Tomorrow Weather 9 July: દેશભરમાં કાળઝાળ ગરમીનો પ્રકોપ સહન કર્યા બાદ હવે મેઘરાજા ધમાકેદાર બેટિંગ કરવા માટે તૈયાર છે. હવામાન વિભાગ (IMD) દ્વારા આવતીકાલે, 9 જુલાઈના રોજ ઉત્તર પ્રદેશ, દિલ્હી અને બિહાર સહિત દેશના 23 રાજ્યોમાં ભારે વરસાદ અને ભયંકર વાવાઝોડાની ચેતવણી જાહેર કરવામાં આવી છે. આ વાતાવરણના પલટા દરમિયાન કેટલાક વિસ્તારોમાં 90 કિલોમીટર પ્રતિ કલાકની ઝડપે તોફાની પવન ફૂંકાઈ શકે છે. ખાસ કરીને ખેડૂતો અને માછીમારોને દરિયો ન ખેડવા અને સાવચેત રહેવા અપીલ કરવામાં આવી છે. મુંબઈકરો માટે પણ ચિંતાના સમાચાર છે, કારણ કે ત્યાં 15 જુલાઈ સુધી ખતરનાક વરસાદથી કોઈ જ રાહત મળવાની શક્યતા નથી. તેથી લોકોએ ખાસ સાવધાની રાખવાની જરૂર છે.
આ સમગ્ર હવામાનમાં આવેલા પલટા પાછળનું મુખ્ય કારણ ઉત્તર-પશ્ચિમ મધ્યપ્રદેશ અને તેને અડીને આવેલા દક્ષિણ-પશ્ચિમ ઉત્તર પ્રદેશ પર સર્જાયેલું લો-પ્રેશર (નીચા દબાણનો વિસ્તાર) છે. આ સિસ્ટમ આવતીકાલે ઉત્તર-ઉત્તરપશ્ચિમ તરફ આગળ વધ્યા બાદ ઉત્તર પ્રદેશ તરફ વળશે. ચાલો જાણીએ આવતીકાલે, 9 જુલાઈએ દેશના અલગ-અલગ રાજ્યોમાં હવામાનનો મિજાજ કેવો રહેશે.
દિલ્હી અને યુપીમાં વાવાઝોડાનો ખતરો
દિલ્હીમાં 9 જુલાઈએ ભારે વરસાદ અને વાવાઝોડાનું એલર્ટ આપવામાં આવ્યું છે. અહીં 70 થી 80 કિમી પ્રતિ કલાકની ઝડપે પવન ફૂંકાઈ શકે છે. દિલ્હીનું તાપમાન 29 ડિગ્રી મહત્તમ અને 27 ડિગ્રી લઘુત્તમ રહેવાની ધારણા છે. બીજી તરફ, યુપીમાં તો મેઘરાજા જાણે રૌદ્ર સ્વરૂપ ધારણ કરવાના હોય તેમ 90 કિમીની ઝડપે પવન ફૂંકાવાની ચેતવણી છે. મેરઠ, નોઈડા, ગાઝિયાબાદ, આગ્રા, અયોધ્યા, પ્રયાગરાજ સહિતના 20 થી વધુ જિલ્લાઓમાં ભારે વરસાદની આગાહી છે. લખનૌમાં 9 જુલાઈએ મહત્તમ તાપમાન 33 અને લઘુત્તમ તાપમાન 25 ડિગ્રી સેલ્સિયસ રહેશે.
આ પણ વાંચોઃ ગુજરાતમાં ભારે વરસાદ: CM ભૂપેન્દ્ર પટેલ એક્શનમાં, આવતીકાલે સુરત અને વલસાડની લેશે મુલાકાત
બિહાર અને ઝારખંડમાં કેવું રહેશે વાતાવરણ?
બિહારના પટના, મુઝફ્ફરપુર, ભાગલપુર સહિતના જિલ્લાઓમાં 9 થી 11 જુલાઈ સુધી મધ્યમથી ભારે વરસાદ અને 60 થી 70 કિમીની ઝડપે પવન ફૂંકાઈ શકે છે. 9 જુલાઈએ પટનાનું મહત્તમ તાપમાન 32 અને લઘુત્તમ 27 ડિગ્રી સુધી પહોંચશે. જ્યારે પાડોશી રાજ્ય ઝારખંડના રાંચી, ધનબાદ અને જમશેદપુરમાં પણ 9 અને 10 જુલાઈએ 50 થી 55 કિમીની ઝડપે પવન સાથે ભારે વરસાદની આગાહી છે.
પહાડી રાજ્યોમાં મુસાફરી કરતા પહેલા સાવધાન
ઉત્તરાખંડ, હિમાચલ પ્રદેશ અને જમ્મુ-કાશ્મીર જેવા પહાડી રાજ્યોમાં પણ હવામાન બગડવાની પૂરી શક્યતા છે. ઉત્તરાખંડના નૈનીતાલ, હરિદ્વાર અને ઋષિકેશ તેમજ હિમાચલના શિમલા અને મનાલીમાં 9 થી 11 જુલાઈ સુધી વરસાદ અને તોફાનની ચેતવણી અપાઈ છે. અહીં 60 થી 70 કિમીની ઝડપે પવન ફૂંકાઈ શકે છે. જમ્મુ-કાશ્મીરમાં પણ 9 જુલાઈએ શ્રીનગર, અનંતનાગ અને કુપવાડા સહિતના વિસ્તારો માટે વરસાદ અને તોફાનનું યલો એલર્ટ જાહેર કરાયું છે.
આ પણ વાંચોઃ આગામી 2 દિવસ કેવું રહેશે હવામાન? હવામાન વિભાગ અને અંબાલાલ પટેલની ચોંકાવનારી આગાહી
પંજાબ, બંગાળ, મધ્યપ્રદેશ અને રાજસ્થાનની સ્થિતિ
પંજાબના અમૃતસર, લુધિયાણા અને પટિયાલામાં 70 થી 80 કિમીની સ્પીડે પવન સાથે ભારે વરસાદ ખાબકી શકે છે. જ્યારે પશ્ચિમ બંગાળના કોલકાતા, જલપાઈગુડી અને આસપાસના વિસ્તારોમાં 60 થી 65 કિમીની ઝડપે પવન સાથે મધ્યમથી ભારે વરસાદની ચેતવણી છે. મધ્યપ્રદેશના મુરેના, છતરપુર અને ગુના સહિતના વિસ્તારોમાં 50 થી 60 કિમીની ઝડપે પવન ફૂંકાશે અને ભોપાલમાં તાપમાન 30 ડિગ્રી મહત્તમ રહી શકે છે. આ તરફ રાજસ્થાનના જયપુર, અજમેર, બિકાનેર અને જેસલમેરમાં 9 અને 10 જુલાઈએ 70 થી 75 કિમીની ઝડપે પવન સાથે વરસાદ અને વાવાઝોડાની આગાહી કરવામાં આવી છે.