Budget Session: રાષ્ટ્રપતિ દ્રૌપદી મુર્મૂનું અભિભાષણ, કહ્યુ- 'સરકાર મહિલાઓ અને ખેડૂતોનું સશક્તિકરણ કરી રહી છે'
નાણામંત્રી નિર્મલા સીતારમણ 1 ફેબ્રુઆરી, 2023 ના રોજ નાણાકીય વર્ષ 2023-24 માટે કેન્દ્રીય બજેટ રજૂ કરશે
રાષ્ટ્રપતિ દ્રૌપદી મુર્મૂએ કહ્યું કે છેલ્લા 8 વર્ષમાં દેશમાં મેટ્રો નેટવર્ક ત્રણ ગણાથી વધુ વધ્યું છે. આજે 27 શહેરોમાં ટ્રેનો પર કામ ચાલી રહ્યું છે. સમગ્ર દેશમાં 100 થી વધુ નવા જળમાર્ગો દેશમાં પરિવહન ક્ષેત્રને પુનર્જીવિત કરવામાં મદદ કરશે.
રાષ્ટ્રપતિ દ્રૌપદી મુર્મૂએ કહ્યું કે આજે એક તરફ દેશમાં અયોધ્યા ધામનું નિર્માણ થઈ રહ્યું છે, તો બીજી તરફ આધુનિક સંસદ ભવન પણ બનાવવામાં આવી રહ્યું છે. એક તરફ અમે કેદારનાથ ધામ, કાશી વિશ્વનાથ ધામ અને મહાકાલ મહાલોકનું નિર્માણ કર્યું છે તો બીજી તરફ અમારી સરકાર દરેક જિલ્લામાં મેડિકલ કોલેજો પણ બનાવી રહી છે.
રાષ્ટ્રપતિ દ્રૌપદી મુર્મૂએ કહ્યું કે તેમને ગર્વ છે કે INS વિક્રાંતના રૂપમાં પ્રથમ સ્વદેશી વિમાનવાહક જહાજ પણ આજે આપણી સેનામાં જોડાયું છે. મેડ ઈન ઈન્ડિયા અભિયાન અને આત્મનિર્ભર ભારત અભિયાનની સફળતાનો લાભ દેશને મળવા લાગ્યો છે.
મહિલાઓ અંગે રાષ્ટ્રપતિએ કહ્યું હતું કે આજે આપણે 'બેટી બચાવો, બેટી પઢાવો' અભિયાનની સફળતા જોઈ રહ્યા છીએ. દેશમાં પ્રથમ વખત પુરૂષો કરતા મહિલાઓની સંખ્યા વધુ છે અને મહિલાઓના સ્વાસ્થ્યમાં પણ પહેલા કરતા વધુ સુધારો થયો છે. એ સુનિશ્ચિત કરવામાં આવ્યું છે કે કોઈપણ ક્ષેત્રમાં મહિલાઓ માટે કોઈ પ્રતિબંધ નથી.
રાષ્ટ્રપતિએ કહ્યુ હતું કે મારી સરકારની પ્રાથમિકતા દેશના 11 કરોડ નાના ખેડૂતો છે. આ નાના ખેડૂતો દાયકાઓથી સરકારની પ્રાથમિકતાથી વંચિત હતા. હવે તેમને મજબૂત અને સમૃદ્ધ બનાવવા માટે દરેક પ્રકારના પ્રયાસો કરવામાં આવી રહ્યા છે.
રાષ્ટ્રપતિએ કહ્યું હતું કે સંપૂર્ણ પારદર્શિતા સાથે કરોડો લોકોને 27 લાખ કરોડ રૂપિયાથી વધુની રકમ આપવામાં આવી છે. વિશ્વ બેંકના એક અહેવાલમાં જણાવાયું છે કે આવી યોજનાઓ અને પ્રણાલીઓથી ભારત કોવિડ દરમિયાન ગરીબી રેખા નીચે આવતા કરોડો લોકોને બચાવવામાં સફળ રહ્યું હતું.
રાષ્ટ્રપતિ દ્રૌપદી મુર્મૂએ કહ્યું હતું કે સર્જિકલ સ્ટ્રાઈકથી લઈને આતંકવાદ પર આકરા હુમલા સુધી, એલઓસીથી લઈને એલએસી સુધી દરેક દુ:સાહસનો જોરદાર જવાબ, કલમ 370 હટાવવાથી લઈને ટ્રિપલ તલાક સુધી મારી સરકારની ઓળખ નિર્ણાયક સરકારની રહી છે.
રાષ્ટ્રપતિ મુર્મૂએ કહ્યું હતું કે આયુષ્માન ભારત યોજનાએ દેશના કરોડો ગરીબ લોકોને વધુ ગરીબ થવાથી બચાવ્યા છે અને તેમના 80,000 કરોડ રૂપિયા ખર્ચ થતા બચાવ્યા છે. 7 દાયકામાં દેશના લગભગ 3.25 કરોડ ઘરોમાં પાણીના જોડાણો પહોંચી ગયા હતા. જલ જીવન મિશન હેઠળ 3 વર્ષમાં લગભગ 11 કરોડ પરિવારો સુધી પાઈપથી પાણી પહોંચાડવામાં આવ્યું છે.
સંસદમાં પોતાના સંબોધનમાં રાષ્ટ્રપતિ દ્રૌપદી મુર્મૂએ કહ્યું હતું કે અગાઉ ટેક્સ રિફંડ માટે લાંબી રાહ જોવાતી હતી. આજે ITR ફાઇલ કર્યાના થોડા દિવસોમાં રિફંડ મળી જાય છે.
રાષ્ટ્રપતિ દ્રૌપદી મુર્મૂએ કહ્યું હતુ કે આજે આ સત્ર દ્વારા હું દેશવાસીઓનો આભાર વ્યક્ત કરું છું કે તેઓએ સતત બે ટર્મ માટે સ્થિર સરકારની પસંદગી કરી છે. મારી સરકારે હંમેશા દેશના હિતને સર્વોપરી રાખ્યું છે, નીતિ-રણનીતિને સંપૂર્ણ રીતે બદલવાની ઇચ્છા દર્શાવી છે. જે ભારત એક સમયે પોતાની સમસ્યાઓના નિરાકરણ માટે બીજા પર નિર્ભર હતું તે આજે વિશ્વની સમસ્યાઓના ઉકેલ માટેનું માધ્યમ બની ગયું છે. દેશની મોટી વસ્તીએ દાયકાઓથી જે સુવિધાઓની રાહ જોઈ હતી તે આ વર્ષોમાં મળી છે.
રાષ્ટ્રપતિ દ્રૌપદી મુર્મૂએ કહ્યું કે 2047 સુધીમાં આપણે એવા દેશનું નિર્માણ કરવાનું છે, જે ભૂતકાળના ગૌરવ સાથે જોડાયેલો હોય અને જેમાં આધુનિકતાના તમામ સુવર્ણ અધ્યાય હોય. આપણે એવા ભારતનું નિર્માણ કરવાનું છે જે 'આત્મનિર્ભર' હોય અને તેની માનવીય ફરજો નિભાવવામાં સક્ષમ હોય
રાષ્ટ્રપતિ દ્રૌપદી મુર્મૂએ કહ્યું હતું કે સરકારના લગભગ નવ વર્ષમાં ભારતની જનતાએ પહેલીવાર ઘણા સકારાત્મક ફેરફારો જોયા છે. સૌથી મોટો બદલાવ એ થયો છે કે આજે દરેક ભારતીયનો આત્મવિશ્વાસ ચરમસીમાએ છે અને વિશ્વનો ભારત પ્રત્યેનો દૃષ્ટિકોણ બદલાઈ ગયો છે. આપણા માટે એક યુગ બનાવવાની તક છે. આપણે એવું ભારત બનાવવું છે જે આત્મનિર્ભર હોય અને જે પોતાની માનવીય જવાબદારી નિભાવવામાં સક્ષમ હોય, જેમાં ગરીબી ન હોય, જેનો મધ્યમ વર્ગ પણ ગૌરવથી ભરેલો હોય. જેમની યુવા શક્તિ, મહિલા શક્તિ સમાજ અને રાષ્ટ્રને દિશા આપવા માટે ઉભી છે.
પીએમ મોદીએ કહ્યું હતું કે બજેટ સત્ર 2023માં શરૂ થઈ રહ્યું છે. ભારતના વર્તમાન રાષ્ટ્રપતિ પ્રથમ વખત દેશના ગૃહને સંબોધિત કરશે. રાષ્ટ્રપતિનું ભાષણ એ ભારતના બંધારણનું ગૌરવ છે. સંસદીય પ્રણાલીનું ગૌરવ. ખાસ કરીને આજે મહિલાઓના સન્માનનો પ્રસંગ છે. દૂર જંગલોમાં વસતા દેશના મહાન આદિવાસીઓનું સન્માન કરવાનો અવસર છે. આ માત્ર સંસદ માટે જ નહીં પરંતુ સમગ્ર દેશ માટે ગર્વની ક્ષણ છે. આજે રાષ્ટ્રપતિનું પ્રથમ સંબોધન થઈ રહ્યું છે. આજે રાષ્ટ્રપતિનું સંબોધન પણ પ્રથમ સંબોધન છે. મારું માનવું છે કે તમામ સાંસદો તરફથી ઉત્સાહ અને ઉર્જાથી ભરેલી ક્ષણ હોવી જોઈએ. આજની વૈશ્વિક પરિસ્થિતિમાં માત્ર ભારતનું જ નહીં પરંતુ સમગ્ર વિશ્વનું ધ્યાન ભારતના બજેટ તરફ છે. એનડીએ સરકારનો એક જ ઉદ્દેશ્ય હતો, ધ્યેય રહ્યો છે, અમારું કેન્દ્રબિંદુ માત્ર દેશ પ્રથમ અને દેશવાસીઓ પ્રથમ રહ્યો છે
શિવસેનાના સાંસદ પ્રિયંકા ચતુર્વેદીએ કહ્યું હતું કે સંસદમાં હોબાળો થશે કે શાંતિપૂર્ણ રીતે ચાલશે તે સરકારે નક્કી કરવાનું છે. તેમણે કહ્યું કે હિંડનબર્ગ, બીબીસી ડોક્યુમેન્ટ્રી કે કાશ્મીરી પંડિતોનો મુદ્દો હોય પ્રશ્નો પૂછવામાં આવશે. એટલું જ નહીં, તેમણે કહ્યું કે શિવસેના મહારાષ્ટ્રમાંથી કંપનીઓને બહાર મોકલવા અંગે સરકારને પ્રશ્નો પૂછશે. તેમણે કહ્યું કે નવા રાષ્ટ્રપતિનું આ પહેલું ભાષણ છે, તેથી અમે તેનો બહિષ્કાર નહીં કરીએ પરંતુ સાંભળવા માંગીએ છીએ કે સરકાર શું ઈચ્છે છે? તેમણે કહ્યું કે તે સ્વાભાવિક છે કે સત્ર ખૂબ તોફાની રહેશે.
રાષ્ટ્રપતિ મુર્મુૂના સંબોધન સમયે કોંગ્રેસ અધ્યક્ષ મલ્લિકાર્જુન ખડગે સહિત પાર્ટીના ઘણા નેતાઓ હાજર રહેશે નહીં. કોંગ્રેસ નેતા જયરામ રમેશે જણાવ્યું કે ખરાબ હવામાનને કારણે શ્રીનગર એરપોર્ટથી ફ્લાઇટ મોડી પડી છે. આ કારણે રાષ્ટ્રપતિના સંબોધન દરમિયાન મલ્લિકાર્જુન ખડગે સહિત કોંગ્રેસના તમામ સાંસદો હાજર રહેશે નહીં. આ નેતાઓ ભારત જોડો યાત્રાના સમાપન કાર્યક્રમમાં ભાગ લેવા માટે શ્રીનગર પહોંચ્યા હતા.
સંસદનું બજેટ સત્ર આજથી (31 જાન્યુઆરી) શરૂ થવા જઈ રહ્યું છે. બજેટ સત્ર સવારે 11 વાગ્યે રાષ્ટ્રપતિના અભિભાષણ સાથે શરૂ થશે. આજે સંસદમાં આર્થિક સર્વેક્ષણ 2023 (Economic Survey 2023) રજૂ કરવામાં આવશે. આ સત્ર તોફાની રહેવાની ધારણા છે. વિપક્ષ આ દરમિયાન ઘણા મુદ્દા ઉઠાવવાનો પ્રયાસ કરશે. વિરોધના મુદ્દાઓમાં મુખ્યત્વે અદાણી ગ્રૂપના સ્ટોકનો સમાવેશ થાય છે, જે 2002ના ગુજરાત રમખાણો પરની વિવાદાસ્પદ બીબીસી દસ્તાવેજી છે.
બ્રેકગ્રાઉન્ડ
નવી દિલ્હી: સંસદનું બજેટ સત્ર મંગળવારથી શરૂ થઈ રહ્યું છે. રાષ્ટ્રપતિ દ્રૌપદી મુર્મૂ બંને ગૃહોની સંયુક્ત બેઠકમાં પોતાનું પ્રથમ સંબોધન કરશે. સત્ર દરમિયાન સરકારનું ધ્યાન રાષ્ટ્રપતિના અભિભાષણ અને નાણાકીય વર્ષ 2023-24ના સામાન્ય બજેટ પર આભાર પ્રસ્તાવ પર સરળ ચર્ચા પર રહેશે. બીજી તરફ વિરોધ પક્ષોએ અદાણી જૂથ, કેટલાક રાજ્યોમાં રાજ્યપાલોની કામગીરી, જાતિ આધારિત વસ્તીગણતરી, મોંઘવારી, બેરોજગારી જેવા મુદ્દાઓ પર સરકારને ઘેરવાનો પ્રયાસ કરશે. સરકાર સત્ર દરમિયાન જ 31 જાન્યુઆરીએ સંસદમાં આર્થિક સર્વે રજૂ કરશે.
નાણામંત્રી નિર્મલા સીતારમણ 1 ફેબ્રુઆરી, 2023 ના રોજ નાણાકીય વર્ષ 2023-24 માટે કેન્દ્રીય બજેટ રજૂ કરશે. બજેટ સત્રનો પહેલો તબક્કો 13 ફેબ્રુઆરી સુધી ચાલશે અને બીજો તબક્કો 13 માર્ચથી શરૂ થઈને 6 એપ્રિલ સુધી ચાલશે. બજેટ સત્ર દરમિયાન 27 બેઠકો થશે. સોમવારે સર્વપક્ષીય બેઠકમાં સરકારે સ્પષ્ટ કર્યું કે તે સંસદમાં નિયમો હેઠળ દરેક મુદ્દા પર ચર્ચા કરવા માટે તૈયાર છે અને ગૃહને યોગ્ય રીતે ચલાવવા માટે દરેકનો સહયોગ માંગે છે. કેન્દ્રીય મંત્રી રાજનાથ સિંહની અધ્યક્ષતામાં મળેલી સર્વપક્ષીય બેઠક બાદ સંસદીય કાર્ય મંત્રી પ્રહલાદ જોશીએ કહ્યું, "સરકાર સંસદમાં નિયમો હેઠળ દરેક મુદ્દા પર ચર્ચા કરવા માટે તૈયાર છે, અમે વિપક્ષનો સહયોગ ઈચ્છીએ છીએ."
જોશીએ જણાવ્યું હતું કે આ બેઠકમાં 27 રાજકીય પક્ષોના 37 નેતાઓએ ભાગ લીધો હતો. સૂત્રોના જણાવ્યા અનુસાર, બેઠકમાં આમ આદમી પાર્ટીના સંજય સિંહ, રાષ્ટ્રીય જનતા દળના મનોજ ઝા, ડીએમકે, ડાબેરી પક્ષો વગેરેએ અદાણી જૂથ સાથે સંબંધિત મુદ્દા ઉઠાવ્યા અને સંસદ સત્ર દરમિયાન તેના પર ચર્ચા કરવાની માંગ કરી હતી. ઉલ્લેખનીય છે કે, અમેરિકન ફોરેન્સિક ફાઇનાન્શિયલ કંપની હિંડનબર્ગ રિસર્ચએ અદાણી ગ્રુપ પર છેતરપિંડીનો આરોપ લગાવ્યો હતો, જેના પછી છેલ્લા કેટલાક દિવસોમાં ગ્રૂપની કંપનીઓના શેરમાં ભારે ઘટાડો થયો છે. હિંડનબર્ગ રિસર્ચના આરોપોના જવાબમાં અદાણી ગ્રુપે નિવેદન બહાર પાડ્યુ હતું.
સૂત્રોએ જણાવ્યું કે બેઠકમાં ટીઆરએસ અને ડીએમકે જેવી પાર્ટીઓએ વિપક્ષ શાસિત રાજ્યોમાં રાજ્યપાલના વર્તનનો મુદ્દો ઉઠાવ્યો હતો. તેમણે કહ્યું કે આ સાથે સર્વપક્ષીય બેઠકમાં વાયએસઆર કોંગ્રેસે રાષ્ટ્રીય સ્તરે જાતિ આધારિત આર્થિક વસ્તી ગણતરીની માંગ કરી હતી. તેમણે કહ્યું હતું કે બેઠકમાં તૃણમૂલ કોંગ્રેસે મોંઘવારી અને બેરોજગારીની સ્થિતિ પર ચિંતા વ્યક્ત કરી હતી.
- - - - - - - - - Advertisement - - - - - - - - -