સુરત: બારડોલીના કડોદ ગામે અકસ્માતની ઘટના સામે આવી છે. જેમાં ક્લાર્કનું મોત થયું છે. બેફામ હંકારી જતા કાર ચાલકે બાઇકને અડફેટે લેતા તેમનું મોત નિપજ્યું છે. મૃતક ક્લાર્ક માંડવી પ્રાંત કચેરીમાં ફરજ બજાવતા હોવાની વાત સામે આવી છે. જ્યારે આ અકસ્માતમાં તેમના પરિવારના અન્ય 3 સભ્યો સારવાર હેઠળ છે જેમાં 4 વર્ષીય પુત્રીની હાલત ગંભીર હોવાની વાત સામે આવી છે. મોટર સાઈકલને અડફેટે લઈ કાર પણ રોડની સાઈડ પર પલ્ટી મારી ગઈ હતી. કારમાં સવાર બે યુવાન પૈકી એકને ગંભીર ઈજા પહોંચતા તેમને હોસ્પિટલે ખસેડાયો છે.
અમીરગઢમાં યુવકની લાશ મળી આવી
બનાસકાંઠા: અમીરગઢના ઘાટા-કાળીભાખરી પાસેથી યુવકની લાશ મળી આવી છે. યુવકની હત્યા કરી લાશ ફેંકી દીધી હોવાનો પરિવારજનોનો આક્ષેપ છે. આ ઉપરાંત ઘટના સ્થળેથી શંકાસ્પદ બિનવારસી હાલતમાં જીપ પણ મળી આવી છે. જે વ્યક્તિના લાશ મળી છે તેની ઓળખ વેલાભાઈ સાંગીયા તરીકે થઈ છે. યુવકની લાશ મળતા ઘટના સ્થળે લોકોના ટોળેટોળા એકઠા થયા હતા. આ અંગે પોલીસને જાણ કરવામાં આવતા અમીરગઢ પોલીસે બનાવ સ્થળે પહોંચી હતી અને આગળની તપાસ હાથ ધરી હતી.
કટલેરી વેચવા ગયેલી પરિણીતાની હત્યાથી ચકચાર
ભાવનગરના ભાલ પંથકનાં ગણેશગઢ મેવાસા રોડ ઉપર મહિલાની કરપીણ હત્યા કરવામાં આવી છે. ભાવનગર શહેરના ફુલસર વિસ્તારમાં રહેતી પરણીતા કટલેરી વેચવા માટે ભાલ વિસ્તારમાં ગઈ હતી એ દરમિયાન હત્યા કરવામાં આવી છે. વેળાવદર ભાલ પોલીસ સ્ટેશનમાં 302 મુજબ હત્યાનો ગુનો દાખલ થયો છે.
પાંચ દીકરાની માતા દક્ષાબેન રાઠોડ નામની મહિલાને માથાના ભાગે લોખંડનો પાઇપ મારી મોતને ઘાટ ઉતારી દેવામાં આવી છે. જેના કારણે પાંચ સંતાનોએ માતાની છત્રછાયા ગુમાવી છે. અવાર-નવાર રીક્ષામાં લઈને જનાર સાજણ અલગોતર વિરુદ્ધ તેમના પતિએ હત્યાનો ગુનો નોંધાવ્યો છે. હાલ સમગ્ર મામલે પોલીસે વધુ તપાસ હાથ ધરી છે તેમજ હત્યા કરનાર આરોપીને ઝડપી પાડવા કાર્યવાહી શરૂ કરી છે.