BJP Exit Poll 2026: તાજેતરમાં યોજાયેલી 5 રાજ્યોની વિધાનસભા ચૂંટણીના એક્ઝિટ પોલના પરિણામો ભારતીય જનતા પાર્ટી (BJP) માટે મિશ્ર સંકેતો લઈને આવ્યા છે. આ પ્રારંભિક આંકડાઓ દર્શાવે છે કે ઉત્તર-પૂર્વના રાજ્ય આસામ અને કેન્દ્રશાસિત પ્રદેશ પુડુચેરીમાં ભાજપ ખૂબ જ મજબૂત સ્થિતિમાં છે અને ત્યાં આસાનીથી સત્તા પર વાપસી કરી શકે છે. બીજી તરફ, પશ્ચિમ બંગાળમાં ભાજપ અને શાસક TMC વચ્ચે જોરદાર અને બરાબરીની ટક્કર જોવા મળી રહી છે. પરંતુ, દક્ષિણ ભારતના રાજ્યો એટલે કે કેરળ અને તમિલનાડુની વાત કરીએ તો, ભાજપ ત્યાં હજુ પણ પોતાનો પગપેસારો કરવામાં નિષ્ફળ જતું દેખાઈ રહ્યું છે. ચાલો વિગતવાર જાણીએ કયા રાજ્યમાં ભાજપની કેવી સ્થિતિ છે.
આસામ અને પુડુચેરીમાં ભાજપનો દબદબો
પાંચ રાજ્યોના એક્ઝિટ પોલના અંદાજો પર નજર કરીએ તો, ભાજપ માટે સૌથી સારા સમાચાર આસામથી આવી રહ્યા છે. અહીં પાર્ટી શાનદાર જીત તરફ આગળ વધતી દેખાય છે. 'પોલ ઓફ પોલ્સ' ના આંકડા મુજબ, આસામમાં ભાજપ 87 થી 99 બેઠકો જીતી શકે છે. આ દર્શાવે છે કે વિપક્ષ કોંગ્રેસ દ્વારા લગાવવામાં આવેલા તમામ આક્ષેપો છતાં, જનતાએ મુખ્યમંત્રી હિમંત બિસ્વા શર્મા પર ફરી વિશ્વાસ મૂક્યો છે અને ભાજપ સતત ત્રીજી વખત સરકાર બનાવવા જઈ રહી છે. આ સિવાય, પુડુચેરીમાં પણ ભાજપ માટે મોટી રાહતના સમાચાર છે, જ્યાં પાર્ટી લગભગ 17 બેઠકો સાથે પોતાની સરકાર બનાવવાનો જાદુઈ આંકડો પાર કરતી દેખાઈ રહી છે.
પશ્ચિમ બંગાળમાં કાંટાની ટક્કર
પશ્ચિમ બંગાળની વાત કરીએ તો, અહીં રાજકીય સ્થિતિ ખૂબ જ રોમાંચક છે. ઘણા એક્ઝિટ પોલ ભલે ભાજપને આગળ બતાવી રહ્યા હોય, પરંતુ મુકાબલો બિલકુલ એકતરફી નથી. વિવિધ સર્વેના અંદાજ મુજબ બંગાળમાં ભાજપ 143 થી 165 બેઠકો મેળવી શકે છે, જ્યારે મમતા બેનર્જીની ટીએમસી (TMC) પણ 122 થી 141 બેઠકો સાથે બરાબરની લડત આપી રહી છે. આ આંકડાઓ સ્પષ્ટ કરે છે કે બંગાળમાં ક્લીન સ્વીપ કરવાને બદલે ખરાખરીનો ખેલ જામશે. રાજકીય વિશ્લેષકોનું પણ માનવું છે કે અહીં અંતિમ પરિણામોમાં મોટી ઉથલપાથલ જોવા મળી શકે છે.
આ પણ વાંચોઃ કેરળ વિધાનસભા ચૂંટણી 2026 એક્ઝિટ પોલ: કોંગ્રેસ ગઠબંધન UDF આગળ, જાણો કોને કેટલી બેઠક?
દક્ષિણના રાજ્યોમાં ભાજપ માટે કપરા ચઢાણ
એક તરફ જ્યાં ભાજપ ઉત્તર, પશ્ચિમ અને ઉત્તર-પૂર્વ ભારતમાં મજબૂત પકડ ધરાવે છે, ત્યાં દક્ષિણ ભારત તેના માટે હજુ પણ એક મોટો પડકાર બનેલું છે. કેરળ શરૂઆતથી જ ભાજપ માટે નબળી કડી રહ્યું છે. મોટાભાગના એક્ઝિટ પોલ સૂચવે છે કે કેરળમાં ભાજપને કોઈ જ મોટો ફાયદો નથી થઈ રહ્યો અને કેટલાક અંદાજો મુજબ તો પાર્ટી પોતાનું ખાતું ખોલાવવામાં પણ નિષ્ફળ જઈ શકે છે.
તમિલનાડુમાં પણ બિલકુલ આવો જ ટ્રેન્ડ જોવા મળી રહ્યો છે. મોટાભાગના સર્વેમાં ભાજપ ત્યાં એક સ્વતંત્ર અને મજબૂત પાર્ટી તરીકે ઉભરી શકી નથી અને તેની સંભવિત બેઠકોને 'અન્ય' ના ખાતામાં જ ગણવામાં આવી રહી છે. એકંદરે, એક્ઝિટ પોલનો સાર એ જ છે કે ભાજપ દેશના અન્ય ભાગોમાં ભલે મજબૂત હોય, પરંતુ દક્ષિણના ગઢમાં એન્ટ્રી લેવી તેના માટે હજુ પણ સૌથી મુશ્કેલ કામ છે.