Gujarat Election 2022: ગુજરાત વિધાનસભાની ચૂંટણીને લઈ ભાજપ દ્વારા 182માંથી 178 ઉમેદવાર જાહેર કરવામાં આવ્યા છે. ગુજરાત વિધાનસભા ચૂંટણીને લઈને ભારતીય જનતા પાર્ટીએ સોમવારે રાત્રે 12 ઉમેદવારોની વધુ એક યાદી જાહેર કરી. જેમાં વડોદરાની સયાજીગંજ બેઠક પરથી મેયર કેયુર રોકડિયાને ટિકિટ આપી છે. મેયર કેયુર રોકડીયાનું નામ જાહેર થતાંજ પરિવારમાં ખુશીનો માહોલ છવાઈ ગયો હતો. તેમણે અત્યાર સુધીની સયાજીગંજથી સૌથી મોટી જીત મેળવવાનો વિશ્વાસ વ્યક્ત કર્યો હતો.
સોમવારે ભાજપે આ 12 ઉમેદવારોને આપી ટિકિટ
સોમવારે ભારતીય જનતા પાર્ટીએ 12 ઉમેદવારોની વધુ એક યાદી જાહેર કરી છે. ભાજપે ગાંધીનગર દક્ષિણ બેઠક પરથી અલ્પેશ ઠાકોરને ટિકિટ આપી છે. રાધનપુરથી લવિંગજી ઠાકોરને ટિકિટ આપી છે. હિંમતનગરથી વીડી ઝાલાને ટિકિટ આપી છે. ગાંધીનગર ઉત્તર રીટાબેન પટેલને ટિકિટ મળી છે. કલોલ બેઠક પરથી ભારતીય જનતા પાર્ટીએ બકાજી ઠાકોર, વટવા બેઠક પરથી બાબુસિંહ જાદવ, પેટલાદ બેઠક પરથી કમલેશ પટેલ, મહેમદાબાદથી અર્જૂન સિંહ ચૌહાણને ટિકિટ મળી છે. ઝાલોદ બેઠક પરથી મહેશ ભૂરિયાને ટિકિટ મળી છે. જેતપુર બેઠક પરથી જયંતીભાઈ રાઠવાને ટિકટ મળી છે. સયાજીગંજ બેઠક પરથી કેયુર રોકડિયાને ટિકિટ મળી છે.
ગુજરાતમાં ચૂંટણી ક્યારે યોજાશે?
ગુજરાતમાં વિધાનસભાની ચૂંટણી બે તબક્કામાં 1 ડિસેમ્બર અને 5 ડિસેમ્બરે યોજાવાની છે. પરિણામ 8મી ડિસેમ્બરે આવશે. પ્રથમ રાઉન્ડમાં કુલ 182 વિધાનસભા બેઠકોમાંથી 89 બેઠકો પર મતદાન થશે અને મુખ્ય રાજકીય પક્ષોએ લગભગ આ તમામ બેઠકો માટે તેમના ઉમેદવારો જાહેર કરી દીધા છે.