Belarus Poland Conflict: છેલ્લા એક વર્ષથી વધુ સમયથી રશિયા અને યૂક્રેન વચ્ચે યુદ્ધ ચાલી રહ્યું છે, ત્યારે હવે આંતરરાષ્ટ્રીય સ્તર પર વધુ એક યુદ્ધનો ખતરો મંડરાઇ રહ્યો છે. તાજેતરમા જ રિપોર્ટ સામે આવ્યા છે કે, યૂક્રેન અને રશિયાના પાડોશી દેશો વચ્ચે પણ યુદ્ધ છેડાઇ શકે છે. બેલારુસ અને નાટો દેશ પોલેન્ડમાં ફરી એકવાર તણાવ અને ઘર્ષણ ભભૂકી રહ્યો હોય તેવું લાગી રહ્યું છે. આ કારણે પોલેન્ડે બેલારુસની સરહદ પર 10,000 વધારાના સૈનિકો તૈનાત કરી દીધા છે. પોલેન્ડનો દાવો છે કે બેલારુસનું સૈન્ય હેલિકૉપ્ટર તેની સરહદમાં ઘૂસી ગયું છે. જે બાદ તેને સરહદ પર વધારાના સૈનિકો તૈનાત કર્યા છે.
એક અઠવાડિયા પહેલા, બેલારુસે પોલેન્ડ અને લિથુઆનિયાની સરહદ પર સૈન્ય અભ્યાસ શરૂ કરીને તણાવ વધાર્યો હતો. ત્યારે પણ પોલેન્ડે બેલારુસ અને વેગનર ગૃપ પર તેમને ઉશ્કેરવાનો આરોપ લગાવ્યો હતો. હવે વધતા ખતરાને જોતા પોલેન્ડે પોતાના સૈનિકોને સરહદ પર તૈનાત કર્યા છે.
સુરક્ષાને ધ્યાનમાં રાખી તૈનાત કર્યા જવાનોઃ પોલેન્ડ
પોતાના સૈનિકોની તૈનાતી અંગે પોલેન્ડ સરકારનું કહેવું છે કે વર્તમાન સરહદની સ્થિતિને જોતા વધારાના સૈનિકો તૈનાત કરવા પડ્યા છે. આ વધારાના સૈનિકો સરહદ પર તેમના દેશની સુરક્ષામાં વધારો કરશે, સાથે જ બેલારુસ સુધી પહોંચેલી રશિયાની ખાનગી સેના વેગનર ગૃપની દરેક ગતિવિધિઓનું ધ્યાન રાખશે.
ઉલ્લેખનીય છે કે, અગાઉ પોલેન્ડે ચેતવણી આપી હતી કે રશિયામાં વિદ્રોહ પછી હવે વેગનરના લડવૈયા બેલારુસ પહોંચી ગયા છે, અને તેઓ તેમની સરહદની અંદર એન્ટ્રી કરી શકે છે. આવામાં સરહદ પર સુરક્ષા વ્યવસ્થા મજબૂત કરવાની જરૂર છે.
બેલારૂસી સેનાના હેલિકૉપ્ટર પર ઘૂસણખોરીનો આરોપ -
આ પહેલા પોલેન્ડ સરકારે આરોપ લગાવ્યો હતો કે 1 ઓગસ્ટના રોજ બેલારુસિયન સેનાનું હેલિકૉપ્ટર તેની સરહદની અંદર બે કિલોમીટરની ઓછી ઉંચાઈએ ઉડ્યું હતું. તે જ સમયે, પોલેન્ડના આ આરોપોને નકારી કાઢતા, બેલારુસને 'પોલેન્ડનો જુનો રાગ' તરીકે વર્ણવવામાં આવ્યું છે. બેલારુસનું કહેવું છે કે, તેમના હેલિકૉપ્ટરે સરહદી વિસ્તારનું ઉલ્લંઘન કર્યું નથી. જોકે, તાજેતરના સમયમાં પોલેન્ડ અને લિથુઆનિયા બંનેએ કેટલીય વાર આરોપ લગાવ્યો છે કે રશિયા અને બેલારુસ તરફથી ઉશ્કેરણી થઈ રહી છે.