ગયા વરસે ઑક્ટોબર મહિનામાં ક્રાઇમ બ્રાન્ચે નકલી સોનું ગીરવે મૂકી છેતરપિંડી કરતી ગેંગ સામે ગુનો નોંધ્યો હતો. આ કેસમાં મોટા વરાછા હરિદર્શન રેસિડેન્સીમાં રહેતા અને કારમેળો ચલાવતા દલસુખ ગોવિંદ સોજીત્રા અને વીકી ભરવાડે અમદાવાદના સોની પાસે નકલી સોનાના દાગીના બનાવડાવ્યા હતા. આ દાગીના મિત્રો અને પરિચિતોને આપી તેમની પાસે લોન લેવડાવી હતી. આ પ્રકરણમાં મોટા વરાછા વિસ્તારમાં રહેતા દલસુખના મિત્રે પણ લોન લીધી હોવાથી તે પણ જેલભેગો થઈ ગયો હતો.
દલસુખ જામીન લઈને બહાર આવ્યો હતો તેના લાંબા સમય પછી આ યુવાન બહાર આવ્યો હતો અને કેટલાંક કામ માટે વતન ગયો હતો. યુવાન વતન હતો ત્યારે 10 અને 11 ઑક્ટોબરની રાત્રે દલસુખ યુવાનના ઘરે ગયો હતો. તેની સાથે વાત કરવાના બહાને ઘરે એકલી રહેલી મિત્રની 39 વર્ષીય પત્ની સાથે શારિરિક છૂટછાટ લેવા માંડી હતી. યુવતીએ પ્રતિકાર કરવાની કોશિશ કરતાં દલસુખે યુવતીના પતિનો જેલવાસ લંબાવી દેવાની ધમકી આપી તેની લાચારીનો લાભ ઉઠાવી શારીરિક સંબંધ બાંધ્યા હતા.
યુવકને આ બાબતની જાણ થતાં તેણે પત્નિને સધિયારો આપતાં આ દંપતીએ બુધવારે અમરોલી પોલીસ મથકે દલસુખ સોજીત્રા વિરુદ્ધ બળાત્કારની ફરિયાદ નોંધાવતા પોલીસે દલસુખ સોજીત્રાની ધરપકડ કરી છે.