Assam Exit Poll 2026: આસામ વિધાનસભા ચૂંટણી 2026 ના મતદાન પૂર્ણ થયા બાદ હવે સૌની નજર આવનારા પરિણામો પર ટકેલી છે. પરંતુ તે પહેલા જ સામે આવેલા એક્ઝિટ પોલના આંકડાઓએ રાજ્યનું રાજકીય તાપમાન વધારી દીધું છે. તાજેતરના મેટ્રિઝ એક્ઝિટ પોલના અંદાજ મુજબ, ઉત્તર-પૂર્વના આ મહત્વના રાજ્યમાં ફરી એકવાર ભાજપનું 'કમળ' ખીલવા જઈ રહ્યું છે. મુખ્યમંત્રી હિમંત બિસ્વા શર્માના નેતૃત્વમાં NDA ગઠબંધન બહુમતીનો જાદુઈ આંકડો આસાનીથી પાર કરતું દેખાઈ રહ્યું છે. બીજી તરફ, કોંગ્રેસ ગઠબંધન (મહાજોત) ની બેઠકોમાં મોટો ઘટાડો થવાની સંભાવના છે. જો 4 મેના રોજ આવનારા ફાઇનલ પરિણામોમાં આ આંકડાઓ સાચા પડ્યા, તો હિમંત બિસ્વા શર્મા સતત ત્રીજી વખત મુખ્યમંત્રીની ખુરશી સંભાળી શકે છે.
શું કહે છે એક્ઝિટ પોલના આંકડા?
ચાલો હવે સીધા આંકડાઓની વાત કરીએ. આસામમાં વિધાનસભાની કુલ 126 બેઠકો છે અને સરકાર બનાવવા માટે બહુમતીનો જાદુઈ આંકડો 64 બેઠકોનો છે. મેટ્રિઝ એક્ઝિટ પોલ અનુસાર કાંટાની ટક્કર વચ્ચે પણ NDA સત્તા જાળવી રાખવામાં સફળ થઈ રહ્યું છે:
ભાજપ ગઠબંધન (NDA): 85 થી 95 બેઠકો જીતવાનો અંદાજ છે.
કોંગ્રેસ ગઠબંધન (ASM/મહાજોત): 25 થી 32 બેઠકો સુધી સમેટાઈ શકે છે.
અન્ય પક્ષો: 6 થી 12 બેઠકો પર જીત મેળવી શકે છે.
વોટ શેરમાં પણ ભાજપનો દબદબો
માત્ર બેઠકો જ નહીં, પણ વોટ શેરમાં પણ ભાજપ ગઠબંધને નોંધપાત્ર વધારો કર્યો હોય તેવું લાગી રહ્યું છે. એક્ઝિટ પોલ મુજબ NDA ને 45.5 ટકા, કોંગ્રેસ ગઠબંધનને 39.8 ટકા અને અન્ય પક્ષોને 14.7 ટકા વોટ મળવાનો અંદાજ છે.
2021 ની ચૂંટણી કરતા આ વખતે શું અલગ છે?
જો આપણે 2021 ની છેલ્લી વિધાનસભા ચૂંટણીના પરિણામો સાથે આની સરખામણી કરીએ, તો તે સમયે NDA ને 75 બેઠકો મળી હતી (જેમાં ભાજપ-60, AGP-9 અને UPPL-6) અને કોંગ્રેસના મહાજોતને 50 બેઠકો મળી હતી, જ્યારે અન્યના ખાતામાં માત્ર 1 બેઠક ગઈ હતી. આંકડા સ્પષ્ટ કરે છે કે આ વખતે એક્ઝિટ પોલમાં ભાજપ ગઠબંધનને 10 થી 20 બેઠકોનો સીધો ફાયદો થઈ રહ્યો છે (75 થી વધીને 85-95), જ્યારે કોંગ્રેસને મોટું નુકસાન વેઠવું પડી શકે છે.
આ પણ વાંચોઃ બંગાળમાં આ વખતે 'ખેલા' નહીં, કમળ ખીલશે: એક્ઝિટ પોલમાં ભાજપની બહુમતી, TMCના સૂપડા સાફ
આસામ ચૂંટણી 2026 ના મુખ્ય ગઠબંધન:
તમારી જાણકારી માટે જણાવી દઈએ કે આ ચૂંટણીમાં કોણ કોની સાથે મેદાનમાં છે:
NDA: ભાજપ (BJP) + AGP + BPF
ASM/મહાજોત: કોંગ્રેસ (INC) + રાઈજોર દળ + આસામ જાતિયા પરિષદ + CPI(M) + CPI(ML)
અન્ય: AIUDF + UPPL + AITMC + AAP
હવે દરેકના મનમાં એક જ સવાલ છે કે શું હિમંત બિસ્વા શર્મા ખરેખર મુખ્યમંત્રી તરીકે હેટ્રિક લગાવશે? આ તમામ અટકળો પર 4 મેના રોજ વિધાનસભાના સત્તાવાર પરિણામો સાથે જ પૂર્ણવિરામ મુકાશે.