હવામાન વિભાગની આગાહી વચ્ચે દેવભૂમિ દ્વારકા જિલ્લાના વાતાવરણમાં પલટો આવ્યો છે. ખંભાળિયા તાલુકાના સલાયા ગામે કમોસમી વરસાદ પડતા ખેડૂતોની ચિંતામાં વધારો થયો છે. સલાયા સહિત આસપાસના ગામોમાં કમોસમી વરસાદ પડતા જગતનો તાત ફરી ચિંતામાં મુકાયો છે. કમોસમી વરસાદના કારણે ધરતીપુત્રોને રવિપાક માટેની ચિંતા વધી છે તો સાગરખેડૂ પણ મુશ્કેલીમાં મુકાયા છે.
કચ્છ બાદ જામનગરના લાલપુર તાલુકામાં પણ વાતાવરણ પલટાયું છે. ભારે પવન સાથે કમોસમી વરસાદ પડતા રોડ પર વરસાદી પાણી ફરી વળ્યા છે. ખેડૂતોના રવિપાકને મોટાપાયે નુકસાન થાય તેવી ખેડૂતોને ભીતિ છે.