાં પણ વરસાદની કોઈ શક્યતા નથી. આગામી એક સપ્તાહ સુધી ભારે વરસાદની કોઈ શક્યતા નથી.  

આ રાજ્યોમાં આગામી 5 દિવસ વરસાદ પડશે 

રાષ્ટ્રીય રાજધાનીમાં મંગળવારે, 22 ઓગસ્ટના રોજ હળવા વરસાદ સાથે વીજળી પડવાની સંભાવના છે. આ સિવાય 23 ઓગસ્ટ બુધવારે પણ ભારે વરસાદની સંભાવના છે. 24 ઓગસ્ટ, ગુરુવારથી હવામાન સાફ થવાની ધારણા છે, જેના કારણે તાપમાનમાં વધારો થઈ શકે છે. તેમજ મંગળવારે દિલ્હીનું મહત્તમ તાપમાન 36 ડિગ્રી સેલ્સિયસ અને લઘુત્તમ તાપમાન 27 ડિગ્રી સેલ્સિયસ રહેવાની ધારણા છે.

મધ્યપ્રદેશમાં પણ 15 ઓગસ્ટથી વરસાદની મોસમ શરૂ થઈ ગઈ છે. ચોમાસું ફરી એકવાર સક્રિય થવાને કારણે, મંગળવાર, 22 ઓગસ્ટના રોજ રાજ્યના ઘણા જિલ્લાઓમાં હળવાથી મધ્યમ વરસાદની અપેક્ષા છે. છત્તીસગઢમાં પણ વરસાદની સંભાવના છે.

હળવાથી મધ્યમ વરસાદની અપેક્ષા

મંગળવાર, 22 ઓગસ્ટના રોજ રાજસ્થાનના કેટલાક જિલ્લાઓમાં હળવાથી મધ્યમ વરસાદની અપેક્ષા છે. રાજ્યના જોધપુર, બિકાનેર, ઝાલાવાડ, પાલી સહિત અનેક વિસ્તારોમાં વીજળીના કડાકા સાથે હળવો વરસાદ પડી શકે છે. ઉત્તર પ્રદેશમાં છેલ્લા ઘણા દિવસોથી હળવો વરસાદ પડી રહ્યો છે, જેના કારણે રાજ્યમાં ભેજવાળી ગરમીએ લોકોને પરેશાન કરી દીધા છે.

હવામાન વિભાગના જણાવ્યા અનુસાર, ઉત્તરાખંડમાં હળવાથી મધ્યમ વરસાદની સંભાવના છે. રાજ્યમાં થઈ રહેલા ભૂસ્ખલનના કારણે ઘણા રસ્તાઓ બંધ થઈ ગયા છે. હવામાન વિભાગે મંગળવાર, 22 ઓગસ્ટના રોજ રાજ્યના ઘણા જિલ્લાઓમાં ભારે વરસાદની સંભાવના વ્યક્ત કરી છે, જેના કારણે રાજ્યના ઘણા જિલ્લાઓમાં યલો અને ઓરેન્જ એલર્ટ જારી કરવામાં આવ્યું છે.

IMD અનુસાર, આગામી પાંચ દિવસમાં પૂર્વોત્તર રાજ્યોમાં ભારે વરસાદની સંભાવના છે. આસામમાં ભારે વરસાદને કારણે ચેતવણી જારી કરવામાં આવી છે. રાજ્યમાં પૂર જેવી સ્થિતિ પણ સર્જાઈ શકે છે. ઉત્તર-પૂર્વના રાજ્યોમાં ઘણી જગ્યાએ ભારે વરસાદની સંભાવના છે.