પુરી જિલ્લાના પિપિલી બ્લોકમાં દાનોહિર ગામમાં દિલ્હીના નિઝામુદ્દીનથી પરત ફરેલા વ્યક્તિનો કોરોના વાયરસનો રિપોર્ટ પોઝિટિવ આવ્યો હતો. જે બાદ પુરી જિલ્લા પ્રશાસને સાવધાનીના ભાગરૂપે કોવિડ-19નું સંક્રમણ ગામમાં ફેલાતું અટકે તે માટે સમગ્ર વિસ્તારને જ સીલ કરી દીધો છે.
પુરીના કલેકટર બલવંત સિંહે જણાવ્યું કે, ગામને એક નિયંત્રિત વિસ્તાર જાહેર કરવામાં આવ્યું છે અને 4 એપ્રિલ સવારે 7 વાગ્યાથી 14 એપ્રિલની રાત સુધી સીલ રહેશે. આ ઉપરાંત ગામની નજીકના વિસ્તારો જેવાકે દાનાગોહિર, છાક, જયાપુ છક અને જયાપુર સાસન છાકને પણ કોરોના વાયરસના ચેપથી બચાવવા માટે બંધ કરી દેવામાં આવ્યા છે.
જિલ્લા પ્રશાસનના કહેવા મુજબ, આ વિસ્તારમાં તમામ પ્રકારની મૂવમેન્ટ પર પ્રતિબંધ મુકી દેવામાં આવ્યો છે. લોકોને તેમના ઘરમાંથી બહાર નહીં નીકળવા જણાવાયું છે. બહારના લોકોને આ વિસ્તારમાં પ્રવેશ કરવાની મંજૂરી નહીં આપવામાં આવે. આ દરમિયાન જિલ્લા તંત્રના અધિકારીઓ લોકોને જરૂરી વસ્તુઓનો પૂરવઠો પૂરો પાડશે.