New Parliament House: આજથી નવા સંસદ ભવનમાં સંસદની કાર્યવાહી શરૂ થશે. લોકસભાની કાર્યવાહી બપોરે 1:15 વાગ્યે શરૂ થશે, જ્યારે રાજ્યસભાની કાર્યવાહી બપોરે 2:15 વાગ્યે શરૂ થશે. નવી સંસદ ભવનનાં ઉદ્ઘાટન માટેની તમામ તૈયારીઓ પૂર્ણ કરી લેવામાં આવી છે. જેમાં કુલ 1280 સભ્યો માટે બેઠક વ્યવસ્થા કરવામાં આવી છે. શું તમે જાણો છો કે આ અત્યાધુનિક નવા સંસદ ભવનને તૈયાર કરવામાં કેટલો ખર્ચ થયો છે?
નવા સંસદ ભવનમાં આટલા સભ્યો માટે બેઠક વ્યવસ્થા
વડાપ્રધાન નરેન્દ્ર મોદીએ આ વર્ષના મે મહિનામાં આ નવા સંસદ ભવનનું ઉદ્ઘાટન કર્યું હતું. વિશાળ ઈમારતમાં 888 સભ્યો લોકસભાની ચેમ્બરમાં અને 300 સભ્યો રાજ્યસભાની ચેમ્બરમાં આરામથી બેસી શકે છે. બંને ગૃહોની સંયુક્ત બેઠકના કિસ્સામાં લોકસભા ચેમ્બરમાં કુલ 1280 સભ્યો બેસી શકે છે.
આ પ્રોજેક્ટ 971 કરોડ રૂપિયાનો હતો
PM મોદીએ 10 ડિસેમ્બર, 2020 ના રોજ નવી સંસદ ભવનનો શિલાન્યાસ કર્યો હતો અને તે ત્રણ વર્ષથી પણ ઓછા સમયમાં તૈયાર છે. 64,500 ચોરસ મીટરમાં ફેલાયેલી આ ચાર માળની ઇમારત ત્રિકોણાકાર છે. જો વિસ્તારની દૃષ્ટિએ જોવામાં આવે તો તે જૂના સંસદ ભવન કરતાં લગભગ 17,000 ચોરસ મીટર મોટું છે. આ સિવાય તેને અત્યાધુનિક ટેક્નોલોજીથી તૈયાર કરવામાં આવ્યું છે અને તેના પર ભૂકંપની અસર થશે નહીં. જ્યારે તેનો શિલાન્યાસ કરવામાં આવ્યો ત્યારે તેને બનાવવાનો કોન્ટ્રાક્ટ ટાટા પ્રોજેક્ટ્સને આપવામાં આવ્યો હતો અને તેના બાંધકામનો અંદાજિત ખર્ચ 971 કરોડ રૂપિયા નક્કી કરવામાં આવ્યો હતો.
આ કારણોસર બાંધકામનો ખર્ચ વધ્યો
ટાટા પ્રોજેક્ટ્સે નવા સંસદ ભવનનું નિર્માણ કાર્ય ઝડપથી શરૂ કર્યું હતું, પરંતુ જાન્યુઆરી 2022માં બે વર્ષ પછી માહિતી શેર કરવામાં આવી હતી કે તેનો ખર્ચ 200 કરોડ રૂપિયા વધુ થશે. સ્ટીલ અને અન્ય ચીજવસ્તુઓ, ઈલેક્ટ્રોનિક્સ અને અન્ય કામોના ભાવમાં વધારાથી તેનું બજેટ વધ્યું હતું. જેમાં આધુનિક ઓડિયો-વિડિયો વિઝ્યુઅલ સિસ્ટમ, સાંસદોના ટેબલ પરના ટેબલેટ જેવી બાબતોએ ખર્ચમાં વધારો કરવામાં મોટી ભૂમિકા ભજવી હતી. સૂત્રોના જણાવ્યા અનુસાર, કેન્દ્રીય જાહેર બાંધકામ વિભાગ (CPWD)એ 200 કરોડ રૂપિયાના વધારા બાદ સંસદ ભવનનું બજેટ 1200 કરોડ રૂપિયા સુધી પહોંચવાની અપેક્ષા રાખી હતી. હવે લગભગ 1200 કરોડ રૂપિયાની કિંમતની આ ઈમારત પોતાનું કામ કરવા માટે સંપૂર્ણ રીતે તૈયાર છે અને તેમાં આજથી 19 સપ્ટેમ્બર 2023થી સંસદની કાર્યવાહી શરૂ થશે.
અધિકારીઓ અને કર્મચારીઓની હાઇટેક ઓફિસ
ચાર માળના આ નવા સંસદ ભવનમાં સુરક્ષા માટે ઘણી વ્યવસ્થા કરવામાં આવી છે. તેના છ પ્રવેશદ્વાર છે, જેમાંથી ત્રણ અશ્વ, ગજ અને ગરુડ દ્વાર ઔપચારિક દરવાજા છે. આ ગેટનો ઉપયોગ ઉપરાષ્ટ્રપતિ, સ્પીકર અને વડાપ્રધાન કરશે. જ્યારે અન્ય ત્રણ ગેટ મકર ગેટ, શાર્દુલ ગેટ અને હંસ ગેટનો ઉપયોગ સાંસદો અને જનતા માટે કરવામાં આવશે. આ હાઈટેક સંસદમાં અધિકારીઓ અને કર્મચારીઓની ઓફિસો પણ આધુનિક સુવિધાઓથી સજ્જ કરવામાં આવી છે. આમાં, કાફે, ડાઇનિંગ એરિયા અને કમિટી મીટિંગના અલગ-અલગ રૂમમાં હાઇટેક ઉપકરણો લગાવવામાં આવ્યા છે. કોમન રૂમ, લેડીઝ લોન્જ અને વીઆઈપી લોન્જની પણ જોગવાઈ છે.
આ કંપનીએ નવી સંસદની ડિઝાઇન તૈયાર કરી છે
ઓછા સમયમાં અને મોટા ખર્ચે તમામ પ્રકારની હાઇટેક સુરક્ષા પ્રણાલીઓથી સજ્જ નવા સંસદ ભવનની ડિઝાઇન ગુજરાત સ્થિત આર્કિટેક્ચર ફર્મ HCP ડિઝાઇન, પ્લાનિંગ એન્ડ મેનેજમેન્ટ પ્રાઇવેટ લિમિટેડે તૈયાર કરી છે અને બિલ્ડિંગના મુખ્ય આર્કિટેક્ટ બિમલ પટેલ છે જેઓ અનેક મોટી ઇમારતોને ડિઝાઇન કરી ચૂક્યા છે. આર્કિટેક્ચરના ક્ષેત્રમાં તેમના અસાધારણ કાર્ય માટે તેમને વર્ષ 2019 માં પદ્મશ્રી પણ મળ્યો છે. તેમણે વિશ્વનાથ ધામ કાશી વિશ્વનાથ મંદિર, ગુજરાત હાઈકોર્ટ બિલ્ડીંગ, આઈઆઈએમ અમદાવાદ કેમ્પસ, ટાટા સીજીપીએલ ટાઉનશીપ, સાબરમતી રિવરફ્રન્ટ ડેવલપમેન્ટ પ્રોજેક્ટ અને પંડિત દીનદયાળ પેટ્રોલિયમ યુનિવર્સિટી સહિત ઘણી મોટી ઈમારતોની ડિઝાઈન તૈયાર કરી છે.