નવી દિલ્હીઃ દેશના ઉત્તર અને પહાડી રાજ્યોમાં છેલ્લા ત્રણ દિવસોથી ભારે વરસાદ વરસી રહ્યો છે. હિમાચલ પ્રદેશમાં ભારે વરસાદના કારણે નદી-નાળા ઊભરાયા છે. રવિવારે મંડી જિલ્લામાં અંદાજે 4 મહિના પહેલા બનાવેયાલા રસ્તાઓ અને બ્રિજ ધરાશાઈ થયા છે. આ સાથે જ શિમલામાં ભૂસ્ખલનમાં પાંચ લોકો દટાયા હતા જેમનું રેસ્ક્યૂ કરવામાં આવ્યું હતું. હવામાન વિભાગના જણાવ્યા પ્રમાણે, રવિવારે હિમાચલ પ્રદેશના ઘણા વિસ્તારોમાં ભારે વરસાદ થઈ શકે છે. આ ઉપરાંત હવામાન વિભાગે દિલ્હી, હરિયાણા, પંજાબ, ઉત્તરાખંડ, ચંદીગઢ, પશ્વિમ યુપી, ઝારખંડ, પશ્વિમ બંગાળ, ઓરિસ્સા, તમિલનાડુ, પુડ્ડુચેરી, બિહાર અને છત્તીસગઢના વિવિધ વિસ્તારોમાં ભારે વરસાદનું એલર્ટ આપવામાં આવ્યું છે. પશ્વિમ-મધ્ય અને દક્ષિણ-પશ્વિમ અરબ સાગરથી 45-55 કિમી પ્રતિ કલાકની ઝડપથી પવન ફુંકાવાની શક્યતાઓ છે. હવામાન વિભાગની આગાહી પ્રમાણે, ગુજરાતમાં પણ હાલ કોઈ સિસ્ટમ સક્રિય ન હોવાથી છૂટોછવાયો વરસાદ વરસી શકે છે.