અંકિત શર્માનાં પરિવારે તાહિર હુસૈનને મોતનો જવાબદાર ઠેરવ્યો છે. પરિવારનાં જણાવ્યા પ્રમાણે અચનાક બહારથી પડોશમાં રહેનારા એક પરિવારે મદદ માટે બૂમો પાડી તો અંકિત મદદ માટે બહાર આવ્યા હતા. અંકિતનાં માતાએ તેમને રોક્યા પરંતુ તેમણે માનું સાંભળ્યું નહીં. અંકિત એ સમયે ઘરની બહાર નીકળ્યા પછી પરત ના ફર્યા, પરત આવી તો ફક્ત તેમની લાશ. તેમની લાશ પણ પાસેની ગટરમાંથી મળી. તો તાહિર હુસૈનનું કહેવું છે કે અંકિતનાં મોતથી તે દુ:ખી છે.
આ મામલે આરોપી તાહિર હુસેન વિરૂદ્ધ ગુરૂવારે હત્યા, આગચંપી અને હિંસા ફેલાવવાનો કેસ દાખલ થયો. કેસ દયાલપુર સ્ટેશનમાં દાખલ થયો. ત્યારે આમ આદમી પાર્ટીના તાહિર હુસેન વિરૂદ્ધ કાર્યવાહી કરવામાં આવી છે. પાર્ટીએ તેમને સસ્પેન્ડ કરી દીધા છે. આ પહેલા દિલ્હી પોલીસે મોટી કાર્યવાહી કરતા તાહિર હુસેનના ખજૂરી વિસ્તારમાં આવેલ ઘરને સીલ લગાવી દીધું છે. તાહિર હુસેનના ઘરના ધાબા પરથી પથ્થર અને પેટ્રોલ બોમ્બ મળ્યા હતા. આરોપ છે કે અહીંથી પણ પથ્થરમારો કરવામાં આવ્યો હતો.
તપાસમાં તાહિરનાં ઘરેથી પેટ્રોલ બોમ્બ, ગોફણ અને પથ્થર મળ્યા છે. જો કે તાહિરનો દાવો છે કે કેટલાક લોકો જબરદસ્તીથી તેના ઘરે આવ્યા હતા. આવામાં તોફાનોમાં સામેલ હોવાની શંકામાં ખજૂરી ખાસ વિસ્તારમાં તાહિરની ફેક્ટરી પોલીસે સીલ કરી દીધી છે.