રવિવારે આખો દિવસ અમદાવાદ સહિત ગુજરાતના અનેક જગ્યાએ ઠંડા પવનો ફૂંકાયા હતા. વહેલી સવારે અને મોડી રાત્રે ઠંડીનો ચમકારો વધ્યો છે. દિવસ દરમિયાન ઠંડો પવન ફૂંકાતા લોકોએ સ્વેટર પહેરીને ઘરની બહાર નીકળવું પડ્યું હતું.
હવામાન વિભાગે ઠંડીને લઈને આગાહી કરી છે કે, આગામી દિવસોમાં ગુજરાતમાં ઠંડીનો ચમકારો જોવા મળશે. હાલ ગુજરાતમાં ઠંડી ધીમે ધીમે વદી રહી છે. પહાડી પ્રદેશમાં હિમવર્ષા થવાના કારણે ગુજરાતમાં ઠંડીનો ચમકારો જોવા મળી રહ્યો છે.
રાત્રે અને વહેલી સવારે ઠેરઠેર ગરમ તાપણા કરીને લોકો ઠંડીથી બચવાની કોશિષ કરી રહ્યાં છે. જમ્મુ કશ્મીર, હિમાચલ પ્રદેશ અને ઉત્તરાખંડના વિસ્તારોમાં હિમવર્ષા થતાં ધીરેધીરે ગુજરાતમાં ઠંડીનો ચમકારો વધી રહ્યો છે.
શિયાળાની ગુલાબી ઠંડીએ બીજા દિવસે પણ પોતાની પક્કડ જાળવી રાખતા પર્વતીય પર્યટક સ્થળ માઉન્ટ આબુનું લઘુતમ તાપમાન 2 ડિગ્રી નોંધાયું હતું. શીત લહેરના સૂસવાટાથી લોકો ઠંડીમાં ઠૂંઠવાઈ ગયા હતા. ઉત્તર ભારતમાં હીમ વર્ષાની અસર દેશભરમાં વર્તાઈ રહી હોય તેમ રાજસ્થાનના એકમાત્ર હિલ સ્ટેશન માઉન્ટ આબુમાં બીજા દિવસે પણ ઠંડી યથાવત રહી હતી.