Congress Protest Against Agnipath Scheme: અગ્નિપથ યોજનાને લઈને દેશભરમાં વિવાદ ચાલી રહ્યો છે. આ મુદ્દે વિપક્ષી પાર્ટીઓ સતત સરકારને ઘેરી રહી છે. અગ્નિપથ યોજનાના વિરોધમાં આજે કોંગ્રેસ દેશવ્યાપી વિરોધ પ્રદર્શન કરશે. આજે કોંગ્રેસ કાર્યકર્તાઓ સેનાની ભરતીની નવી યોજના અગ્નિપથનો વિરોધ કરશે. કોંગ્રેસ કાર્યકર્તાઓ શેરીઓમાં ઉતરશે અને દેશભરની દરેક વિધાનસભામાં અગ્નિપથ યોજનાનો વિરોધ કરશે. પાર્ટીના સાંસદો, ધારાસભ્યો અને નેતાઓ પણ પ્રદર્શનમાં ભાગ લેશે.
અગ્નિપથ યોજનાને લઈને કોંગ્રેસ કાર્યકર્તાઓ અને નેતાઓ સવારે 10 થી 1 વાગ્યા સુધી દેશભરમાં પ્રદર્શન કરશે. કોંગ્રેસ આજે દેશવ્યાપી વિરોધ પ્રદર્શન કરશે, જ્યારે મેઘાલયના રાજ્યપાલ સત્યપાલ મલિકે પણ અગ્નિપથ યોજના પર પ્રશ્નો ઉઠાવ્યા છે.
કોંગ્રેસનો દેશવ્યાપી વિરોધ
કોંગ્રેસ આજે અગ્નિપથ યોજના (Agnipath Scheme)ના વિરોધમાં મોટા પાયે વિરોધ કરશે. આ પહેલા રવિવારે કોંગ્રેસના અનેક પ્રવક્તાએ અગ્નિપથ યોજનાને લઈને સરકાર પર હુમલો તેજ કરતા કહ્યું કે, મોદી સરકાર સેનામાં ભરતીની આ યોજના લાવીને યુવાનોના ભવિષ્ય સાથે રમત રમી રહી છે. કોંગ્રેસના નેતાઓએ સરકાર પાસેથી નવી યોજનાના વટહુકમને પાછો ખેંચવાની માંગનો પુનરોચ્ચાર કર્યો હતો. અગ્નિપથ યોજના સામે વિરોધનો સૂર ઓછો થવાને બદલે ધીમે ધીમે વધી રહ્યો છે.
રાજ્યપાલ સત્યપાલ મલિકે પણ સવાલો ઉઠાવ્યા હતા
દેશના મોટા ભાગના વિરોધ પક્ષો અથવા પ્રાદેશિક પક્ષો અગ્નિપથ યોજના (Agnipath Scheme)ના બહાને પોતાનો રાજકીય રોટલો શેકવાનો પ્રયાસ કરી રહ્યા છે, પરંતુ આ દરમિયાન મેઘાલયના રાજ્યપાલ સત્યપાલ મલિકે અગ્નિપથ યોજના પર સવાલો ઉઠાવ્યા છે. તેમણે કહ્યું કે આ ચાર વર્ષની યોજના સેના અને યુવાનોને બરબાદ કરશે. ચાર વર્ષ માટે ભરતી કરાયેલા યુવાનો તેમના લગ્ન માટે તરસશે. કેન્દ્ર સરકારે આ અંગે પુનર્વિચાર કરવો જોઈએ. અગાઉ સત્યપાલ મલિકે ખેડૂતોના આંદોલન વખતે પણ મોદી સરકાર સામે મોરચો ખોલ્યો હતો.