સુરતની ફાર્મા કંપનીના મહિલા માલિક ઉમા કેજરીવાલથી દલાલોની મારફતે સિવિલ સુધીના આ નેટવર્કનો પર્દાફાશ થયો છે. સુરતના સાર્થક ફાર્માના મહિલા માલિકથી લઈને અમદાવાદ સિવિલ હોસ્પિટલના કર્મચારી ઘનશ્યામ વ્યાસના ખાતામાં ઈંજેક્શનના રૂપિયા જમા થયા. તો સાર્થક ફાર્માના માલિક ઉમા કેજરીવાલ પ્રિસ્ક્રિપ્શન વગર જ દવાનું વેચાણ કરતા હતા.
ઉમા કેજરીવાલની પૂછપરછમાં ઘટસ્ફોટ થયો કે આ દવાની ખરીદી તેમણે સુરતના અડાજણ વિસ્તારમાં શાંતિ મેડિસિન્સના માલિક મિતુલ શાહ પાસેથી કરી હતી. આ માટે એકના 50 હજાર રૂપિયા બીલ વગર ચુકવવામાં આવ્યા હતા. મિતુલ શાહે ઈંજેક્શનની ખરીદી અમદાવાદના અમિત મંછારામાની પાસેથી કરી હતી અને તેના નંગ દીઠ 45 હજાર રૂપિયા અમદાવાદ સિવિલ હોસ્પિટલમાં ફરજ બજાવતા ઘનશ્યામ વ્યાસના ખાતામાં જમા થતા હતા. અમિત મંછારામાની અમદાવાદની અસારવાની કે.બી.વી ફાર્મા એજંસીના જવાબદાર વ્યક્તિ છે અને અમિતે એક જ પ્રિસ્ક્રિપ્શનનો વારંવાર ઉપયોગ કરીને ખરીદી કરી હોવાનું પણ તપાસમાં ખુલ્યું છે.