West Bengal Exit Poll 2026: પશ્ચિમ બંગાળ વિધાનસભા ચૂંટણી 2026 ના એક્ઝિટ પોલના આંકડાઓ રાજકીય માહોલમાં ગરમાવો લાવી રહ્યા છે. એક તરફ કેટલાક સર્વેમાં ભાજપ આગળ દેખાઈ રહ્યું હતું, ત્યાં હવે 'પીપલ્સ પલ્સ' અને 'જનમત' નામના 2 મોટા એક્ઝિટ પોલે આખું ચિત્ર જ પલટી નાખ્યું છે. આ બંને સર્વેના લેટેસ્ટ આંકડા મુજબ, પશ્ચિમ બંગાળમાં 'બંગાળની દીકરી' એટલે કે મમતા બેનર્જીનો જાદુ હજુ પણ બરકરાર છે અને તેમની પાર્ટી TMC (તૃણમૂલ કોંગ્રેસ) 177 થી 187 બેઠકો સાથે ફરી એકવાર સ્પષ્ટ બહુમતી મેળવતી દેખાઈ રહી છે. આ પરિણામો દર્શાવે છે કે 15 વર્ષથી સત્તામાં હોવા છતાં જનતાનો મમતા દીદી પરનો વિશ્વાસ અકબંધ છે અને તેઓ સતત ચોથી વખત બંગાળના મુખ્યમંત્રીની ખુરશી સંભાળી શકે છે.
ભાજપ અને અન્ય પક્ષોની શું છે સ્થિતિ?
પીપલ્સ પલ્સ અને જનમત એક્ઝિટ પોલના આંકડાઓ પર નજર કરીએ તો, આ વખતે ભાજપને 95 થી 110 બેઠકો મળવાનો અંદાજ છે. આ આંકડો સ્પષ્ટ કરે છે કે ભાજપ રાજ્યમાં એક મજબૂત વિપક્ષ તરીકે તો ચોક્કસ ઉભરી રહ્યું છે, પરંતુ સત્તાની ખુરશી સુધી પહોંચવામાં તેઓ હજુ પણ પાછળ રહી ગયા છે. આ સિવાય કોંગ્રેસને માત્ર 1 થી 3 બેઠકો અને ડાબેરી પક્ષોને 0 થી 1 બેઠકથી જ સંતોષ માનવો પડે તેવી શક્યતા છે. અન્ય પક્ષોનું તો આ વખતે ખાતું પણ ખુલતું નથી દેખાઈ રહ્યું. અત્રે ઉલ્લેખનીય છે કે, ચૂંટણી પહેલા આવેલા કેટલાક ઓપિનિયન પોલ્સમાં પણ TMC ને 195 થી 205 બેઠકો અને ભાજપને 80 થી 90 બેઠકો મળવાની મોટી આગાહી કરવામાં આવી હતી.
રેકોર્ડબ્રેક મતદાન અને મમતા દીદીનો પ્રભાવ
તમને જણાવી દઈએ કે 2026 ની આ ચૂંટણીમાં બંગાળમાં રેકોર્ડબ્રેક 92 ટકાથી પણ વધુ જંગી મતદાન નોંધાયું છે, જે તાજેતરના વર્ષોમાં સૌથી વધુ છે. શહેરોથી લઈને ગામડાઓ સુધી લોકોએ ભારે ઉત્સાહથી વોટિંગ કર્યું છે. રાજકીય પક્ષો આ બમ્પર મતદાનનો પોતપોતાની રીતે અર્થ કાઢી રહ્યા છે. ભાજપ જેવા વિપક્ષી દળો તેને પરિવર્તનની લહેર ગણાવી રહ્યા છે, જ્યારે સત્તાધારી TMC તેને લોકોના સમર્થનની મહોર માની રહ્યું છે.
આ પણ વાંચોઃ એક્ઝિટ પોલ 2026: ભાજપ માટે ક્યાં ખુશી અને ક્યાં ગમ? આ આંકડા જોઈને તમે પણ ચોંકી જશો
'લક્ષ્મી ભંડાર' યોજના બની ગઈ ગેમ-ચેન્જર
આ એક્ઝિટ પોલમાં મમતા બેનર્જીની જીત પાછળનું સૌથી મોટું અને મુખ્ય કારણ તેમની કલ્યાણકારી યોજનાઓ, ખાસ કરીને 'લક્ષ્મી ભંડાર' યોજનાને માનવામાં આવી રહી છે. મહિલાઓને દર મહિને સીધી આર્થિક મદદ પૂરી પાડતી આ યોજના ચૂંટણીમાં ખરા અર્થમાં ગેમ-ચેન્જર સાબિત થઈ છે. ખાસ કરીને ગ્રામ્ય વિસ્તારની મહિલા મતદારોએ મમતા દીદી પર પૂરો ભરોસો મૂક્યો છે, જેના લીધે ચૂંટણીનું પલડું સંપૂર્ણપણે TMC તરફ ઝૂકી ગયું. સાથે જ, મમતા બેનર્જીની 'બંગાળની દીકરી' તરીકેની છબી અને લોકોની વચ્ચે રહીને લડાયક નેતા તરીકે પ્રચાર કરવાની તેમની રીત પણ ભાજપના આક્રમક પ્રચાર પર ભારે પડી હોય તેવું સ્પષ્ટ દેખાઈ રહ્યું છે.