Coronavirus Crisis In India: કોરોના વાયરસ ફરી એકવાર ચીન સહિત વિશ્વના તમામ દેશોમાં ફેલાયો છે. ચીનની સ્થિતિને જોતા ભારત સરકાર પણ સતર્ક થઈ ગઈ છે. કેન્દ્રીય સ્વાસ્થ્ય મંત્રી મનસુખ માંડવિયાએ આજે એટલે કે બુધવારે (21 ડિસેમ્બર) કોરોનાને લઈને ઉચ્ચ સ્તરીય બેઠક બોલાવી છે. આ દરમિયાન કેન્દ્રીય સ્વાસ્થ્ય મંત્રીએ કોંગ્રેસના પૂર્વ અધ્યક્ષ રાહુલ ગાંધીને 'ભારત જોડો યાત્રા' મોકૂફ રાખવાની અપીલ કરી છે.
કેન્દ્રીય સ્વાસ્થ્ય મંત્રી મનસુખ માંડવિયાએ રાહુલ ગાંધી અને રાજસ્થાનના મુખ્યમંત્રી અશોક ગેહલોતને પત્ર લખીને ભારત જોડો યાત્રામાં કોવિડ પ્રોટોકોલનું પાલન કરવા વિનંતી કરી છે. પત્રમાં તેમણે લખ્યું છે કે, જો આ શક્ય ન હોય તો દેશના હિતમાં યાત્રા સ્થગિત કરવાનો નિર્ણય લેવામાં આવે.
કોવિડના નિયમોનું પાલન કરવું જોઈએ
પત્રમાં કેન્દ્રીય સ્વાસ્થ્ય મંત્રીએ 'ભારત જોડો યાત્રા' દ્વારા કોરોના ફેલાવવાના જોખમ પર ચિંતા વ્યક્ત કરી છે. તેમણે કહ્યું, "કોરોના મહામારી એ જાહેર કટોકટી હોવાથી દેશના હિતમાં 'ભારત જોડો યાત્રા'ને સ્થગિત કરવાનો નિર્ણય લેવો જોઇએ. રાજસ્થાનમાં ચાલી રહેલી ભારત જોડો યાત્રામાં કોવિડની માર્ગદર્શિકાનું ચુસ્તપણે પાલન કરવું જોઈએ. લોકો માસ્ક અને સેનિટાઇઝરનો ઉપયોગ કરે તેવી વ્યવસ્થા કરવામાં આવે. આ સિવાય માત્ર એવા લોકોને જ યાત્રામાં સામેલ કરવા જેમણે કોરોનાની રસી લીધી હોય.
દેશના હિતમાં યાત્રા મોકૂફ રાખવા અપીલ
કેન્દ્રીય સ્વાસ્થ્ય મંત્રીએ પોતાના પત્રમાં રાહુલ ગાંધીને દેશના હિતમાં યાત્રા સ્થગિત કરવાની અપીલ કરી છે. તેમણે લખ્યું, "જો કોવિડ પ્રોટોકોલનું પાલન કરવું શક્ય નથી, તો જાહેર આરોગ્ય કટોકટીની સ્થિતિને ધ્યાનમાં રાખીને અને દેશને કોવિડ મહામારીથી બચાવવા માટે હું 'ભારત જોડો યાત્રા'ને સ્થગિત કરવા વિનંતી કરું છું.
કેન્દ્રીય સ્વાસ્થ્ય મંત્રીના આ પત્ર પર કોંગ્રેસે વળતો પ્રહાર કર્યો છે. કોંગ્રેસના નેતા અધીર રંજન ચૌધરીએ તેને સંપૂર્ણપણે રાજકીય ગણાવ્યું છે. તેમણે દાવો કર્યો છે કે ભારત જોડો યાત્રાના ડરથી ભાજપ આ કામ કરી રહી છે. તેમણે કહ્યું કે, "ભારત જોડો યાત્રાએ મોદી સરકારને ખળભળાટ મચાવી દીધો છે. સામાન્ય લોકોનું ધ્યાન હટાવવા માટે ભાજપ વિવિધ પ્રશ્નો ઉઠાવી રહી છે. શું પીએમ મોદી ગુજરાતની ચૂંટણીમાં માસ્ક પહેરીને ઘરે-ઘરે ગયા હતા અને તમામ પ્રોટોકોલનું પાલન કર્યું હતું. ?"