નવી દિલ્લીઃ તમિલનાડુના કુનૂરમાં હેલિકોપ્ટર દુર્ઘટનામાં ચીફ ઓફ ડીફેન્સ સ્ટાફ (સીડીએસ) જનરલ બિપિન રાવત સાથે જીવ ગુમાવનારા બ્રિગેડિયર એલ.એસ. લિદ્દરના શુક્રવારે સવારે દિલ્હી કેન્ટના બરાડ સ્ક્વેરમાં અંતિમસંસ્કાર કરવામાં આવ્યા હતા.
આ પ્રસંગે બ્રિગેડિયર એલ.એસ. લિદ્દરના પત્નિ ગીતિકા અને પુત્રી આશનાએ બતાવેલી હિંમત અને ગૌરવે દેશભરનાં લોકોને રડાવી દીધા હતા. બ્રિગેડિયર એલ.એસ. લિદ્દરનાં પત્નિ ગીતિકાએ પતિનો મોત પર સતત રડ્યા કરવાના બદલે તેમને હસતા ચહેરે વિદાય આપવાની વાત કરીને લોકોનાં દિલ જીતી લીધાં હતાં.
ગીતિકાએ સ્મિત સાથે કહ્યું કે, મારા પતિ લાર્જર ધેન લાઈઝ વ્યક્તિ હતા ને દરેક માણસ આ વાત જાણે છે. તમે જોઈ જ રહ્યા છો કે કેટલાં લોકો તેમને અંતિમ વિદાય આપવા માટે આવ્યા છે. બહુ અદભૂત વ્યક્તિત્વ હતું તેમનું, બહુ બધા દોસ્ત હતા તેમના, બહુ પ્રેમ આપતા હતા બધાંને. કદાચ આ જ કારણે લોકો અમને પડેલી ખોટ બદલ અફસોસ વ્યક્ત કરી રહ્યા છે પણ આપણે બધાંએ તેમને સારી રીતે વિદાય આપવી જોઈએ, સ્મિતસભર વિદાય આપવી જોઈએ.
ગીતિકાએ ગર્વથી કહ્યું કે, હું એક સૈનિકની પત્નિ છું અને મારે વધારે કંઈ કહેવાની જરૂર નથી.
ગીતિકાનો આ વીડિયો લોકોની આંખો ભીની કરી દેનારો છે. સાથે સાથે એક લશ્કરી અધિકારીની પત્નિને પોતાન પતિ પર કેટલો ગર્વ હતો તેનો અહેસાસ કરાવનારો પણ છે.