ગુનેગારોને જેલ પ્રશાસને પૂછ્યું કે 1 ફેબ્રુઆરીના રોજ તેમની ફાંસી પહેલા તે પોતાની અંતિમ મુલાકાત કોની સાથે કરવા માગે છે? તેમના નામે જો કોઈ પ્રોપર્ટી અથવા બેંક ખાતામાં જમા કોઈ રકમ હોય તો કોના નામે ટ્રાન્સફર કરવા માગે છે? અથવા કોઈ નોમિની બનાવવા અથવા કોઈ વારસદાર બનાવવા કે કોઈના નામે કરવા માગે છે? કોઈ વસીયત બનાવવા માગે છે? કોઈ ધાર્મિક કે મનપસંદ પુસ્તક વાંચવા માગે છે?
મીડિયા અહેવાલ અનુસાર, ચાર દોષિતો પૈકી એકે પોતાની જિંદગી ખતમ થવાના ડરથી ખાવાનું છોડી દીધું છે, જ્યારે બીજાએ પણ ખાવાનું ઓછું કરી દીધું છે. જેલ સૂત્રોએ જણાવ્યું કે ચારેયમાંથી એક વિનયે બે દિવસો સુધી ખાવાનું નહોતું ખાધું પરંતુ બુધવારે તેને ખાવા માટે વારંવાર કહેવામાં આવયું તો થોડું ભોજન લીધું. બીજી તરફ, દોષી પવન જેલમાં રહીને ખાવાનું બહુ ઓછું કરી દીધું છે. મુકેશ અને અક્ષય પર હાલ ઓછું ખાવાનું કે ખાવાનું છોડી દેવા જેવી કોઈ અસર જોવા નથી મળી. મુકેશની પાસે ફાંસીને ટાળવા માટે પોતાના બચાવમાં જેટલા પણ કાયદાકિય રસ્તા હતા તે તમામ અજમાવી ચૂક્યો છે. તેની દયા અરજીને પણ રાષ્ટ્રપતિ રામનાથ કોવિંદ ફગાવી ચૂક્યા છે.
જેલ સૂત્રોએ કહ્યું કે ચારેય કાતિલોને તિહાડની જેલ નંબર-3માં અલગ-અલગ સેલમાં રખાયા છે. દરેક દોષિતના સેલની બહાર બે સિક્યોરિટી ગાર્ડ તૈનાત રહ્યા છે. તેમાંથી એક હિન્દી અને ઇંગ્લિશનું જ્ઞાન ના ધરાવતા તામિલનાડુ સ્પેશ્યલ પોલીસના જવાન અને એક તિહાડ જેલ પ્રશાસનનો હોય છે. દર બે કલાકે એક ગાર્ડને આરામ અપાય છે. શિફ્ટ બદલવા પર બીજો ગાર્ડ તૈનાત રહે છે. દરેક કેદી માટે 24 કલાક માટે આઠ-આઠ સિક્યોરિટી ગાર્ડ લગાવામાં આવે છે. એટલે કે ચાર કેદીઓ માટે કુલ 32 સિક્યોરિટી ગાર્ડ. ચારેયને ફાંસી પર લટકાવાની નવી તારીખ 1 ફેબ્રુઆરી સવારે 6 વાગ્યે નક્કી કરાઇ છે.