Maharashtra: ગુજરાતના પૂર્વ મુખ્યમંત્રી વિજય રુપાણીને ભાજપે સોંપી મોટી જવાબદારી, જાણો વિગતો 

ભારતીય જનતા પાર્ટીએ ગુજરાતના પૂર્વ મુખ્યમંત્રી વિજય રૂપાણીને મોટી જવાબદારી સોંપી છે.

નવી દિલ્હી:  ભારતીય જનતા પાર્ટીએ ગુજરાતના પૂર્વ મુખ્યમંત્રી વિજય રૂપાણીને મોટી જવાબદારી સોંપી છે. ભાજપે વિજય રુપાણી અને કેન્દ્રીય મંત્રી નિર્મલા સીતારમણને મહારાષ્ટ્ર માટે પાર્ટીના સેન્ટ્રલ ઓબ્ઝર્વર તરીકે નિયુક્ત કર્યા છે. મહારાષ્ટ્રમાં ભાજપની શાનદાર જીત બાદ મુખ્યમંત્રી કોણ બનશે તે હજુ નક્કી નથી થયું. ત્યારે પાર્ટીના તમામ ધારાસભ્યોને મળી તેમનો મત જાણવા માટે પાર્ટીએ વિજય રુપાણીની નિયુક્તિ કરી છે.  

ભારતીય જનતા પાર્ટી દ્વારા એક પ્રેસ નોટમાં જણાવવામાં આવ્યું છે કે મહારાષ્ટ્રમાં ધારાસભ્ય દળના નેતાની પસંદગી માટે વિજય રુપાણી પૂર્વ મુખ્યમંત્રી ગુજરાત અને પ્રદેશ પ્રભારી પંજાબ તેમજ કેંદ્રીય નાણા મંત્રી નિર્મલા સિતારમણને કેંદ્રીય પર્યવેક્ષક તરીકે નિયુક્ત કરવામાં આવે છે. 

દેવેન્દ્ર ફડણવીસનું નામ ફાઈનલ

મહારાષ્ટ્રના નવા મુખ્યપ્રધાન તરીકે દેવેન્દ્ર ફડણવીસનું નામ ફાઈનલ કરવામાં આવ્યું છે.   3 ડિસેમ્બરના રોજ યોજાનારી બેઠકમાં ધારાસભ્ય દળના નેતા તરીકે ચૂંટાઈ શકે છે. ભાજપના એક વરિષ્ઠ નેતાએ આ દાવો કર્યો હતો. આ પહેલા કાર્યવાહક મુખ્યમંત્રી એકનાથ શિંદેએ કહ્યું હતું કે તેઓ નવા મુખ્ય પ્રધાનને પસંદ કરવાના ભાજપના નિર્ણયને ટેકો આપશે. મહારાષ્ટ્રના નવા મુખ્યમંત્રી તરીકે દેવેન્દ્ર ફડણવીસનું નામ ફાઈનલ કરવામાં આવ્યું છે. ભાજપના એક વરિષ્ઠ નેતાએ પીટીઆઈને જણાવ્યું હતું કે, નવી બીજેપી ધારાસભ્ય દળની બેઠક પસંદ કરવા માટેની  3 ડિસેમ્બરે યોજાશે.

તેમના પુત્ર શ્રીકાંત શિંદેને ડેપ્યુટી સીએમનું પદ મળી શકે છે અને શિવસેના ગૃહ વિભાગ માટે આતુર છે તેવી અટકળો વચ્ચે, એકનાથ શિંદેએ જણાવ્યું હતું કે મહાયુતિના સહયોગી- ભાજપ, એનસીપી અને શિવસેના- સાથે બેસીને સર્વસંમતિ દ્વારા સરકારની રચના નક્કી કરશે. મહારાષ્ટ્રની ચૂંટણીમાં મહાયુતિએ 132 બેઠકો સાથે સૌથી મોટી પાર્ટી તરીકે ઉભરી આવીને એક સપ્તાહથી વધુ સમય પછી પણ નવી સરકારને શપથ લેવાના બાકી છે. મહાયુતિ સરકારનો શપથ ગ્રહણ સમારોહ 5 ડિસેમ્બરના દિવસે યોજાનાર છે. PM મોદીની હાજરીમાં મુંબઈના આઝાદ મેદાન ખાતે શપથ ગ્રહણ સમારોહ યોજાશે.  ભાજપ સાવધાનીપૂર્વક આગળ વધી રહ્યું છે કારણ કે તેના સાથી પક્ષો, ખાસ કરીને શિવસેનાની આકાંક્ષાઓ બાદમાં વધી રહી છે. 

મહાયુતિ એકતા માટે શિંદેના આગ્રહ છતાં સાથી પક્ષોના કેટલાક નેતાઓ અલગ-અલગ અવાજમાં બોલ્યા. ભૂતપૂર્વ કેન્દ્રીય પ્રધાન અને ભાજપના નેતા રાવસાહેબ દાનવેએ જણાવ્યું હતું કે જો અવિભાજિત સેના અને ભાજપ સાથે મળીને ચૂંટણી લડ્યા હોત, તો તેઓ વધુ બેઠકો જીતી શક્યા હોત.

શિવસેનાના ધારાસભ્ય ગુલાબરાવ પાટીલે દાવો કર્યો હતો કે એકનાથ શિંદેની આગેવાની હેઠળની પાર્ટીએ ચૂંટણીમાં 90-100 બેઠકો જીતી હોત, જો અજિત પવારની એનસીપી ગઠબંધનનો ભાગ ન હોત.