Tata Semiconductor Plant: ટાટા ગ્રુપે આસામમાં પોતાના સેમિકન્ડક્ટર પ્લાન્ટના ભૂમિપૂજન સાથે જ દેશને ચિપ મેકિંગ સેક્ટરમાં આગળ લઈ જવાની શરૂઆત કરી દીધી છે. આ પ્લાન્ટ પર ટાટા ઇલેક્ટ્રોનિક્સ 27 હજાર કરોડ રૂપિયાનું રોકાણ કરશે. તેની મદદથી 27 હજાર નોકરીઓ પણ પેદા થશે. આ પ્લાન્ટ 2025માં ઓપરેશનલ થઈ જશે. ટાટા ગ્રુપે શનિવારે કહ્યું કે આસામના 1000 લોકો હાલમાં અહીં કામ કરી રહ્યા છે. ભવિષ્યમાં કંપની સેમિકન્ડક્ટર ઇકોસિસ્ટમમાં સામેલ અન્ય કંપનીઓને પણ અહીં લાવવાનો પ્રયાસ કરશે.
એન ચંદ્રશેખરને કર્યું પ્લાન્ટનું ભૂમિપૂજન
ટાટા સન્સના ચેરમેન એન ચંદ્રશેખરને ભૂમિપૂજન કાર્યક્રમ બાદ કહ્યું કે અમે આ પ્લાન્ટ દ્વારા 15 હજાર પ્રત્યક્ષ અને 12 હજાર અપ્રત્યક્ષ નોકરીઓ પેદા કરીશું. આ ઉપરાંત અમારા સપ્લાયર્સ પણ અહીં ધીરે ધીરે આવશે. કાર્યક્રમમાં હાજર આસામના મુખ્યમંત્રી હિમંત બિસ્વા સરમાએ આને રાજ્યના લોકો માટે સુવર્ણ ક્ષણ ગણાવી છે. આસામના લોકો હંમેશા ટાટા ગ્રુપના આભારી રહેશે. તેમણે વિશ્વાસ અપાવ્યો કે ટાટા ગ્રુપને અહીં પ્લાન્ટ બનાવવામાં કોઈ મુશ્કેલી નહીં થવા દેવામાં આવે.
આસામના મુખ્યમંત્રીએ કહ્યું - અમારું સપનું પૂરું થયું
ટાટા ગ્રુપ આ પ્લાન્ટ મોરીગાંવ જિલ્લાના જાગીરોડમાં બનાવવા જઈ રહ્યું છે. આસામના મુખ્યમંત્રીએ કહ્યું કે વડાપ્રધાન નરેન્દ્ર મોદી, નાણાં મંત્રી નિર્મલા સીતારમણ અને ઇલેક્ટ્રોનિક્સ મંત્રી અશ્વિની વૈષ્ણવને કારણે આ પ્લાન્ટ આસામમાં લાવવાનું સપનું પૂરું થયું છે. અશ્વિની વૈષ્ણવે કહ્યું કે આ પ્લાન્ટમાં બનનારા ચિપ્સ ઇલેક્ટ્રિક વાહનો સહિત લગભગ દરેક કંપનીમાં વપરાશે.
ફેબ્રુઆરી, 2024માં કેન્દ્રીય કેબિનેટથી મળી હતી મંજૂરી
આ સેમિકન્ડક્ટર પ્લાન્ટને ફેબ્રુઆરી, 2024માં કેન્દ્રીય કેબિનેટથી મંજૂરી મળી હતી. માત્ર 5 મહિનાની અંદર જ પ્લાન્ટનું નિર્માણ કાર્ય શરૂ થઈ ગયું છે. અહીં ચિપ બનાવવા માટે મોટાભાગની ટેકનોલોજી ભારતની જ હશે. આ પ્લાન્ટ દેશને સેમિકન્ડક્ટર સેક્ટરમાં આગળ લઈ જશે. આ પ્લાન્ટ આસામમાં બનવાથી પૂર્વોત્તર રાજ્યોમાં મોજૂદ NITથી આ સેક્ટર માટે ટેલેન્ટ પેદા કરવામાં આવશે. ટાટા ઇલેક્ટ્રોનિક્સનો બીજો પ્લાન્ટ ગુજરાતના ધોલેરામાં બની રહ્યો છે. તે ડિસેમ્બર, 2026થી કામ કરવાનું શરૂ કરી દેશે.