Accident: સુરેન્દ્રનગરમાં લીંબડી-રાજકોટ હાઇવે પર પોલીસ વાનને અકસ્માત નડ્યો છે. જેમાં 6 વ્યક્તિ ઇજાગ્રસ થયા છે.બલદાણા ગામના પાટિયા પાસે પોલીસવાન અને ખાનગી લકઝરી બસ વચ્ચે અકસ્માત સર્જાયો હતો. જેમાં 2 મહિલા અને 4 પુરુષો મળી કુલ છ લોકો ઘાયલ થયા છે. ઇજાગ્રસ્તોને સારવાર અર્થે હોસ્પિટલ ખસેડવામાં આવ્યા છે.
પ્રાથમિક તપાસમાં નારી સંરક્ષણ ગૃહ રાજકોટથી અમદાવાદ હાઈ કોર્ટ ખાતે પોલીસવાન જઈ રહી હતી તે દરમિયાન અકસ્માત સર્જાયો હતો. અકસ્માતને પગલે હાઇવે પર ટ્રાફિક જામના દ્રશ્યો સર્જાયા હતા. પોલીસે ઘટના સ્થળે પહોંચી વધુ તપાસ હાથ ધરી છે.
કચ્છમાં 4.2ની તીવ્રતાનો ભૂંકપનો આંચકો, લોકો ઘરની બહાર દોડી આવ્યા
કચ્છમાં 4.2ની તીવ્રતાનો ભૂકંપનો આંચકો અનુભવાયો છે. ધડાકા સાથે આંચકો અનુભવાતા લોકો ઘરની બહાર દોડી આવ્યા.કચ્છના અનેક વિસ્તારોમાં આંચકા અનુભવાયા છે. ભૂકંપનું કેન્દ્ર બિંદુ દુધઈથી 11 કિલોમીટર દૂર નોંધાયું. આજે સવારના 6.38 મિનિટે આંચકો અનુભવાયો હતો. એક કલાકના સમયમાં કચ્છમાં બે આંચકા અનુભવાયા. સવારે 5.18 મિનિટે ખાવડા નજીક 3.2 નો આંચકો નોંધાયો હતો.
અમદાવાદમાં સવારથી ધુમ્મસ ભર્યું વાતાવરણ
અમદાવાદમાં સવારથી ધુમ્મસ ભર્યું વાતાવરણ છે. એસ.જી હાઇવે સહીત શહેરનાં રસ્તાઓ પર પણ ધુમ્મસ છે. ગાઢ ધુમ્મસ વાળા વાતાવરણથી વાહન ચાલકોએ લાઈટ ચાલું કરી કાળજીપૂર્વક વાહન ચલાવવા ની ફરજ પડી રહી છે. એક્સપ્રેસ હાઇવે અને NH 48 પર ધુમ્મસ વાળા વાતાવરણ કારણે વાહન ચાલકોએ સાવધાની પૂર્વક વાહન ચલાવવા માટે સૂચિત કરવામાં આવ્યાં છે. આ અંગે એક્સપ્રેસ હાઈવે ઓથોરિટી દ્વારા સૂચના જારી કરવામાં આવી છે. મહેસાણાના ઉંઝા હાઇવે પર ગાઢ ધુમ્મસ છવાયું છે. જિલ્લામાં વાદળછાયા વાતાવરણ સાથે ધુમ્મસ છવાયું છે. જેના કારણે અમદાવાદ - પાલનપુર હાઈવે પર વાહન ચાલકો ધીમી ગતિએ વાહન ચલાવવા મજબૂર થયા છે. હવામાન વિભાગની આગાહી મુજબ, સોમવારે બપોર પછી સાઇક્લોનિક સર્ક્યુલેશનની અસર દૂર થતાં વાદળાં વિખરાશે. આ સાથે લઘુતમ તાપમાનમાં પણ બેથી ત્રણ ડીગ્રીનો ઘટાડો થઈ શકે છે. રવિવારે અમદાવાદનું મહત્તમ તાપમાન 27.5 ડીગ્રી રહ્યું હતું, જ્યારે લઘુતમ તાપમાન 4.5 ડીગ્રી વધી 17.4 નોંધાયું હતું. જોકે વાતાવરણમાં ભેજનું પ્રમાણ સવારે 77 ટકા અને સાંજે 64 ટકા હતું.
જુનિયર કલાર્ક પેપર લીકકાંડમાં જીત નાયકને અમદાવાદ લાવવામાં આવ્યો, તમામ આરોપીને આજે કોર્ટમાં કરાશે રજૂ
રાજ્યમાં ગુજરાત પંચાયત સેવા પસંદગી મંડળ દ્વારા જુનિયર ક્લાર્કની ભરતી માટે રવિવારે યોજાનારી પરીક્ષાનું પેપર વડોદરાથી લીક થતાં પરીક્ષા રદ્દ કરવામાં આવ હતી. જેના કાણે 9 લાખથી વધુ ઉમેદવારો રઝળી પડ્યા હતા. આજે વહેલી સવારે જુનિયર ક્લાર્ક પેપર લીક કાંડના આરોપી જીત નાયકને હૈદરાબાદથી અમદાવાદ એટીએસ હેડક્વાર્ટર લવાયો હતો. જીત નાયક હૈદરાબાદના પ્રિન્ટિંગ પ્રેસ કે.એલ.હાઇટેકનો કર્મચારી છે. જીત નાયકે જ પેપર લીક કરીને પ્રદીપ નાયકને આપ્યું હતું. આજે તમામ આરોપીને કોર્ટમાં રજૂ કરીને રિમાન્ડ મેળવવામાં આવશે. રિમાન્ડ દરમિયાન કોની કોની સંડોવણી છે તે પણ સામે આવી શકે છે.
