દેશનું રાષ્ટ્રીય ગીત સામાન્ય રીતે તમામ લોકોને મોઢે હશે પરંતુ માંડ કેટલાક એવા ભારતીયો હશે જેઓને ભારત સિવાય અન્ય કોઈ દેશના રાષ્ટ્રગીત મોઢે હોય અથવા ખબર હોય છે. ત્યારે વડોદરા શહેરના કલાલી રોડ પર રહેતા અને વિધાર્થી અથર્વ મૂળેને વિશ્વના 91 દેશોના રાષ્ટ્રગીત કંઠસ્થ છે તેના અર્થ પણ જાણે છે. અથર્વ મૂળેને તેની આ સિદ્ધિ બદલ ઇન્ડિયા બુક ઓફ રેકોડમાં પણ સ્થાન મળ્યું છે
વડોદરાના કલાલી રોડ પર રહેતો અને શહેરની કોલેજમાં અભ્યાસ કરતો અથર્વ અમિતભાઇ મૂળે દુનિયાના 91 દેશોના રાષ્ટ્રગીત કડકડાટ મોઢે ગાઈ શકે છે અને તે તમામ રાષ્ટ્ગીતના અર્થને સમજી પણ શકે છે. આજથી પાંચ વર્ષ પહેલા માત્ર જિજ્ઞાસાવશ ઈન્ટરનેટ પર ભારતના રાષ્ટ્રગીત ના વિવિધ અંતરા શોધવાનો પ્રયાસ કર્યો હતો અને આ દરમ્યાન દેશના પ્રસિદ્ધ ગાયકના કંઠે ગવાયેલું દેશનું રાષ્ટ્ગીત જન ગણ મન તેને સાંભળ્યું હતું.
આ ગીત સાંભળ્યા બાદ ઈન્ટરનેટ પર જ પાકિસ્તાનનું રાષ્ટ્ગીત પણ તેને સાંભળ્યું હતું અને ત્યાર બાદ વિવિધ દેશના રાષ્ટ્ગીત કેવા હશે. કેવી રીતે ગવાતાં હશે અને તેના ભાવાર્થ શુ હશે તે અંગેનો અભ્યાસ શરુ કર્યો હતો. અથર્વની જિજ્ઞાશાને કારણે તે આજે દુનિયાના 91 જેટલા દેશોના રાષ્ટ્રગીતને મોઢે કરી શક્યો છે.
અથર્વે ઈન્ટરનેટના માધ્યમથી વિવિધ દેશોના રાષ્ટ્ગીતની હાર્ડ કોપી મેળવી તેને કેવી રીતે ગાઈ શકાય તેનો પણ બારીકાઈથી અભ્યાસ કર્યો છે અને પરિણામે વિવિધ દેશોની અલગ અલગ ભાષામાં રચાયેલા રાષ્ટ્રગીતને આસાનીથી ગાઈ શકે છે. અથર્વ જે દેશોના રાષ્ટ્ર ગીત શીખ્યો છે તે તમામ રાષ્ટ્રગીતોની સમય મર્યાદાઓ પણ જુદી જુદી છે. જેમ.કે સાઉદી અરેબિયાનું નેશનલ એંથમ માત્ર 24 સેકન્ડનું જ છે જ્યારે ઇરાકનું નેશનલ એંથમ સૌથી વધુ સેકન્ડ એટલે કે 134 સેકન્ડનું છે. અથર્વને આફ્રિકાના સાત, એશિયન દેશોના ઓગણત્રીશ, ઓસ્ટ્રેલિયાનું એક તો એક યુરોપિયન અને બે નોર્થ અમેરિકાના રાષ્ટ્રગીતો કંઠસ્થ છે. આ ઉપરાંત તે નેપાળ, પાકિસ્તાન, બાંગ્લાદેશ, શ્રીલંકા સહિત ભારતના પાડોશી દેશોના રાષ્ટ્ર ગીત ગાઈ શકે છે.
અથર્વ વિશ્વના અન્ય જે બાકી રહી ગયા છે તેવા દેશોના રાષ્ટ્રગીતો શીખવા માટે હાલ પ્રયાસ કરી રહ્યો છે. મહત્વનું છે કે અથર્વ ને દેશનું રાષ્ટ્રગીત અન્ય ભાષામાં પણ આવડે છે જેમાં એરેબિક ભાષામાં આપના દેશના રાષ્ટ્રગીત ને ગાઈ શકવાની ખૂબી વિશેષ છે. આ ઉપરાંત હાલ તે દેશના વિવિધ રાજ્યો માટે રચાયેલા રાજ્ય ગીતો પર પોતાનું ધ્યાન કેન્દ્રિત કરી રહ્યો છે અને અત્યાર સુધીમાં ગુજરાત સહિત અન્ય ચાર રાજ્યોના રાજ્ય ગીત તેને કંઠસ્થ કરી લીધા છે. અથર્વના માતા પિતા તેના આ ટેલેન્ટને લઈને ખૂબ જ ગૌરવ અનુભવી રહ્યા છે.