Ayodhya Ram Mandir Controversy: રામ મંદિરમાં દાનની ચોરી અંગાના મામલાને લઈને દેશભરમાં હોબાળો મચ્યો છે. વિશ્વ હિન્દુ પરિષદ (VHP) ના આંતરરાષ્ટ્રીય અધ્યક્ષ આલોક કુમારે એક ઈન્ટરવ્યુમાં આ વિવાદને ભક્તો માટે ઊંડો ભાવનાત્મક આઘાત ગણાવ્યો હતો. આ સાથે જ તેમણે એ વાતને પણ ફગાવી દીધી કે રામ મંદિર ટ્રસ્ટની કામગીરી માટે VHP ને જવાબદાર ઠેરવવી જોઈએ.
આલોક કુમારે કહ્યું, "જે કંઈ પણ થયું છે, તે ખૂબ જ કમનસીબ છે અને તેનાથી દુનિયાભરના હિન્દુઓની ભાવનાઓ દુભાઈ છે. અમે દુઃખી છીએ, દરેક વ્યક્તિ દુઃખી છે અને આના માટે કોઈ બહાના બનાવવા કે આનો બચાવ કરવાનો કોઈ પ્રશ્ન જ ઊભો થતો નથી." તેમણે આ સમગ્ર મામલાને VHP, RSS અને મોદી સરકાર સાથે જોડવાના પ્રયાસોને પણ નકારી કાઢ્યા છે.
આ પણ વાંચો..રામ મંદિર પ્રસાદ ચોરી કેસમાં મોટો ખુલાસો: આરોપી અવિનાશે ગર્લફ્રેન્ડને લાખો રૂપિયા આપ્યા
VHP ના આંતરરાષ્ટ્રીય ઉપાધ્યક્ષ અને શ્રી રામ જન્મભૂમિ તીર્થ ક્ષેત્ર ટ્રસ્ટના મહામંત્રી ચંપત રાયને લઈને કુમારે કહ્યું કે ટ્રસ્ટમાં તેમની ભૂમિકાને VHP નું પ્રતિનિધિત્વ કરવા જેવી માનવી જોઈએ નહીં. VHP પ્રમુખે કહ્યું, "હું એ વાતનો ઇનકાર નથી કરી રહ્યો કે ચંપત રાયજી વરિષ્ઠ હોદ્દેદાર રહ્યા છે અને અત્યારે VHP ના આંતરરાષ્ટ્રીય ઉપાધ્યક્ષ છે, પરંતુ અમે તેમને તે પદ માટે નોમિનેટ કર્યા નહોતા. અમે તેમની ભલામણ નહોતી કરી. તેઓ VHP નું પ્રતિનિધિત્વ કરતા નથી."
ચંપત રાયથી અંતર જાળવવા અંગે શું બોલ્યા આલોક કુમાર
જ્યારે તેમને પૂછવામાં આવ્યું કે આટલી બદનામી થયા પછી પણ VHP એ ચંપત રાયથી સાર્વજનિક રીતે અંતર કેમ ન જાળવ્યું, તો કુમારે કહ્યું કે તમે એવું ઈચ્છો છો કે હું તપાસનું પરિણામ આવ્યા વગર જ આજે તેમને બરખાસ્ત કરી દઉં? તેમણે આગળ કહ્યું કે અત્યાર સુધી કોઈએ પણ ચંપત રાય પર આવી લૂંટમાં સામેલ હોવાનો, ઉશ્કેરવાનો કે તેની યોજના બનાવવાનો આરોપ લગાવ્યો નથી.
દોષિત લોકોને જેલ થવી જોઈએ- આલોક કુમાર
ઈન્ટરવ્યુ દરમિયાન આલોક કુમારે વારંવાર એ વાત પર ભાર મૂક્યો હતો કે તપાસમાં કોઈને પણ છોડવા જોઈએ નહીં, પછી ભલે તેમનો હોદ્દો ગમે તે હોય. તેમણે કહ્યું, "અમે જ સૌથી પહેલા FIR નોંધવાની, સિનિયર અધિકારીઓ પાસે તપાસ કરાવવાની, ફાસ્ટ-ટ્રેક કોર્ટ અને દોષિતોને સજા અપાવવાની માંગ કરી હતી." તેમણે આગળ કહ્યું કે દોષિતોને સજા મળવી જોઈએ અને આ આખી પ્રક્રિયા ચારથી પાંચ મહિનામાં પૂર્ણ થઈ જવી જોઈએ જેથી દોષિત લોકોને જેલ જતા જોઈને હિન્દુ સમાજને થોડો સંતોષ મળી શકે.