Delhi Liquor Policy Case: દિલ્હીમાં દારૂ નીતિ કૌભાંડ મામલે મનીષ સિસોદિયાની જામીન અરજી સુપ્રીમ કોર્ટે ફગાવી હતી. દિલ્હીના પૂર્વ નાયબ મુખ્યમંત્રી મનીષ સિસોદિયાની જામીન અરજી પર સોમવારે (30 ઓક્ટોબર) સુપ્રીમ કોર્ટમાં સુનાવણી થઈ હતી. સુનાવણી બાદ સુપ્રીમ કોર્ટે સિસોદિયા દ્વારા દાખલ કરવામાં આવેલી જામીન અરજી ફગાવી દીધી હતી. જસ્ટિસ સંજીવ ખન્ના અને જસ્ટિસ એસવીએન ભાટીની ખંડપીઠે સિસોદિયા વિરુદ્ધ સેન્ટ્રલ બ્યુરો ઑફ ઇન્વેસ્ટિગેશન (CBI) અને એન્ફોર્સમેન્ટ ડિરેક્ટોરેટ (ED) દ્વારા તપાસ કરવામાં આવી રહેલા કેસ પર પોતાનો ચુકાદો આપ્યો છે.
સુપ્રીમ કોર્ટે અગાઉ સીબીઆઈ અને ઈડીને કથિત દિલ્હી એક્સાઈઝ પોલિસી અને સિસોદિયા સામેના કેસોને લઈને ઘણા પ્રશ્નો પૂછ્યા હતા. સિસોદિયા કથિત દારૂ કૌભાંડમાં ફેબ્રુઆરીથી જેલમાં છે. આ મહિનાની શરૂઆતમાં સુપ્રીમ કોર્ટે સિસોદિયાની જામીન અરજી પર પોતાનો નિર્ણય સુરક્ષિત રાખ્યો હતો. સિસોદિયાએ તેમની વિરુદ્ધ બે અલગ-અલગ કેસમાં જામીન માંગ્યા છે. તેમાંથી એક કેસ સીબીઆઈ દ્વારા અને બીજો કેસ ઈડી દ્વારા દાખલ કરવામાં આવ્યો છે.
ભલે સુપ્રીમ કોર્ટે દિલ્હીના પૂર્વ નાયબ મુખ્યમંત્રીની જામીન અરજી ફગાવી દીધી હોય. જો કે, કોર્ટે નિર્દેશ આપ્યા છે કે સિસોદિયા સામેનો કેસ 6 થી 8 મહિનામાં પૂર્ણ કરવામાં આવે. જો ટ્રાયલ પ્રક્રિયા ધીમી રહેશે તો સિસોદિયા ત્રણ મહિનામાં ફરીથી જામીન માટે અરજી કરવા માટે હકદાર બનશે. આવી સ્થિતિમાં હવે જોવાનું એ રહેશે કે સિસોદિયા ત્રણ મહિના પછી ફરી કોર્ટમાં પહોંચે છે કે કેમ.
સિસોદિયા પર શું છે આરોપ?
વાસ્તવમાં મનીષ સિસોદિયા દિલ્હી દારૂ કૌભાંડમાં ફેબ્રુઆરીથી જેલમાં છે. 17 ઓક્ટોબરે જ્યારે તેમની જામીન પર સુનાવણી થઈ ત્યારે કોર્ટે પોતાનો નિર્ણય સુરક્ષિત રાખ્યો હતો. સિસોદિયા પર દિલ્હી લિકર પોલિસીમાં ભ્રષ્ટાચાર અને મની લોન્ડરિંગનો આરોપ છે. છેલ્લી સુનાવણીમાં સિસોદિયાના વકીલ અભિષેક મનુ સિંઘવીએ કહ્યું હતું કે તેમના અસીલ વિરુદ્ધ કોઈ પુરાવા મળ્યા નથી અને તેમને આ કૌભાંડ સાથે કોઈ લેવાદેવા નથી. તેમ છતાં તેમને આરોપી બનાવવામાં આવ્યા છે.
દિલ્હી લિકર પોલિસી કૌભાંડમાં ધરપકડ કરાયેલા સિસોદિયા એકમાત્ર નેતા નથી. તાજેતરમાં આમ આદમી પાર્ટીના રાજ્યસભા સાંસદ સંજય સિંહની પણ ED દ્વારા ધરપકડ કરવામાં આવી હતી. EDએ તેમને આ કૌભાંડ સાથે પણ જોડ્યા હતા. સંજય સિંહ પણ હજુ કસ્ટડીમાં છે. આમ આદમી પાર્ટીએ તેમના નેતાઓ પર લાગેલા આરોપોને સંપૂર્ણપણે નકારી કાઢ્યા છે.