West Bengal Exit Poll 2026: પશ્ચિમ બંગાળ વિધાનસભા ચૂંટણી 2026 નું મતદાન પૂર્ણ થયા બાદ હવે સૌની નજર ઔપચારિક પરિણામો પર છે. પરંતુ તે પહેલાં જ સામે આવેલા એક્ઝિટ પોલના આંકડાઓએ બંગાળના રાજકારણમાં મોટો ભૂકંપ લાવી દીધો છે. આ વખતે બંગાળમાં દીદીનો 'ખેલા' ફ્લોપ જતો દેખાઈ રહ્યો છે અને મોદીનો 'કમળ' જોરદાર જીત સાથે ખીલતો જોવા મળી રહ્યો છે. પ્રારંભિક એક્ઝિટ પોલના ટ્રેન્ડ બંગાળમાં સત્તા પરિવર્તન તરફ ઈશારો કરી રહ્યા છે, જેમાં ભાજપ શાસક તૃણમૂલ કોંગ્રેસ (TMC) ને કારમી હાર આપીને 294 સભ્યોની વિધાનસભામાં સ્પષ્ટ બહુમતીથી સરકાર બનાવતું દેખાઈ રહ્યું છે.
બુધવારે સાંજે જાહેર કરાયેલા અનેક એક્ઝિટ પોલના આંકડાઓ મુજબ બંગાળમાં ભાજપનો હાથ ઉપર છે. મેટ્રિઝ (Matrize) અને પોલ ડાયરી (Poll Diary) બંને એજન્સીઓના સર્વેમાં ભાજપને 146 થી 161 બેઠકો મળવાનો અંદાજ લગાવવામાં આવ્યો છે, જે સરકાર બનાવવા માટેના બહુમતીના આંકડા માટે પૂરતો છે. તેની સામે 10 વર્ષથી વધુ સમયથી સત્તામાં રહેલી TMC 125 થી 140 બેઠકો સુધી સમેટાઈ જતી દેખાઈ રહી છે. આ આંકડા ગત ચૂંટણીના શાનદાર પ્રદર્શનની સરખામણીમાં TMC માટે ખૂબ મોટો ફટકો છે.
આવો જ ટ્રેન્ડ ચાણક્ય (Chanakya) ના સર્વેમાં પણ જોવા મળ્યો છે. તેમના અંદાજ મુજબ ભાજપને 150 થી 160 બેઠકો અને TMC ને 130 થી 140 બેઠકો મળી શકે છે. જોકે, પ્રજા પોલ (Praja Poll) ના આંકડા તો સૌથી વધુ ચોંકાવનારા છે. પ્રજા પોલે બંગાળમાં ભાજપની પ્રચંડ જીતની આગાહી કરી છે. આ સર્વે મુજબ ભાજપને 178 થી 208 બેઠકો મળવાનો અંદાજ છે, જ્યારે TMC સાવ ધોવાઈને 85 થી 110 બેઠકો પર આવી જશે.
આ પણ વાંચોઃ બંગાળ એક્ઝિટ પોલ: મમતા દીદીનો ગઢ તૂટશે? 4 એજન્સીઓના સર્વેમાં ભાજપને સ્પષ્ટ બહુમતી
બંગાળમાં મોટો રાજકીય ઉલટફેર
જો આ એક્ઝિટ પોલ સાચા સાબિત થશે, તો પશ્ચિમ બંગાળના રાજકારણમાં આ અત્યાર સુધીનો સૌથી મોટો ઉલટફેર ગણાશે. મુખ્યમંત્રી મમતા બેનર્જીની પાર્ટી એક દાયકા કરતા વધુ સમયથી સત્તામાં છે, પણ હવે એવું લાગે છે કે ભાજપે જે આક્રમક રીતે રાજ્યમાં પોતાનો પાયો મજબૂત કર્યો છે, તે આખરે વોટમાં પણ બદલાઈ રહ્યો છે. જોકે, આપણે એ ન ભૂલવું જોઈએ કે એક્ઝિટ પોલ એ માત્ર એક અંદાજ છે, આખરી પરિણામ તો મતગણતરીના દિવસે જ ખબર પડશે. પણ હાલ પૂરતા આંકડા પરથી એટલું તો સ્પષ્ટ છે કે બંગાળમાં આ વખતે 'ખેલા' TMC ની તરફેણમાં જતો નથી દેખાઈ રહ્યો અને કમળ પૂરા જોશથી ખીલી રહ્યું છે.