ગુજરાત પોલીસ દળ વર્ગ- 3માં સબ ઈન્સ્પેક્ટર- PSIની ભરતીમાં કોરોનાના કારણે ફોર્મ ભરવાથી વંચિત રહી ગયેલા ઉમેદવારોને વધુ એક તક આપવામાં આવી છે. 31 માર્ચ, 2021 પછીના લાયક ઉમેદવારો કોરોનાના કારણે ફોર્મ ભરી શક્યા નહોતા. જેથી આવા ઉમેદવારો હવે 20 ઓક્ટોબર સુધી ફોર્મ ભરી શકે છે આ માટે પોર્ટલ પર ફરી રજિસ્ટ્રેશન સાઉટ ઓપન કરવામાં આવી છે.
અત્યાર સુધીમાં PSIની 1,382 જગ્યાઓ સામે 4 લાખ યુવાનોએ ઉમેદવારી કરી છે. આ અંગે આઈપીએસ હસમુખ પટેલે ટ્વીટ કર્યું છે. તેમણે એ પણ જાહેર કર્યું છે કે લોક રક્ષકની ટુંક સમયમાં જાહેરાત આપવામાં આવશે.
આ પહેલા 15મી માર્ચ 2021ના રોજ પીએસઆઈ ભરતીની જાહેરાત અપાઈ હતી. પરંતુ કોરોનાને કારણે પરીક્ષા મોકૂફ રખાઈ હતી. જે હવે ટૂંક સમયમાં લેવાશે. માર્ચ મહિનાની આ ભરતીમાં કોરોનાને કારણે જે યુવાનો અરજી કરવાની તક ચૂકી ગયા છે તેમને ઉમેદવારી કરવાની વધુ એક તક આપવા પોલીસ ભરતી બોર્ડે નિર્ણય કર્યો છે. આ સાથે જ 15 માર્ચ 2021ની ઉક્ત ભરતી માટે નવેમ્બર મહિનામાં ફિજિકલ ટેસ્ટના આયોજનની જાહેરાત થઈ છે.
ગુજરાતમાં આગામી દિવસોમાં શરૂ થનારી પોલીસ ભરતીને લઈ મહત્વના સમાચાર સામે આવ્યા હતા કે, પોલીસ સબ ઇન્સ્પેક્ટર (પોસઈ) , લોક રક્ષક દળની ભરતી માટે એક જ શારીરિક કસોટી લેવાશે. દિવાળી પછી નવેમ્બરમાં શારીરિક કસોટી યોજાશે. બંને માટે ફોર્મ ભરનાર ઉમેદવારોએ એક જ પરીક્ષા આપવાની રહેશે. ભરતી બોર્ડના અધ્યક્ષ હસમુખ પટેલે સોશિયલ મીડિયામા માહિતી આપી હતી.
રાજ્યમાં કાયદો અને વ્યવસ્થાની પરિસ્થિતિ વધુ સુદૃઢ બને તે માટે કોવિડના કારણે પેન્ડીંગ રહેલ પોલીસ વિભાગની ભરતીની કાર્યવાહી ઝડ૫થી થાય તે હેતુથી રાજ્યના મુખ્યમંત્રી ભૂપેન્દ્ર પટેલ દ્વારા રાજ્યના ગૃહ વિભાગ હસ્તક વિવિધ પોલીસ સંવર્ગની ૨૭૮૪૭ જગ્યાઓ ભરવાનો મહત્વનો નિર્ણય કરાયો છે, એમ ગૃહ રાજ્યમંત્રી હર્ષ સંઘવીએ જણાવ્યુ હતુ.
ગૃહ રાજ્ય મંત્રી સંઘવીએ ગૃહ મંત્રી તરીકેનો ચાર્જ સંભાળ્યા બાદ ટૂંકા સમયગાળામાં તા.૧૯.૯.ર૦ર૧ને રવિવારના રજાના દિવસે ભરતી બોર્ડના અઘ્યક્ષશ્રીઓ સાથે બેઠક યોજીને સવિસ્તૃત સમિક્ષા કરી હતી અને ભરતી પ્રક્રિયા ઝડ૫થી પૂર્ણ કરવા માટે તમામ ભરતી બોર્ડના અઘ્યક્ષોને જરૂરી આદેશો કર્યાં છે.
ગૃહ રાજ્યમંત્રી હર્ષ સંઘવીએ ઉમેર્યું કે, રાજયમાં બિન હથિયારી પોલીસ સબ ઈન્સ્પેક્ટર, હથિયારી પોલીસ સબ ઈન્સ્પેક્ટર(પ્લાટુન કમાન્ડર), ઈન્ટેલીજન્સ ઓફિસર, બિન હથિયારી આસિસ્ટન્ટ સબ ઈન્સ્પેક્ટર, લોકરક્ષક તથા મોટર ટ્રાન્સપોર્ટ અને વાયરલેસ જેવા ટેકનીકલ સંવર્ગોના પોલીસ સબ ઈન્સ્પેક્ટર અને ટેકનીકલ ઓપરેટર તથા હોમગાર્ડ્સ અને ગ્રામ રક્ષક દળ(માનદ)ની મળીને અંદાજીત ૨૭૮૪૭ જગ્યાઓ માટે ભરતીનુ આયોજન આગામી ૧૦૦ દિવસમાં કરવાનો રાજ્ય સરકારે મહત્વનો નિર્ણય કર્યો છે.
રાજ્ય સરકાર દ્વારા રાજ્યના શિક્ષિત યુવાઓને રોજગારી પ્રાપ્ત થાય તે માટે રોજગારીની નવી તકો ઉપલબ્ધ બનાવીને ખુબ જ ટૂંકા સમયગાળામાં ભરતી પ્રક્રિયાનુ આયોજન કરીને યુવાઓને રોજગારી આપવા રાજ્ય સરકાર હરહંમેશા કટિબદ્ધ છે. આ નિર્ણયના ફળ સ્વરૂપે રાજ્યમાં કાયદો અને વ્યવસ્થાની પરિસ્થિતિ વધુ સુદૃઢ બનશે તેમજ આ ભરતીને લીધે પોલીસ દળમાં વધુ સંખ્યામાં કર્મચારીઓ ઉપ્લબ્ધ થવાથી ગુજરાતના નાગરિકોને વધુ સારી પોલીસ સેવા પ્રાપ્ત થશે અને રાજ્યની સુરક્ષામાં વધારો કરવા માટેના રાજ્ય સરકારના પગલાઓ વધુ બળવત્તર બનશે.