પ્રેસ કોન્ફરન્સમાં જણાવાયા મુજબ, સીરમ ઈન્સ્ટિટ્યૂટ ઓફ ઈન્ડિયા, પુણેએ 18 કે તેથી વધુ ઉંમરના 23,745 લોકો પર કરેલા રિસર્ચનો સુરક્ષિત અને અસરદાર ડેટા રજૂ કર્યો છે. આ વેક્સિન 70.42 ટકા અસરદાર છે. આ ઉપરાંત સીરમ ઈન્સ્ટિટ્યૂટને દેશમાં 1600 વોલંટિયર્સ પર બીજા અને ત્રીજા તબક્કાના પરીક્ષણની મંજૂરી આપવામાં આવી હતી. ફર્મે આ ટ્રાયલનો ડેટા પ્રસ્તુત કર્યો હતો. વિસ્તૃત વિચાર-વિમર્શ બાદ સબ્જેક્ટ એક્સપર્ટ કમિટીએ ઇમરજન્સી ઉપયોગ કરવાની મંજૂરી આપવા ભલામણ કરી હતી. ફર્મ દ્વારા દેશમાં ટ્રાયલ ચાલુ રહેશે.
દેશમાં છેલ્લા 24 કલાકમાં કોરોનાના 18,177 નવા કેસ નોંધાયા છે અને 217 લોકોના મોત થયા છે. દેશમાં કુલ સંક્રમિતોની સંખ્યા 1,03,23,965 પર પહોંચી છે. જ્યારે એક્ટિવ કેસ 2,47,220 છે. દેશમાં કુલ 99,27,310 લોકો કોરોનાને મ્હાત આપી ચુક્યા છે. અત્યાર સુધીમાં કોરોના 1,49,435 લોકોને ભરખી ગયો છે.