Sukhvinder Singh Sukhu: હિમાચલ પ્રદેશમાં કોંગ્રેસને સ્પષ્ટ બહુમતી મળી છે. પરિણામો બાદથી મુખ્યમંત્રી પદને લઈને બેઠકોનો દોર ચાલી રહ્યો હતો, ત્યારબાદ સુખવિંદર સિંહ સુખુને હિમાચલ પ્રદેશના આગામી મુખ્યમંત્રી તરીકે પસંદ કરવામાં આવ્યા છે. લાંબા સમય સુધી ચાલેલી હિમાચલ વિધાનસભા પક્ષની બેઠકમાં સુખુના નામ પર મહોર લાગી હતી.
હિમાચલ પ્રદેશની કુલ 68 વિધાનસભા બેઠકોમાંથી કોંગ્રેસને 40 બેઠકો મળી હતી, જ્યારે ભાજપને 25 બેઠકો મળી હતી. આ સિવાય અપક્ષોએ 3 બેઠકો જીતી હતી. કોંગ્રેસે ચૂંટણી પહેલા ન તો હિમાચલ માટે કોઈ નેતાને મુખ્યમંત્રીનો ચહેરો બનાવ્યો હતો અને ન તો પછીથી મુખ્યમંત્રી પદ માટેના નામની જાહેરાત કરી હતી. પરંતુ હવે સુખવિંદર સિંહ સુખુ હિમાચલના આગામી મુખ્યમંત્રી હશે.
હિમાચલ પ્રદેશના આગામી મુખ્યમંત્રી કોણ હશે તે અંગે વિવિધ અટકળો લગાવવામાં આવી રહી હતી. 8 ડિસેમ્બરે પરિણામ આવ્યા બાદથી જે નામો ચર્ચામાં હતા તેમાં સુખવિંદર સિંહ સુખુ, પ્રતિભા સિંહ અને મુકેશ અગ્નિહોત્રીના નામ મોખરે હતા. આવી સ્થિતિમાં, ચાલો જાણીએ કોણ છે સુખવિંદર સિંહ સુખુ?
સુખવિંદર સિંહ સુખુ
સુખવિંદર સિંહ સુખુ હિમાચલ પ્રદેશની નાદૌન વિધાનસભા બેઠક પરથી ચૂંટણી જીત્યા છે. તેમણે ભાજપના વિજય કુમારને 3,363 મતોના માર્જિનથી હરાવ્યા હતા. હિમાચલ પ્રદેશના મુખ્યમંત્રી પદની રેસમાં સુખુ સૌથી આગળ હતા. સુખવિંદર સિંહને 50.88% વોટ શેર સાથે 36142 વોટ મળ્યા, જ્યારે બીજેપીના વિજય કુમારને 46.14% વોટ શેર સાથે 32,779 વોટ મળ્યા. જ્યારે, આમ આદમી પાર્ટીના ઉમેદવાર શૈંકી ઠુકરાલને માત્ર 1,487 વોટ મળ્યા હતા.
સુખવિન્દર સિંહ સુખુ હિમાચલ પ્રદેશની વર્તમાન રાજનીતિમાં મજબૂત વ્યક્તિ તરીકે ઓળખાય છે. તેઓ અખિલ ભારતીય રાષ્ટ્રીય કોંગ્રેસના સભ્ય છે. સુખુનો જન્મ 27 માર્ચ 1964ના રોજ હિમાચલ પ્રદેશના નાદૌનમાં થયો હતો. હવે તેઓ કોંગ્રેસ તરફથી આ મતવિસ્તારનું પ્રતિનિધિત્વ કરે છે. તેમના પિતાનું નામ રસિલ સિંહ છે. સુખવિંદર સિંહ સુખુએ નાદૌન યુનિવર્સિટીમાંથી પોસ્ટ ગ્રેજ્યુએશન કર્યું છે. બાદમાં હિમાચલ પ્રદેશ યુનિવર્સિટીમાંથી એલએલબીની ડિગ્રી મેળવી.
2003માં પહેલીવાર ધારાસભ્ય બન્યા
સુખવિંદર સિંહ સુખુ રાજ્યના પૂર્વ મુખ્યમંત્રી સ્વર્ગસ્થ વીરભદ્ર સિંહના નજીકના માનવામાં આવતા હતા. સુખુ 2022ની વિધાનસભા ચૂંટણી માટે કોંગ્રેસની પ્રચાર સમિતિના વડા પણ હતા. સુખવિન્દર સુખુ અત્યાર સુધીમાં 5 વખત વિધાનસભા ચૂંટણી લડી ચુક્યા છે, જેમાંથી તેઓ 4 વખત ચૂંટણી જીત્યા છે. તેઓ પ્રથમ વખત વર્ષ 2003માં નૌદાન વિધાનસભા બેઠક પરથી ધારાસભ્ય તરીકે ચૂંટાયા હતા. આ પછી સુખુએ 2007, 2017ની ચૂંટણી જીતી હતી. તેઓ 2013માં હિમાચલ પ્રદેશ કોંગ્રેસ સમિતિના અધ્યક્ષ પણ રહી ચૂક્યા છે.